Куни кеча Россиянинг Санкт-Петербург шаҳрида «Хамдўстлик кубоги-2013» мусобақаси якунланди. Унда Ўзбекистон ёшлар терма жамоаси ҳам иштирок этиб, 12 жамоа ичида 7-ўринни эгаллаган ҳолда қайтиб келишди. Мусобақада футболнинг ашаддий ишқибозлари - Ҳасан Ижобий ва Ҳусан Салбий ҳам қатнашиб, ёшларимизнинг барча ўйинларини томоша қилиб қайтишди. Ҳайрон бўлманг, «Ижобий» ва «Салбий» уларнинг лақаби ҳисобланади. Гап шундаки, Ҳасан табиатан қувноқ, «оптимист» йигит бўлиб, уни дўстлар орасида «Ижобий» деб чақирамиз. Ҳусан эса оғир-босиқ, «пессимист» бўлиб, уни «Салбий» деб чақирамиз.
Аэропортда уларни кутиб олиб, уйига элтиб қўяр эканман, фурсатдан фойдаланиб ёшларимизнинг ўйини ҳақида уларни суҳбатга тортдим.
— Хўш, дўстлар, ёшларимиз қандай ўйин кўрсатишди? Таассуротлар қандай бўлди?
Ҳ.Ижобий: Менинг фикримча, натижадан қатъи назар, ўйинимиз яхши бўлди, футболчиларимиз бошқа жамоа футболчиларидан бир ёш кичиклигини унутмайлик, улар билан тенгма-тенг кураш олиб боришди. Эгалланган 7-ўринга келадиган бўлсак, ахир бу мусобақа 2013 йилдаги дастлабки йиғин. Шунинг учун ҳам ўйинимиз бироз қовушмаган бўлиши мумкин. Ҳали ёшларимиз жахон чемпионати бошлангунга қадар бир-бирларини яхши тушуниб, жисмоний ҳолатларини ҳам маромига етказиб олишади. Туркияга яхши шаклланган жамоа сифатида етиб боришади.
Ҳ.Салбий: Менимча, натижадан келиб чиқадиган бўлсак, жуда ёмон ўйнашди, биз жуда бўлмаганда Литва ва Қозоғистондан ўзиб кетган ҳолда, камида 4-ўринни қўлга киритишимиз шарт эди. Жаҳон чемпионати иштирокчиси учун 7-ўрин бу шармандалик! Ҳали рақибларимиздан бирортаси бундай мавқега эга бўлишмади, жахон чемпионати йўлланмасини қўлга киритишмади. Бир ёш катта ёки кичиклик эса футболда унчалик аҳамиятга эга эмас.
Ҳ.Ижобий: Дўстим, аввало унутмайлик, бу норасмий ўртоқлик мусобақаси саналади. Бу ерда бир қатор футболчиларни кўрикдан ўтказиш, ҳар хил тактик схемаларни синаб кўриш имконияти мавжуд бўлади. Яна бир жиҳати шундаки, мусобақа сунъий қопламали майдонда ўтди. Бунга эса футболчиларимиз кўникишмаган. Чунки тўп умуман бошқача сакраб кетади. Мана шу омилларни эътиборга олгин.
Ҳ.Салбий: Бундай мусобақада натижа энг муҳим саналади. Футболчиларимиз ҳар бир ўйинда фақат ва фақат ғалаба учун майдонга тушишлари шарт! Терма жамоаларимизнинг сўнгги мусобақалардаги ютуқлари бизни шунга ўргатиб қўйди. Биз энди бундан камига рози эмасмиз. Бир ёш катта бўлсада, Қирғизистон каби жамоаларга хеч қандай имконият бермаслигимиз керак. Айтиш жоизки, айнан Қирғизистон билан бўлган ўйинда мураббийлар штаби нимагадир иккинчи таркибни майдонга тушириб, натижада зўрға дурангга эришиб, якунда эса гурухда 2-ўринни эгаллади. Чорак финалда яна Россия ёшларига рўбарў келиб қолишди. Майдон эгаларига эса унутмайлик, нафақат ҳакам, балки деворлар ҳам ёрдам беришига ўйин давомида гувоҳи бўлдик.
Ҳ.Ижобий: Иккинчи таркибни туширишни ўзига хос сабаблари бор. Ўйинлар деярли ҳар куни ўтказилди. Бундай шароитда асосий таркиб футболчиларига дам бериш кўзланган бўлиши мумкин. Ундан ташқари, захирадаги футболчиларни ҳам синаб кўриш керак. Қирғизистон билан ўйин натижасидан қатъи назар, ёшларимиз кейинги босқич масаласини ҳал қилишган эди, натижа муҳим эмасди.
Ҳ.Салбий: Фикринга қўшилмайман, натижа муҳим эди, буни мураббийлар штаби жуда яхши тушунишган. Акс ҳолда Аҳмаджон Мусаев Қирғизистон билан ўйиннинг 60-дақиқасида (ҳисоб рақибимиз фойдасига 1:2 бўлиб турган пайтда) майдонга асосий таркибнинг 6 (!) нафар футболчисини туширмаган бўларди. Мағлубиятга учраш мураббийлар штаби режасига кирмаган. Лекин бош мураббийимиз рақибни кучига баҳо беришда адашган. Ўйиннинг бошиданоқ иккинчи таркибни туширмаслик лозим эди. Фақатгина йирик ҳисобда ғалаба қозонаётган бўлсак, захира футболчиларини синаб кўриш мақсадга мувофиқ бўларди. Гуруҳда биринчи ўринни эгаллаб, чорак финалда нисбатан кучсизроқ рақибга рўбарў келишимиз мумкин эди.
Ҳ.Ижобий: Лекин мен жамоамиз ўйини яхши чиққани, йигитлар ҳар бир ўйинда жуда яхши ҳаракат қилишганини эътироф этган бўлардим. Плеймейкеримиз Жамшид Искандеров эса мусобақанинг энг яхши футболчиларидан бири бўлди, буни кўпчилик мутахассислар тан олишди. Европалик скаутлар уни ён дафтарчаларига ёзиб қўйишгани аниқ.
Ҳ.Салбий: Тўғрикуя, лекин ўйиннинг сифатига эътибор бергин. Футболчиларимизда жамоавий ўйин яхши шаклланмаган, хужумлар тартибсиз равишда ташкил қилинди. Пухта ўйланган комбинациялар йўқлиги кўзга ташланиб турди. Ёшларимиз жуда оддий ўйнашди, тўпни ҳеч ўйлаб ўтирмасдан жарима майдонига ошириш билан машғул бўлишди. Гол уришнинг имкони бўлмагач, якка курашларга берилиб кетишди. Бундай тактика рақиб учун қийинчилик туғдирмади. Ҳатто ўша чорак финал ўйинида ҳам ташаббусга эга бўла туриб, вазиятлардан фойдалана олишмади. Ҳимоя эса жуда бўш ўйнади. Мураббийлар штаби рақибга қараб «ақлли» тактика танламади.
Ҳ.Ижобий: Мен барибир мураббийлар штабига ишонч билдирган бўлар эдим. Мусаев -Евстафеев жуфтлиги кетма-кет икки марта футболчиларимизни жаҳон чемпионатига олиб чиқишди. Уларнинг тажрибасига шубҳам йўқ. Менимча, тайёргарлик пухта ишланган режа асосида олиб борилаётганига ишонса бўлади. Ҳали ёшлар яна бир қанча йиғинларда иштирок этиб, ўйин сифатини сайқаллаб олишади.
Ҳ.Салбий: Менда эса мураббийлар штабига ишонч йўқ. Уларни шу бугуноқ истеъфога чиқариш керак. Таркибга эса нафақат «Пахтакор» футбол мактабидан, балки бошқа жамоалардан ҳам футболчиларни жалб қилиш лозим. Агар ҳозирданоқ мураббийлар ишига танқидий муносабатда бўлиб, тезкор ҳаракат қилинмаса, жаҳон чемпионатида яхши натижага эришишимиз даргумон.
Хуллас, баҳс шу аснода давом этди. Ҳасан «ҳаммаси жойида, хавотирга ўрин йўқ» қабилида фикр билдирса, Ҳусан «аҳвол чатоқ, жиддий чора кўрилмаса бўлмайди» деган маънода гапираверди. Мени эса «ким ҳақу, ким ноҳақ?» деган савол ўйлантириб, роса бошимни қотирди. Уйга етиб боргандан сўнг эса уларни 6 февраль куни бўлиб ўтадиган Ўзбекистон – Гонконг ўйинига таклиф қилдим. Зора миллий терма жамоамиз иштирокидаги «голлар шоуси» тиниб-тинчимас Ҳасан-Ҳусанларни муросага келтирса...
Тараллабедод.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
