Янги мавсумга янгича ғоя ва мақсадлар билан кириб келаётган «Милан» клуби ўзининг аввалги мавқеини тиклашга ҳар галгидан кўра жиддийроқ бел боғлаган. Жамоа таркибида эса ғалабаларга чанқоқ, иштиёқи юқори футболчилар етарли. Улардан бири АҚШ миллий терма жамоаси вингери Кристиан Пулишичдир. «Россонери» сафидаги икки йиллик фаолияти давомида мухлислар ёқимтойига айланиб улгурган 27 ёшли футболчи яқинда La Gazzetta dello Sport нашри ижодкорлари билан бўлган суҳбатда мавсум тадориги ва келгуси режалар хусусида батафсил гапириб берди.

- «Милан»нинг «Арсенал» ва «Ливерпул»га қарши кечган ўртоқлик учрашувлари сизда қандай таассурот қолдирди?

- Ўйлашимча, иккала беллашувда ҳам рақибга муносиб қаршилик кўрсатиш асносида анча ишончли ўйин намойиш эта олдик. Айниқса, биринчи бўлимларда яхши ҳимояландик ва олдинга ўтиб кўплаб хавфли вазиятлар яратдик. Умуман олганда ўсиш бор ва мавсум бошлангунга қадар ўз устимизда янада яхшироқ ишлаб, мукаммал спорт формасини тиклаб олишга ҳаракат қиламиз. Қолаверса, тайёргарликнинг ушбу босқичида кучли жамоаларга қарши ўртоқлик ўйинлари ўтказилаётгани нур устига аъло нур бўлмоқда.

- Хўш, ўзингизнинг ҳозирги спорт формангиздан кўнглингиз тўляптими?

- Ҳозирча бу борада хулоса чиқаришга бироз эрта. Бинобарин, машғулотларда босқичма-босқич юкламалар кучайтириб борилмоқда. Асосий мақсад - мавсумга имкон қадар яхшироқ тайёргарлик кўриш ва чемпионат бошлангунга қадар энг яхши спорт формасига эга бўлиш.

- Массимилиано Аллегрининг ғоя ва услублари бўйича фикрингиз қандай?

- Бош мураббийимиз жамоада жуда тўғри иш олиб бораётганига ҳеч кимда шубҳа йўқ. Зеро, Аллегри тажрибали мутахассис ва кўплаб чемпион жамоаларни муваффақиятли бошқарган. Қолаверса, у ўйинчилар билан қандай мулоқот қилишни, жамоа билан қай йўсинда тўғри муносабат ўрнатишни яхши билади. Макснинг энг устувор мақсади эса, мустаҳкам ҳимояга эга жамоани шакллантириш. Бинобарин, муваффақиятли натижаларнинг асоси - мудофадаги ишончли ўйин эканлиги барчага маълум.

- Айтганча, Аллегри матбуот анжуманида ўтган мавсумда ўтказиб юборилган голларнинг ҳаддан таш­қари кўплигини таъкидлаганди...

- Жуда тўғри гап. Ваҳоланки, юқорига кўтарилишини мақсад қилган эканмиз, ўтган мавсумдагидек кўп гол ўтказиб юбориш ярамайди. Буни ҳаммамиз ёдда тутишимиз ва нафақат ҳимоячилар, балки бутун жамоа шунга амал қилишимиз керак, чунки ҳимоя - бу жамоавий ҳаракат.

- Ортда қолган мавсум «Челси»даги уч йиллик фаолиятингиз давомида урган голларингиздан кўра яхшироқ статистика қайд этдингиз. Бунинг сири нимада?

- Буни ҳеч қандай яширадиган жойи йўқ, шунчаки «Милан»га келгач эркинлик ва ишончини ҳис қилдим. Жамоадошларим, мураббийлар, директорлар кенгашидан тортиб мухлисларгача, умуман барча-барчанинг далдаси мени икки ҳисса куч билан ўйнашга ундади. Лекин шу билан тўхтаб қолиш ниятим йўқ. Йилдан-йилга ривожланишда давом этишим учун ҳали кўп меҳнат қилишим кераклигини биламан.

- «Челси»даги даврларингиз билан солиштирганда «Милан»да ўзингизни анча интеграциялашган ва эркин ҳис қиляпсизми?

- Худди шундай. Эҳтимол икки мавсумда жуда кўп гол урганимни кимдир бошқача талқин қилар, лекин мен шу зайл давом этишни ва янада яхшироқ натижаларга эришишни истайман ва бунинг учун бор кучимни сарфлашга тайёрман. Шунингдек, «Милан»да ўйнашни жуда яхши кўраман.

- «А» Серияга кўчиб ўтгач қайси томонлама ўсишга эришдим, деб ўйлайсиз?

- Биласизми, жуда кўпчилик Италия чемпионатида Премьер-лигага қараганда камроқ куч сарфланади деб ўйлашади. Йўқ, аслида ундай эмас. «А» Серия баҳслари футболчидан яхшигина жисмоний куч ва тактик билим талаб қилади. Бу ерга кўчиб ўтгач, самарадорлик кўрсатгичларимнинг ошишини эса муҳим паллада тўғри қарор қабул қилишни ўрганганим билан изоҳлаган бўлардим. Яъни, дарвоза томон зарба ва якуний пас ўртасидаги танловни назарда тутяпман.

- Рафаэл Леаунинг «Ливерпул»га қарши баҳсдаги тўхтатиб бўлмас ҳаракатлари кўпчиликни ҳайратда қолдирди...

- Нега одамлар ҳали ҳам Леаунинг салоҳиятига шубҳа билан қарашаётганини сира тушунмайман. Зеро, биз унинг нималарга қодирлигини жуда яхши биламиз ва «Ливерпул»га қарши ўйиндаги каби ёрқин ҳаракатлари ҳеч биримизни ажаблантирмайди. Бир сўз билан айтганда - Рафа топ-иқтидор эгаси. Фақат барқарор ўйин намойиш этиш бўйича бироз изланиши керак.

- Сизнингча, Лука Модрич «Милан»га нима бера олади?

- Тажриба ва шунинг ўзи етарли! Чунончи ундаги малака ҳеч нарса билан баҳолаб бўлмайдиган ва алмаштириб бўлмас фазилатдир. Лука «Реал» сафида кўп йиллар давомида ажойиб ўйин намойиш этиш асносида катта кўникмага эга бўлди. Ўз навбатида мен ҳам Модричнинг харакатларини чин мухлис сифатида кузатдим ва кейинчалик унга қарши ўйнадим. Қисқаси, у «Милан»га барқарорлик ва ишонч олиб келадиган ўйинчи. Лука майдонда ҳам, майдон ташқарисида ҳам бебаҳо етакчи бўлишига ишончим комил.

- Самуэле Риччи ҳақида қандай фикрдасиз?

- Риччининг майдондаги харакатлари жуда ажойиб, чунки у оддий ўйнайди ва ҳар доим жамоага керак бўлган ишни қилади. Шунингдек, у юқори техника эгаси бўлибгина қолмай, тўпни яхши назорат қилади ва яхши узатмаларни амалга оширади. Қисқаси, мен Риччининг ўйин услубига қойил қоламан. Бундан ташқари Алексис Салемакерсни ҳам эътироф этган бўлардим. У дриблинг, тўп узатиш, зарба бериш ва ҳатто ҳимояланишда ҳам жамоага катта фойда келтиради. Бир сўз билан айтганда, Алексис ҳеч қачон таслим бўлмайдиган футболчилар сирасига киради.

- Аллегри сиздан чап қанот вингери сифатида фойдаланмоқчи. Айтингчи, ўзингизга қайси позицияда ўйнаш кўпроқ ёқади?

- Умуман олганда менга футбол ўйнаш ёқади. Қайси амплуада майдонга тушишимнинг эса унчалик аҳамияти йўқ. Боз устига авваллари ҳам чап қанот ярим ҳимоясида тўп сурганман ва бу нуқтада ўйнаш мен учун янгилик эмас.

- Ўтган мавсум Скудетто учун кураш асосан «Наполи» ва «Интер» ўртасида кечди. Янги чемпионат олдидан ҳам бу жамоалар бошқаларга нисбатан сифатли ижрочилар билан шартнома имзолашмоқда...

- Очиғини айтганда чемпионлик учун рақобат фақатгина «Наполи» ва «Интер» ўртасида кечади деб ўйламайман. «А» Серияда исталган рақибга жанг таклиф қила оладиган жамоалар етарли. Хусусан, биз ҳам имкон қадар кўпроқ ўйинларда ғалаба қозонишга ва иложи борича юқори даражага кўтарилишга ҳаракат қиламиз.

Манба: acmilanfan.ru, Хуршид ЮСУПОВ тайёрлади