«Ал-Наср»нинг бош юлдузи Криштиану Роналду 2023 йилнинг бош тўпурари сифатида Globe Soccer Awards лауреатига айланган, яъни Диего Марадона шарафига аталган соврин соҳиби бўлганди.
Ғалати томони шундаки, 2019 йили айнан «Ал-Наср» сафида марокашлик ҳужумчи Абдулраззоқ Ҳамдалла ҳаммадан кўпроқ гол урган, аммо совринсиз қолган экан. Нега?
Globe Soccer Awards - ғалати тақдимот. Тушунарлики, Роналду 2023 йилни ўта кучли ўтказди: Саудия Арабистони чемпионатига йўл олган суперюлдуз барқарор равишда мегасамарадорлик қайд этди - 59та ўйинда 54та гол. Криш шу тариқа Globe Soccer Awards тақдирлаш маросимида йилнинг энг яхши тўпурарига аталган совринга эга чиқди. Уни яна Осиёда йилнинг энг яхши футболчиси сифатида эътироф этишларига оз қолди (ҳа, сўров шартига кўра, ОФК ҳудудида ўйнайдиган бошқа қитъалар вакилларига ҳам овоз бериш мумкин). Хуллас, йил якунлари сарҳисоб қилинадиган ва энг яхшилар тақдирланадиган Globe Soccer Awards маросимида португалиялик юлдузга 2023 йилнинг энг яхши тўпурари сифатида Диего Марадона шарафига аталган махсус мукофот топширилди. Бироқ буни ҳамма бирдек қабул қилгани йўқ. Хусусан, араб футболи мухлисларлари кутилмаганда, ижтимоий тармоқларда «Ал-Наср»да ўйнаган яна бир легионер - марокашлик Абдулраззоқ Ҳамдалла натижасини эслаб қолишди. Араб матбуотида ёзилишича, у 2019 йили нақ 57та гол урган, бироқ алоҳида мукофот олмаган. Маълумот учун, 2019 йилнинг расмий бош тўпурари Роберт Левандовски 54та гол урган. Хўш, бу маълумот тўғрими? Унчалик эмас.
Дейлик, transfermarkt порталида келтирилишича, Ҳамдалла 2019 йили 57та эса 54та гол урган. Яъни польшалик голеадор билан тенг натижа кўрсатган. Барчаси қайта ва синчковлик билан ҳисоблаб чиқилгач, transfermarkt талқини тўғри чиқди: дарҳақиқат, Ҳамдалла ҳам, Левандовски ҳам йилни 54тадан гол билан якунлаган. Аммо марокашлик тўпурар польшаликка нисбатан нақ 23та кам ўйин сарфлаган ўша натижа йўлида! Бироқ уни нега йилнинг бош тўпурари сифатида эътироф этишмагани тушунарсиз ҳолат. Тўғри, Globe Soccer Awards марокашликни 2019 йилнинг энг яхши араб футболчиси сифатида эътироф этганди.
Ўзи Ҳамдалла ким? Марокаш миллий жамоасининг ЖЧ-2022даги кутилмаган муваффақияти иштирокчиси! Ҳозирда «Ал-Иттиҳод»да тўп сураётган Ҳамдалла энди ҳар жиҳатдан янги клубдоши Карим Бенземадан нусха кўчириши билан ҳам машҳур. Дейлик, у франциялик юлдуз каби қўлини боғлаб олади ва қулоқчин билан юради. Умуман, Ҳамдалла ғайриоддий фаолият соҳибидир. Барчасини ўз ватанида бошлаган ҳужумчи кейин кутилмаганда, Норвегия чемпионатига йўл олади ва у ерда 1 мавсум ўйнайди. Абдулраззоқ шундан сўнг Осиё мамлакатлари йўналишида ҳаракатланди: Хитой - Қатар - Саудия Арабистони. Ҳамдалла ҳозир Саудия футболида чин юлдуз мақомида. Дейлик, охирги 4та мавсумда 3 марта маҳаллий чемпионатнинг бош тўпурари бўлди. Қолаверса, мавсум-2018/2019 якунида энг яхши футболчи сифатида тан олинди. «Ал-Наср» либосидаги 108та ўйинда 112та гол (!) ургани ва клуб тарихидаги тўпурарлар рўйхатида 2-ўринда эканлигини алоҳида айтиш керак.
Ҳамдалланинг Марокаш термасидаги фаолиятига келсак, 2012 йили дебютини нишонлаган ҳужумчи ортда қолган вақт мобайнида атиги 24та ўйинда қатнашган. У 2019 йили миллий жамоада бошқа ўйнамаслигини ҳам эълон қилганди. Ўшанда маҳаллий ОАВда ҳужумчининг мураббийлар штаби билан можарога боргани ҳақида хабарлар чиққанди. Шундан бир неча ой ўтгач, матбуот анжуманида бош мураббийдан Ҳамдаллани ортга қайтиши эҳтимоли юзасидан сўрашганида, у жимгина ҳужумчининг «Инстаграм»да энди ҳеч қачон миллий жамоа либосини киймаслиги тўғрисида ёзган пости нусхасини кўрсатди. Дарвоқе, Абдулраззоқ ушбу ижтимоий тармоқда 1 миллиондан кўп обуначига эга. Муҳими, Ҳамдалла Марокаш термаси футболкасини қайта кийди. Яъни 3 йилдан кейин, ЖЧ-2022 арафасида жамоа таркибига киритилди. Қатарда эса одатдагидек, асосан иккинчи бўлимда майдонга тушди ва ҳеч қандай самарали ҳаракатни амалга оширмади. Фақат Франция термасига қарши кечган ярим финал ўйини охирида, ҳисоб 0:1 бўлиб турган паллада яхши вазиятни йўққа чиқаргани билан эсда қолди. Якунда Ҳамдаллаҳ йил бошида ўтказилган Африка кубоги-2023дан четда қолди.
2022 йили «Ал-Наср»ни «Ал-Иттиҳод»га алмаштирган марокашлик дарҳол Саудия Арабистони чемпиони бўлди. Ёзда жамоа сафига Карим Бензема қўшилди ва клуб Ҳамдалладан 9-рақамни францияликка беришни сўради. Марокашлик бунга кўнди ва «99»ни олди. «Жамоамизга келган ҳар қандай футболчини илиқ қарши оламиз. Ахир биз профессионал футболчилармиз ва ҳам ташқи, ҳам ички рақобатга кўникиб улгурганмиз», - деганди Ҳамдалла ўша пайт. Маҳаллий журналистларнинг ёзишларича эса, марокашлик ҳужумчи илк кунданоқ франциялик машҳур амплуадошига боғланиб қолган. У энди ҳар нарсада Бенземага тақлид қилмоқда: бир хил кийим ва наушник, юриш-туриш... Айтишларича, Абдулраззоқ охирги вақтлар ҳаттоки, Бензема сартароши хизматидан фойдаланмоқда. Марокашлик яна худди франциялик каби ўнг қўлини боғлаб олишни ҳам одатга айлантирди. Диққатга сазовор жиҳати, Бенземанинг услуби ёрдам бермоқда: у жорий мавсум янги кумиридан анча кўп гол урмоқда.
Globe Soccer Awards 2010 йили Европа клублар ва футбол агентлари ассоциацияси томонидан кўплаб йирик ҳомийлар ёрдамида таъсис этилган. Тақдирлаш маросими ҳамиша Дубайда бўлади. Лауреатлар мухлислар ва мутахассислар иштирокидаги сўров воситасида аниқланади. Масалан, 2023 йили сўровга Франческо Тотти, Икер Касильяс, Женнаро Гаттузо, Луиш Фигу, Антонио Конте ва Фабио Капелло каби машҳурлар таклиф қилинди. Миш-мишларга қараганда, мукофот таъсисчилари қаторида Роналдунинг собиқ агенти Хорхе Мендеш ҳам бор. Айтиш керак, Globe Soccer Awards талқини бўйича айнан Криш ҳаммадан кўп йилнинг энг яхши футболчиси сифатида эътироф этилган - 6 марта. Таққослаш учун, Лионель Месси фақат 2015 йили ғалаба қозонган. Шунингдек, 14 йил давомида энг яхши футбол агентига топшириладиган мукофот асосан Мендешга берилди (12 марта). 2020 йили эса Globe Soccer Awards Роналдуни аср футболчиси, Мендешни аср агенти сифатида тан олганди. Тўғри, қавс ичида мукофот 2001-2020 йиллар учун топширилгани қайд этилган. Ҳамдалла 54та гол урган вақт Марадона шарафига аталган соврин мавжуд эмасди. Бу Роналду учун ўйлаб топилмаган, албатта. Зеро, соврин илк марта 2021 йили берилган ва уни Левандовски олган. Қизиқ, 2022 йили энг яхши тўпурар Globe Soccer Awards томонидан негадир тақдирланмаганди.
М.ПЎЛАТОВ тайёрлади
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
