«Динамо» — «Қизилқум» (3:2) учрашувидан кейинги матбуот анжуманида жамоамиз бош мураббийи Вадим Абрамов журналистлар саволларига жавоб қайтариб, ўйингоҳдаги футбол атмосфераси, захирадан тушганлар гол ургани ва камбэк ҳақида фикрини билдирди.
«Шунақаси ҳам бўлиб туради. Шунча мухлислар қаршисида уларни қувонтира олганимиздан жуда хурсандмиз. Бу самарқандлик мухлислар билан бирга қўлга киритилган ғалаба бўлди. Жамоа мағлуб бўлиб турганда ҳам минглаб мухлислар стадионни тарк этмай бизга ишониб туришганди ва уларнинг ишончини қозона олдик. Бу жуда хурсанд қилади. Ўйин якунида омад бизга кулиб боқди.
Аммо қайд этишим керак – ўйинимизда пасайиш бор. Энди ФИФА кунлари сабабли танаффус юзага келади. Бундан фойдаланиб, футболчиларни яхшироқ тикланиб олиши учун ишларни олиб борамиз. Бу орқали аввалги ҳолатимизга қайтишимиз керак. Аксарият ўйинчиларимиз терма жамоаларга йўл олишади.
— Кетма-кет икки ўйиндан буён рақиб жамоалар «Динамо» билан ўйинда ҳимояда «автобус» қўйишмоқда. Бу жамоа ўйинига қай даража таъсир қилади?
— Бу фақат «Динамо» эмас, исталган жамоа учун муаммо бўлади. Ўйин давомида бу тўсиқларни енгиб ўтиш учун турли тактик ишланмалар устида доим ишлаймиз. Ўйинни назорат қилиш ва тўпни ўзимизда сақлаб, рақибни тўпсиз қолдириш эвазига бунга ечим топиш мумкин. Умуман олганда, рақиб ҳимояда ўйнаётган экан, демак бизни ҳурмат қилишни бошлашган.
— «Динамо» қўл остингизда бундан 26 йил аввал – 1999 йилда Маҳмуд Раҳимов бошқарувида эришган чемпионатдаги 11 ўйинлик мағлубиятсиз серия рекордини такрорлади...
— Бу хурсанд қилади. Бундай натижани такрорлаганимиз ёқимли. Аммо биз ҳеч қандай рекордлар ортидан қувмаймиз. Буни унутиш керак ва шунчаки ҳар бир ўйинда ўйнаш керак. Чунки рекордлар қачондир барибир тугайди. Шу боис бунинг қандайдир ҳайратланарли жойи йўқ.
— Жамоа ҳимоясида савияли ва тажрибали ҳимоячилар тўп сураётган бўлса-да, сўнгги икки ўйинда ҳимоядаги хатолар голларга сабаб бўлди. Бу ҳақда фикрингиз?
— Қўшиламан, ҳужум қилаётганда нотўғри қарорлар бунга сабаб бўлмоқда. Бунга эътибор қаратганмиз. Жамоа ҳужум қилаётганда, ҳимоячилар юқорироққа чиқиб ёрдам бераётганда белгиланган яримҳимоячилар рақибни назорат қилиши керак. Бундай пайтда оғирлик ҳимояга тушмоқда, гарчи улар катта ҳажмдаги ишни бажараётган бўлсада. Таҳлил қилиб, бунинг устида ишлаймиз.
— Захирадан туширган ўйинчиларингиз бурилиш ясай олишди. Ўрмонжонов ҳисобни тенглаштирди, Қодирқулов ғалаба голини урди...
— Бу ўйинчилар ҳам аслида асосий таркиб ўйинчилари. Таркибимизда 22 ўйинчининг ҳаммаси майдонга тушишга ҳақли. Улар исталган пайт майдонга тушиб, ўйинимизни кучайтира олишади.
— «Динамо» кубок нимчоракфиналида «Лочин»га қарши ўйнайди. Кўпчилик бу рақиб тушганидан қувонмоқда, аммо бу талабалар жамоаси «Сурхон» ва «Андижон»ни кубокдан чиқариб юборганини унутмаслик керак, шундай эмасми?
— Бу борада ҳақсиз, «Лочин» Суперлига клубларини мағлуб этиб, оддий жамоа эмаслигини кўрсатди. Таркибида тажрибали ўйинчилар бор. Биз ҳам уларни гуруҳ босқичида қийинчилик билан мағлуб этгандик. Бу ўйиндан олдин 6 нафар футболчимиз турли ёшдаги терма жамоаларимиз сафига чақирилган, уларга қарши баҳсда бор таркибдан фойдаланишимга тўғри келади. Мухлисларни хафа қилмасликка ҳаракат қиламиз. Кубокда ҳам мақсадларимиз бор.
— Фрайдей огоҳлантирилган вазият ҳақида фикрингиз...
— Ўша вазиятда ВАР нега таклиф этгани мен учун тушунарсиз. Чунки рақиб футболчиси симулция қилишга уринди, аслида унга сариқ карточка кўрсатилиши керак эди деб ўйлайман. Бу вазиятдаги провакацияси учун рақиб ўйинчиси огоҳлантирилиши керак эди.
Ҳозирдан огоҳлантириб қўйишни истардим, кейин биздан хафа бўлишмасин – бунақа муносабат билан биз томондан энди ҳеч қандай фэйр-плей бўлмайди! Майдонга ўйнаш учун тушганлар шунчаки ўйинни чўзишмоқда. Улар ўйин темпини туширмоқда, биз эса тўпни яна уларга шунчаки қайтаришимиз керакми? Бу ахмоқлик. Мана шундай вазиятларда энди тўпни қайтариб бермаймиз ва ўйнашни давом эттирамиз. Бунинг учун биздан хафа бўлишмасин ва ҳуштакбозлик ҳам қилишмасин. Шунча ўйин чўзилишларига қарамай, бор йўғи 6 дақиқа қўшилгани ҳам ҳайрон қолдирди.
— Бугун мухлислар «Енгилмас бу – оқ армия» ёзувли улкан баннерни кўтаришди. Бу мағлуб бўлмаётган ўйинчиларга таъсир қилмайдими?
— Бу босим юкламайди, аксинча футболчилар шундай дейишларига эриша олишди. Айнан мана шу ўйинчиларимиз стадионда минглаб одамлар келиб, уларни қўллаб-қувватлаётганига сабаб бўлишди. Шундай давом этиши керак. Бундай атмосфера уларни ҳам хурсанд қилади. Самарқанд аҳлига бизни қўллаб-қувватлаш учун келаётганлари учун раҳмат деймиз ва шу ўринда жамоамиздаги ҳар бир ўйинчидан ҳам миннатдорман, улар ўз ўйинлари билан бунга эришмоқдалар
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
