Жессик Нганкам - қуйи Бундеслигага тушиб кетган «Герта»нинг етакчи футболчиларидан бири.
Бу ҳужумчи олдида янги мавсум ЧЛда қатнашадиган жамоа сафига қўшилиш имконияти юзага келганди. Бироқ у шундай ажойиб вариантдан воз кечди. Нега, сабаби нима? Гап шундаки, Нганкам «Герта»нинг азалий рақиби «Унион»дан таклиф олди. Бу икки жамоа ўртасидаги рақобат айниқса, Берлин ичида мислсиз даражага кўтарилганини ҳисобга олсак, Жессик қарорининг маъноси ўз-ўзидан юзага қалқиб чиқади.
Ҳа, Жессик Нганкам «Герта»нинг биринчи рақамли душмани саналган «Унион» либосида майдонга тушишни ўзига эп кўрмади. Унинг бу борадаги нуқтаи-назарига эътибор қаратинг: «Унион»нинг хизматимга жиддий қизиқаётганини анча олдин билганман, лекин эътибор қаратмагандим. Шахсий агентим клуб трансферимни тўлиқ харид қилишга мойиллигини айтганида, чамаси 3-4 дақиқа ўйланиб қолдим: «Ҳаммасига нуқта қўядиган қарор қабул қилиш вақти келди». Кейин «Унион» либосида ўйнамаслигим, чунки «Герта»ни чин юракдан яхши кўришимни айтдим. Тўғри, тан оламан, шунча йиллик фаолиятимда илк марта ЧЛда иштирок этадиган жамоа эътиборига тушганимдан кўнглим тоғдек кўтарилди». Айтиш жоиз, Нганкамнинг «Герта»да қолиши эҳтимоли жуда паст. Асосийси, у «Унион»га ўтмайди!
Германияга Камерундан кўчиб келган муҳожирлар оиласида туғилган Жессик айнан «Герта» тарбияланувчисидир. У Берлин клуби тизимига 2006 йили, 6 ёшида қўшилган. Асосий жамоа сафидаги дебютини эса 2020 йилнинг охирида нишонлади. Жессик шундан буён «кекса хоним» шарафини 37та ўйинда ҳимоя қилиб, 6та гол ва 3та самарали узатма қайд этди. Тўғри, орада, яъни 2021/2022 йиллар мавсумида «Гройтер Фюрт»га ижара келишуви асосида йўл олиб, бу жамоанинг 6та учрашувида қатнашди, ўз ҳисобига 2та гол ва 1та ассист расмийлаштирди.
Дарвоқе, Жессик яқинда Германия терма жамоаси таркибида ёшлар ўртасидаги Европа чемпионатида майдонга тушди. Фақат немислар турнирда муваффақиятсизликка учрашди - Англия, Исроил ва Чехия термалари жой олган гуруҳда сўнгги поғонани банд этишди. Нганкам эса худди «Боруссия» Д. юлдузчаси Юсуф Мукоко каби исроилликларга қарши кечган баҳсда пенальтидан фойдаланолмади ва турли ҳақоратлар уммонига ғарқ бўлди.
Тарихга қарасак, «Герта» ва «Унион» ўртасида трансферлар камдан-кам кузатилади. Маълумотларга кўра, 1989/1990 йиллар мавсумидан буён Берлиннинг икки жамоаси атиги 39 марта ўзаро «олди-сотди»ни амалга оширган. Бироқ деярли барча трансферлар ўсмирлар ёки ёшлар тоифасида. Буни тушуниш қийин эмас - ўсмирлик даври шаҳарнинг битта жамоасидан иккинчисига ўтишда ваҳимали жойи йўқ. Хуллас, азалий рақиблар катталар миқёсида атиги 4та трансферни расмийлаштиришган. Жумладан, ярим ҳимоячи Юлиус Каденинг 2019 йили «Герта»дан «Унион»га ўтгани ҳозирча охирги ўзаро келишув бўлиб қолмоқда.
МУҲАММАДСОДИҚ тайёрлади
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
