«ПСЖ»нинг бу гал ҳам тахтдан тушмагани Лига 1 учун одатий ҳол бўлиб қолди.
«Монако»нинг 2-ўринда эканлиги ҳам изоҳга муҳтож эмас. Лекин ЕЧЛнинг 3-йўлланмасини ... «Брест» қўлга киритди.
Бретон клуби ҳеч қачон бунчалик чўққини забт этмаган, 1986/87 йиллар мавсумидаги 8-ўрин «қароқчилар» учун энг юксак марра эди. 5 йил аввал Лига 1га қайтганларидан кейин «29-лар» (клубнинг иккинчи тахаллуси) 11-поғонадан юқорига кўтарила олмаётган эдилар. Жамоанинг асосий вазифаси элитадаги ўрнини сақлаб қолиш эди.
Лақаблар хусусида тўхталсак, «қароқчилар» кенг тарқалган эмас, «Брест»ни кўпроқ «29-лар» дейишади. Бу лақаб клубнинг 1929 йилда ташкил этилганини англатмайди. Шунчаки, Белорусдаги Брестнинг номдоши жойлашган Финистер департаменти Францияда 29-тартиб рақами остида юритилади.
Ниҳояси хайрли эртак
Ўтган йили «Брест» мавсумни 14-ўринда якунлаганди. Клуб бюджети Лига 1да 14-ўринда. Ёзги трансфер дарчасида клуб ўзини ўта камтарона тутди. Ярим ҳимоячи Франк Онорони «Боруссия М.»га 8 млн. еврога сотиб, Маҳди Камарани 3 млн.га, Брэдли Локони 500 минга харид қилди. Ҳужумчи Марио Сатриано «Интер»дан, Жордан Амави эса «Марсел»дан ижарага олиндилар. Шундай таркиб билан жамоа Лига 1даги ўрнини сақлаб қолиш умидида эди. Тахминчи ва букмекерларнинг башоратлари ҳам айнан шунақа эди.
Бироқ старт учрашувида «29-лар» вице-чемпион «Ланс»ни маҳв (3:2) этишди. Кейин сафарда «Гавр»ни 2:1 ҳисобида енгишди ва ўзларини 2-поғонада кўришди. Лекин «Марсель» 2та жавобсиз гол эвазига ғалабага эришиб, бретонликларни осмондан ерга тушириб қўйди.
Бироқ кейинги 3та ўйинда «Брест» 7 очко жамғариб, пешқадам бўлиб олди. Тўғри, бу узоққа чўзилмади, жамоа 2 дуранг ортидан 3та мағлубиятни қабул қилгач, унга оғир кунларни башорат қилганлар енгил тин олишди: «Мана, эртакча ҳам тугади». Лекин улар кутган пасайиш юз бермади. Чунки «Лилль», «Ланс», «Марсель» каби асосий рақобатчилар ҳам очколар йўқотишга келишиб олгандек тўп суришди. Оқибатда, «Брест» жадвалнинг 2-ярмидан эмас, 6-поғонадан жой олди. Муваффақиятли старт эса чинакам эртакнинг муқаддимасига айланди. «29-лар» 4 дуранг ва 7 ғалабадан иборат мағлубиятсиз серия эвазига 2-ўринга чиқиб олишди. Албатта, якуний 10 учрашувнинг 3тасида имкониятни бой бериб, «Монако»ни олдинга ўтказиб юборди. Лекин 3-ўрин барибир, ҳатто бретонликлар учун ҳам чинакам сенсация бўлди.
Етуклик аттестати бўлмаган мураббий
Ўзининг муваффақиятлари учун «Брест» аввало, 57 ёшли мураббий Эрик Руадан миннатдор бўлиши лозим. Мухлислар уни «Қирол Эрик» деб, эъзозлайдилар. Албатта, мазкур лақаб соҳиби бўлмиш Эрик Кантона бундан хурсанд бўлмасада, нуфузли лақабни бўлишиб олишга мажбур. Боз устига, «29-лар» устозининг шарифи жуда мос, Руа ибораси қирол маъносини англатади. Бундан ташқари, шахс сифатида ҳам Эрик ўта қобилиятли инсон.
Ниццада туғилган Эрикнинг қадрдон шаҳри шарафини ҳимоя қилиш орзуси шу қадар кучли эдики, футбол йўлида у мактабдаги битирув имтиҳонларидан ўта олмади ва етуклик аттестатини қўлга киритолмади. Эрик 17 ёшида «Ницца» таркибидан жой олди, лекин дебютни 3 йил кутишига тўғри келди. Руа ноёб иқтидор соҳиби бўлмасада, ўз вазифасини рисоладагидек адо этарди. У марказий ярим ҳимоячи мақомида «Тулон», «Лион» жамоаларида тўп сурган, 1999 йилда «Марсель» сафида УЕФА Кубоги финалини ўтказиш учун Москвага келганди. Кейин маълум муддат Англиянинг «Сандерленд» ва Испаниянинг «Райо Вальекано» клубларида ўйнаб, Ниццага қайтди ва 35 ёшида бутсаларини михга илди.
Шундан кейин қадрдон клубида жамоатчилик билан ишлаш бўлимининг директори лавозимида ишга киришди. 2010 йилда «Ницца»да мураккаб вазият юзага келиб, жамоа элитани тарк этиш хавфи остида қолди. мураббий излашга вақти қолмаган мутасаддилар жамоа бошқарувини Руага топширдилар.
Бўлажак «қирол Эрик» жамоани Лига 1да олиб қолди, кейинги мавсумда ҳам янги мураббий ишончни оқлади. Клуб воситаларидан бемақсад фойдалангани учун истеъфога чиқарилган касбдошидан фарқли равишда, Руа клуб ҳисобидан иқтидорли ўйинчиларни топиш учун 12 кун Аргентинада бўлиб қайтди. Бироқ клуб сафар ҳисоботини талаб қилди. Натижасиз қайтган Руа клубни тарк этди. Айнан шу паллада мураббийлик лицензияси йўқ эканлиги ёдига тушди ва бу камчиликни тўлдиришган қарор қилди. Дарвоқе, мураббийлик курсида Эрик Зайниддин Зидан билан биргаликда таҳсил олди.
Бироқ янги соҳада Руага иш топилмагач, у «Ланс»да спорт директори лавозимини эгаллади, кейинчалик «Уотфорд»даги қисқа фаолиятдан сўнг «Брест»да маъмурий лавозимни эгаллади. 2022/23 йиллар мавсумида аввал Мишель Тер-Закарян, кейин Бруно Груги жамоани бошқара олишмади ва 2023 йилнинг илк кунларида Руа бош мураббий этиб тайинланди. Жон сақлаб қолиш мавсумини муваффақиятли ҳал қилган Эрик тўла қонли мураббий мақомини олди.
Бир неча ойдан кейин «Франсис Ле Блё» стадиони трибуналарида «Қирол Эрик» баннерлари пайдо бўлди. Кантонанинг бунга алоқадор эмаслиги ўз-ўзидан тушунарли.
Нотанишлар жамоаси
«Брест» таркибида фақат ҳатто исми ҳам нотаниш бўлган ўйинчилар тўп суради десак, адолатсизлик бўлади. Таниқли футболчилар ҳам йўқ эмас. Масалан, дарвозабон Марко Бизо узоқ вақт «АЗ» дарвозасини ишончли қўриқлаган, бир-икки марта Нидерландия терма жамоасига ҳам жалб этилган. Ўнг қанот ҳимоячиси эса «Страсбур» ва «Олимпиакос»да ўйнаган, бир йил аввал «Брест»га келган, чап қанотдаги Жордан Амави «Астон Вилла» талабини қондира олмаган бўлсада, ҳозир ишончли ўйин кўрсатмоқда. Жамоа сардори бўлмиш Пьер Лис-Мелу «Брест»дан аввал «Ницца»да 100та кўпроқ ўйин ўтказган, марказий ҳужумчи Стив Мунье ўз вақтида «Хаддерсфильд» сафида голлар урган.
Эрик Руа 4-3-2-1 схемасини хуш кўради, фаол прессингни қўллайди. Унинг жамоаси босимни рақиб жарима майдончасидан бошлайди. Қанот ўйинчилари ҳам жуда фаол. Бошланғич таркибда кўпинча 9 нафар франциялик футболчи майдонга тушади, уларга бир нафар Бенин вакили ва нидерландиялик Бизо ҳамкорлик қилади.
«Брест»нинг улкан муваффақияти клубга қувонч билан биргаликда муаммоларни ҳам олиб келди. Жамоа ЕЧЛга тайёрми? Албатта, йўқ. Таркиб мукаммал эмас, ўриндиқ қисқа. Кучайтириш учун маблағ йўқ, стадион таъмирга муҳтож, «29-лар»га ўйинни ўтказишга УЕФА рухсат бериши номаълум. «Нант» ёки «Ренн» стадионларини ижарага олиш эса маблағ талаб этади.
Бундан ташқари, еврокубок мусобақалари тақвими тиғиз, кўпинча, ҳафтада 2та ўйин ўтказишга тўғри келади. «Брест» эса ҳафталик режимга мослашиб қолган, янги муҳитга мослашиш осон бўлмайди. Бироқ ҳозир шаҳарда байрам ҳукмрон. Бу табиий ҳол. Камтарин жамоа ҳақли муваффақият гаштини сурмоқда.
МУҲАММАДСОДИҚ тайёрлади
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
