"Эл-класико"да "Барселона" билан ҳаммаси жойида эди. Ҳисобдан ташқари Хави жамоасида кўплаб ижобий жиҳатларни кўрдик. Унинг шогирдлари ўз уйида ўйиннинг асосий қисмида устунлик билан ҳаракат қилди. Аммо ҳаммасини Жуд Беллингемнинг ҳаддан ташқари юқори маҳорати ўзгартирди. Каталонияликлар ҳақли равишда олти дақиқа ичида устунликни ўз қўлига олганди. Аммо Беллингемнинг иккинчи таймдаги голлари уч очкони пойтахт жамоасига олиб берди. "Барселона"нинг мағлубияти "Реал"дан тўрт очко ортда қолишига сабабчи бўлди. Қуйида "эл-класико"да "кўк-анорранглилар"нинг энг яхши ва энг ёмон футболчиларини аниқлаймиз.
Энг яхши
Гави: 8/10
Ҳозир нафақат Испанияда, балки дунёда ҳам Беллингемга тенг келадиганини топиш жуда қийин. Кечаги ўйин ҳам буни исботлади. Аммо мезбонлар сафида Беллингем каби яхши ҳаракат қилган, аммо гол ура олмаган футболчи бор эди. Гави ўша вакилдир. Жамоаси мағлуб бўлганига қарамай, 18 ёшли ярим ҳимоячи ёрқин ҳаракат қилди. У баҳс давомида 10 та яккама-якка курашларни енгди, 9 марта рақибдан тўпни олиб қўйиб, 4 бор омадли "подкат"ни амалга оширди. Шу сабаб Гави 8 баллга лойиқ кўрилди.
Илкай Гюндоган: 7/10
Мағлубиятга қарамай, Гави каби эътирофга лойиқ футболчилардан бири бу Гюндогандир. Араухо Жуниорни бир амаллади, Кристенсен эса марказда яхши ҳаракат қилди. Аммо Гюндоган ҳаммадан ажралиб турарди. Собиқ "шаҳарлик" ўйин давомида гол уришдан ташқари 94 фоиз узатмаларни аниқ ижро этган.
Энг ёмон
Ферран Торрес: 5/10
"Барселона" "Реал"ни енга олмаганининг асосий сабаби бу ҳужум чизиғидагиларнинг етарлича яхши ҳаракат қилмагани билан боғлиқ. Ферран Торресни бу борада айбласак бўлади. У бирорта вазият яратмади ёки ундан фойдалана олмади. 23 ёшли ҳужумчи бир соат давомида рақиб дарвозаси томон бирорта зарба бера олмагани факти ҳам ҳаммасини айтиб турибди.
Жоау Канселу: 5/10
"Барселона"нинг ўзини кўрсата олмаган футболчилари ичида Канселу ҳам бор. Португалия терма жамоаси аъзосидан мухлислар кўп нарса кутган эди. Аммо у ўзига берилган вазифани тўлиқ адо эта олмади. Ҳужумни қўллаб-қувватлашда муаммоларга дуч келган Канселунинг ўзининг позициясига қайтгани маъқулроқ деган фикрлар янграмоқда ва бу гапда жон бор.
ИСМАТОВ Ж.
Матнда хатолик топсангиз, ўша хатони белгилаб, бизга жўнатинг (Ctrl + Enter).