SportMediaset нашри «А» серия ўйинлари кичик танаффусдан кейин қайта қўзғалиши арафасида «Милан» ҳимоячиси Маттео Габбияни мини-интервьюга кўндирди.
Суҳбат давомида эса 25 ёшли футболчининг клубдаги келажаги ва «россонерлар» ижросидаги айни ўйинлар ҳақида сўз борди. Маттео шунинг баробарида жамоа етакчиси Рафаэль Леаунинг ролига алоҳида тўхталди.
- Бугунги «Милан» ҳимоя чизиғида рақобат анча баланд. Сизда асосий таркибдан тушиб қолиш ҳавотири йўқми?
- Дарҳақиқат, рақобат даражаси анча ошди ва озгина бўшашсангиз, таркибдаги ўрнингизни йўқотишингиз ҳеч гап эмас. Айниқса, марказий ҳимоячилар ўртасида ўзига хос рақобат бор. Муҳими, бу ҳолат футболчиларга ўз ҳолатини тўғри назорат қилиб боришда ёрдам бермоқда. Бизда дўстона муҳит шаклланганини ҳам айтишим жоиз. Йигитлар менга ҳурмат билан қарашади, ўз навбатида, уларни имкон қадар қўллаб-қувватлашга тайёрман. Албатта, мудом майдонга тушишни хоҳлайман. Шундай экан, имконият берилса, жамоага наф келтириш учун бор маҳоратимни ишга соламан. Ишончим комил, жорий мавсум ҳамжиҳатликда юқори натижаларга эришамиз.
- «Милан» бу мавсум айниқса, топ-клубларга қарши катта иштиёқ билан ўйнамоқда. Ҳозиргача бундай учрашувларда қайд этилган баъзи натижалар эса тасодифдек кўринмоқда...
- Йўқ, ҳеч нарса тасодифан содир бўлмайди, айниқса, спортда. «Милан» - иқтидорли йигитлардан ташкил топган кучли жамоа. Энди нафақат етакчилар, балки ҳар қандай рақиб билан ўйинда концентрацияни максимал даражага олиб чиқишимиз керак. Баъзи-баъзида кузатилаётган оддий хатолар жамоамизнинг асл савиясига мос эмас. Ҳамма жамоа олдида катта мақсад борлигини қалбан ҳис қилиши муҳим. Оддий айтганда, майдондан қандайдир афсус-надомат билан чиқмаслик учун учрашувларга 100 фоиз эътибор қаратиш шарт.
- Айни ҳолатда «Милан» скудетто учун курашда пешқадамлар гуруҳидан сезиларли даражада ортда қолмоқда. Жамоанинг ҳали чемпионлик пойгасига қўшилишига нечоғли ишоняпсиз?
- Тўғри, «А» сериядаги натижаларимиздан мамнун эмасмиз. Муҳими, барчасини тўғрилаш имконияти йўқ эмас. Албатта, мавсумни энг юқори нотада тугатишни истасак, бўлажак ўйинларда янада жиддийлашишимиз, ташаббусни қўлга олишимиз, барчасига куч ва содиқлик билан ёндашишимиз талаб этилади. Жамоада тажрибали футболчилар етарли, демак, энг юқори маррани кўзлашимиз керак. Охир-оқибат, ҳаммаси аввало, ўзимизга боғлиқ, барибир. Бугунги вазифа - ҳар бир ўйинда ғалаба қозониш.
- Жамоа етакчиси Рафаэль Леау ҳақида қандай фикрдасиз?
- Тушунарлики, ҳар бир футболчида кўтарилиш баробарида пасайиш даври ҳам бўлади. Хайриятки, Рафада мураккаб ҳолатларга нисбатан ижобий дақиқалари анча кўп. Шахсан мен унинг майдондаги хатти-ҳаракатларидан хурсандман. Леау ҳамиша табассум улашади, яхши ишлайди, ҳаттоки, ҳимояда ҳам етарлича куч сарфлайди. Бордию, ўйинига нисбатан танқидлар янграса, уни қўллаб-қувватлашга тайёрмиз. Рафа - ҳақиқий чемпион!
- Умуман, «Милан»да ўзингизни қандай ҳис қиляпсиз? Амалдаги шартномангиз муддатини узайтириш ниятингиз борми?
- Агентим орқали клуб билан алоқадамиз, музокара кетяпти. Раҳбарият бу либосда ўйнаш мен учун катта шараф эканлигини яхши билади. Ҳамма шартномани узайтириш масаласида шошишимга ҳожат йўқлигини тушуниб турибди. Шунинг учун хотиржамман. Шубҳасиз, агар ҳамкорликни давом эттирсак, бундан бахтиёрликни туяман. Бинобарин, «Милан»да ўйнаш - амалга ошган орзуларимдан бири. Қисқаси, ҳозир келажак ҳақида ўйламаяпман. Яхшиси, «Милан»даги ҳар бир кундан борича завқланишим керак...
ХУРШИД тайёрлади
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
