"Сурхон" клуби спорт директори Рустам Қурбонбоев Суперлиганинг 10-тури доирасида бўлиб ўтган "Сўғдиёна"га қарши ўйиндан сўнгги матбуот анжуманида иштирок этди ва журналистлар саволларига жавоб берди.
Клуб бош мураббийи Февзи Давлетов эса бетоблиги сабаб матбуот анжуманида қатнашолмади.
Ўйин ҳақида:
— Осон ўйин бўлмаслигини билардик, чунки "Сўғдиёна" — жуда яхши жамоа. Жадвалда эгаллаб турган ўрнига қарамасдан, жамоа яхши эканлигини билардик, жамоанинг ўйинларини яхши ўрганиб чиқдик. Шунингдек, жиддий тайёргарлик кўрдик. Худога шукр, омадимиз келди ва биз ғалаба қозондик. Ўйлашимча, энг яхши ўйинни ўтказмадик. Шунга қарамасдан, ғалаба қозонганимиз учун хурсандмиз. Йигитлар, мураббийлар штаби ва мухлисларни ушбу ғалаба билан табриклайман.
— Олдинги матбуот анжуманларида Ҳайдаров ҳақида айтилган эди. У йиғинда қатнашмаганлиги ва кўп ўйнамаганлиги ҳақида фикр билдирилган эди. Европа футболини мисолга келтирсак, ҳар бир ёш ҳужумчи устидан алоҳида иш олиб борилади. Нега Ҳайдаровнинг ҳозирги ўйини бўйича мураббийлар штаби томонидан реакция қилинмаяпти?
— Биз реакция қилмаяпмиз деб айта олмайман. Абдуғафур айни пайтда оптимал формада эмас. Биз билан Туркиядаги йиғинда қатнашмаганидан ташқари, ёшлар терма жамоаси йиғинларида ҳам қатнашган. У тиззасидан жароҳат олган ва кўп машғулотларни ўтказиб юборди. Бу нарса ҳам таъсир қилган. Футболда 1-2 ой машғулот қилмаслик — катта нарса. Худога шукр, у жароҳатсиз амалиётни ўтказди. Лекин биз бу устида ишлаяпмиз. Жисмоний тайёргарлик бўйича мураббийимиз у билан алоҳида ишлаяпти. Бизда икки нафар ҳужумчимиз бор. Эътибор берган бўлсангиз, биз асосан 4-3-3 тактик схема бўйича ўйнаяпмиз. Муҳаммад-Али Абдураҳмонов ҳозир яхши ўйнаяпти. Аммо, Абдуғафурга ўйин амалиётини бермасдан иш тутмадик. Кубокда ўйнаяпти, ҳар бир ўйинда ярим соатдан ўйнаяпти. Биз Ҳайдаровнинг ўтган мавсумда кўрсатган ўйинига қайтишига манфаатдормиз ва жамоа унга ёрдам беради. Озгина сабр қилишимиз керак. Абдуғафур Ҳайдаров — келажаги бор футболчи. Ундан ташқари, кўп ёш футболчиларимиз бор. Биз асосан ёш футболчиларни ўйнатаяпмиз ва уларга имконият бераяпмиз.
— Билишимизча, Ҳайдаровга ЦСКА жамоасидан таклиф тушди. Уни қўллаб-қувватлаб, кўпроқ имконият бериш яхши эмасми?
— Бизга ҳам бу нарса яхши. Қани эди, ўзимизнинг Сурхондарёлик футболчи у ерга ўтса, биз хурсанд бўлардик. Биз қўлимиздан келганча унга ёрдам бермоқчимиз. Ҳамма нарса сунъий бўлмаслиги керак. Уни ЦСКА чақирмоқда деб, Ҳайдаровни ўйнатишимиз керак деган фикр нотўғри. Биз машғулотларда жараёнини кузатамиз, ўйинларда таҳлил қиламиз. Шундан келиб чиқиб, хулоса қиламиз.
— Бугун "Сурхон" 6 нафар ҳимоячи билан майдонда ҳаракат қилди. Бу нимадан боғлиқ?
— Олдинроқ айтдим, бугунги ўйин энг яхши ўйинимиз бўлмади. Лекин, ғалаба қозонганимиздан хурсандмиз. Бизда бир қанча футболчилар шамоллаб, ўйинда қатнашолмади. Бу нарса ҳам таъсир қилган бўлиши мумкин. Лекин, эътибор берган бўлсангиз, ҳимоячилардан бири — Беҳруз Шайдуллоев тепароқда ўйнади. Биз "Сўғдиёна" ўйинини ўрганиб чиққач, шундай тактикани танладик. Улларда кучли футболчилар бор, Дориев ва унга қарши қандай ўйнаш кераклиги инобатга олинди. Жавоҳир Қаҳрамонов ўнг қанот вингер бўлса-да, ўз позициясини тез-тез ўзгартириб туради ўйин давомида.
— "Сурхон" сўнгги 6та ўзаро учрашувда "Сўғдиёна"ни мағлуб этиб келмоқда ва бугун ҳам "Сурхон" ғалаба қозонди. Бунинг сабаби нимада?
— Кўплар айтади, ҳар бир жамоада ўзининг қулай рақиби бор. Менинг фикрим, "Сурхон" учун ҳеч қандай қулай рақиб йўқ. Энг асосийси — биз яхши тайёрландик. Биз яхши ўйинлар кўрсатишимиз керак. Мен "Сурхон"да 3 йил ишлаяпман ва "Сўғдиёна"ни бизнинг энг кучли рақиблардан бири сифатида тан олганмиз. Улар яхши ўйин намойиш қилмоқда, уларнинг мураббийи ҳам яхши. Улар ҳам биз каби тўп билан яхши муомала қилади.
— Ўтган ўйин ҳақида савол. Ўзбекистон Кубогида мураббийлар ўйнаш ниятини билдирмадими ёки футболчиларда иштиёқ йўқ эди?
— Иккаласи ҳам эмас. Мураббийлар ҳам, футболчилар ҳам ғалаба қозониш истагини билдирган эдилар. Биз Кубокда финалгача боришни мақсад қилгандик. Биз билардик: 7та ўйин ўйнаб, финалда ўйнаймиз ва омадимиз чопса, соврин ютамиз. Ўтган йили ярим финалгача етиб келдик ва финалга бир қадам қолди. Футболда бўлиб турадиган нарсалардан бири содир бўлди — омадимиз келмади. "Лочин"ни ҳам ўрганиб чиқдик ва яхши жамоа эканлигини билдик. Университет жамоаси бўлгани билан, кўп футболчилари "Насаф" академиясидан чиққан. Шунингдек, Зафар Полвонов каби тажрибали футболчилар ҳам бор. Тўғри, биз ротация қилдик, чунки 8 кун ичида 3 та ўйин ўтказишга мажбур бўлдик. Афсуски, ўша ўйинда мухлисларни ранжитдик. Аммо, биз узоқроқ босқичларга чиқиш учун ҳаракат қилдик.
— Кейинги турда, принципиал рақиб "Андижон"га қарши майдонга тушасиз. Ушбу ўйинда "Сурхон"дан нимани кутсак бўлади?
— Сизга саволим: Нега "Андижон" биз учун принципиал рақиб ҳисобланади?
— 2017 йили, Термизда ҳар иккала жамоа футболчилари ўртасида можаро бўлган эди.
— Ҳа, эсладим. Қайси рақиб бўлишидан қатъий назар, биз ўзимизнинг энг яхши ўйинни кўрсатишга ҳаракат қиламиз. Футболчиларимиз ҳар бир ўйинда борини беради. Меҳмонда бўладими, Термизда бўладими — биз мухлисларни хурсанд қилишга ҳаракат қиламиз.
— Ва матбуот анжуманида сўнгги бир гапим бор эди. Бизнинг дўстимиз, техник директоримиз Нурали Нуруллаевнинг мазаси йўқ, у реанимация бўлимида эди. Иложи бўлса, сизнинг орқали ўз номимиздан унга соғлиқ тилаган бўлардик. Худога шукр, унда яхши томонга ўзгаришлар бор. Ҳозир ҳам у шифохонада ва унга тезроқ шифо топишини тилаб қоламиз.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
