Ҳаётда ҳар бир нарсанинг иптидоси бўлгани каби интиҳоси ҳам бўлади. Буни ҳаётнинг ҳар бир жабҳасида кўриш мумкун, ҳаттоки футболда ҳам. Деярли бир йил давом этган ЖЧ саралашининг охирги босқичи ҳам ўз ниҳоясига етди. Лекин барча миллий терма жамоалар учун эмас. Қўшни гуруҳимиздан Япония ва Австралия термалари тўғридан тўғри йўлланмани нақд қилишган бўлса, гуруҳимизда охирги икки тургача биздан ортда борган Жанубий Корея ва Эрон Осиё учун ажратилган “ўринлар” лимитини тўлдириб қўйишди. Бугун кенг жамоатчилик орасида миллий термамизнинг ЖЧ саралаш ўйинларидаги иштироки кенг муҳокама қилинмоқда. Чунки биз Иордания билан куч синашиш орқали плей-офф босқичида ўз юришимизни давом эттирамиз.
Биласизми, мени ажаблантирадиган томони бугун мутахасислар, футбол фидойилари, мухлислар бош жамоамизнинг саралашдаги ўйинларини таҳлил қилиб, ютуқ ва камчиликлар ҳақида мулоҳаза юритаётган айни дамда юртимиз футболи учун бевосита жавобгар ташкилот ЎФФ ёки бош мураббий на матбуотда, на телевидения орқали бу борада деярли муносабат билдиришмаяпди. Эсингиздами, Жанубий Корея сафаридан олдин термамиз Хитой билан ўртоқлик учрашувини ўтказиб ғалаба қозонган. Ўйин эртасига эса мамлакат президенти мағлубият учун мухлислардан узр сўраганди. Хўш, бизда бундай ҳолатнинг ҳеч гувоҳи бўлганмизми? Терма жамоамиз қайсидир мусобақада ўз иштирокини эрта якунласа, бу учун кимдир жавобгарликни ўз бўйнига олиб халқ орасида чиқиш қилдими? Мен юқоридаги мисол билан кимнидир мухлислардан узр сўрашга ундамаяпман, аксинча Хитой ҳукуматининг мамлакат футболи тақдирига, мухлисларга қандай муносабатда эканлигини кўрсатиб ўтмоқчиман холос. “Биз тўғри йўлдан кетяпмиз, эртага ҳаммаси яхши бўлади, ёшларимиз улғаймоқда “қабилидаги фикрлар ЎФФ рахбарияти ва ходимлари томонидан бир неча бор янграб ўтган бўлсада, бу қандай йўл эканлиги ва келгуси режалар хусусида хеч қачон кенг жамоатчилик орасида батафсил ўртоқлашилмайди. Биргина мисол Қосимов-Абрамов-Қосимов “ракировкаси” амалга оширилган пайтда ЎФФда қандайдир аниқ режа бормиди? Бу ҳақда ЎФФ президенти, мененжери ёки қайсидир ходими мухлисларни хабардор қилиб, уларни фикрини эшитдими?
Яна бир эътирозга арзигулик сабаб борки, буни ҳам ўзбек мухлиси доим “ҳазм” қилиши қийин бўлиб келган. Яни терма жамоамизда бош мураббий ҳеч қачон ўз ихтиёри билан истеъфога чиқмайди. Қачонки, ЎФФ унинг хизматларидан воз кечсагина ўрнини янги мураббийга бўшатиб беради. “Нима учун федерация мухлисларга бундай масалалар бўйича баёнот бериши керак” дейдиганларга жавобим шуки, биз демократик давлатда яшаяпмиз ва давлатимизга тегишли бўлган ҳеч бир ташкилот авторитар бошқарув асосида фаолият юритмаслиги керак, қолаверса футбол мухлисларники, футбол халқники! Унинг ривожи, олдига қўйган мақсадлари учун федерацияда фаолият юритадиган мутахассислар каби мухлис ҳам бевосита жавобгардир. Чунки мухлис учун энг муҳими яхши натижа. Биламан, кимнингдир камчилигини топиш дунёдаги энг осон ишлардан бири. Лекин унутмайликки, ютуғимиз ҳам камчилигимиз ҳам ўзимизники. Бундай камчиликларимизни ташқаридан кимдир келиб бартараф қилиб бермайди. Ҳаракат ҳам, натижа ҳам ўз қўлимизда. Шу сабабли ҳам футбол федерациямиз плей-офф олдидан мухлисларнинг бундай чақириқларига ижобий жавоб беришимизга ишонгимиз келади...
Марадонача эҳтиёткорлик
Биласизми, Миржалол Қосимов терма жамоамиз бош мураббийи сифатида майдонга чиққан ўйинларни томоша қилар эканман, шарҳловчиларимиз томонидан энг кўп тилга олинадиган сўз — эҳтиёткорликдир. Ҳатто биз ўзимиздан анча кучсиз бўлган жамоаларга қарши уйда ўйнаганимизда ҳам айнан эҳтиёткорлик шиоримизга айланади. Айнан ана шу эҳтиёткорликка ҳаддан зиёд эътибор қаратиб юборганимиз оқибатида биз мундиалга тўғридан-тўғри чиқиш имкониятини йўққа чиқардик. Сабаби, кўпчиликнинг фикрини тасдиқлаган ҳолда шуни айтишим мумкунки Ливан билан уйда ўйнаганимизда кўпроқ хужумкор тактика қўллаб, Жанубий Кореяга қарши ўйинда ютқазиб қўймаслик учун эмас, ютиш учун ўйнаганимизда натижа ҳам шунга яраша бўларди. Оқибатда бизни йўлланмадан очколар эмас, бир-нечта фарқли голлар нисбати маҳрум қилиб турибди. Ваҳоланки, Эрон ва Қатарга қарши меҳмондаги учрашувларда ҳам бор эътиборимизни эҳтиёткорликка қаратганмиз. Фақат ўйиннинг бир қисмида холос. Яъни биринчи бўлиб тўп киритганимиздан кейин. Бундан ташқари деярли ўзгаришларсиз таркиб ва тактикани рақиб жамоалар ҳам обдон ўрганиб чиқишга улгиришганди. Охирги турда жамоамизнинг ўйини Сеулда бўлиб ўтаёган Эрон ва “жанубликлар” ўртасидаги баҳсга дахлдорликнинг сақланиб қолиниши оқибатида Тошкентда Қатарга қарши бир тўп ўтказиб, бешта урган билан ҳам энди кеч бўлганди.
Анна шундай кўпгина майда камчиликлар эвазига бугун ўзбек мухлиси ўзининг азалий орзусидан анча йироқлашиб кетди. Тўғри, бизнинг йўлимиз ҳали тугамади, бу ҳали интиҳо эмас. Шарҳловчиларимизнинг сеҳрли жумлалари билан айтганда, ҳали умид бор. Шундай экан мураббийларимиз ҳам “ертўла”га қамалмай ўз фикрини, режаларини баён қилсин. Биз уларни эшитайлик. Биз уларга ишонайлик, биз уларни қўллаб-қувватлайлик. Мақсадимиз Жаҳон чемпионатига чиқиш экан, бирга ҳаракат қилайлик, бирга чиқайлик. Ахир БИЗ БИР ЖАМОАМИЗ!!!
Дилшодбек Жуманиёзов
(VIQOR никли мухлис)
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
