Бунга ишониш қийин, бироқ атиги 5 нафар футболчига Европанинг энг кучли 5та чемпионатида тўп суриш насиб этган. Қитъада қайси лигалар энг кучли эканлиги хусусида тез-тез баҳс-мунозаралар бўлиб турсада, биз анъанавий йирик бешлик сифатида Англия, Испания, Германия, Италия ва Франция чемпионатларини танладик. Демак, АПЛ, Ла Лига, Бундеслига, «А» Серия ва Лига 1да тўп сурган 5 нафар футболчиларнинг исм-шарифлари ёнига қавслар ичида улар ўйнаган ҳар бир чемпионатнинг клуби ёзилади. Агар футболчи бир нечта клубда тўп сурган бўлса, фақат биринчи клуб номи зикр этилади.

Кристиан Поульсен («Шальке», «Севилья», «Ювентус», «Ливерпуль», «Эвиан»)

Даниялик таянч ярим ҳимоячиси ўз вақтида Европанинг 5та етакчи лиганинг 8та жамоаси шарафини ҳимоя қилган. Унинг энг ёрқин ўйинлари «Шальке», «Севилья» ва «Ювентус»да ўтган. 2010 йилда «Ливерпуль» Кристианни тахминан 4,5 млн. фунт стерлинг­га харид қилганди. Бироқ Поульсен атиги бир мавсумни «Энфилд»да ўтказди ва 2011 йилда «Эвиан» таркибидан жой олди. 2015 йилда футболчи фаолиятини якунлаб, мураббийлик соҳасига ўтди ва аввалига «Аякс», ке­йин Дания терма жамосини бош­қарди.

Флорин Рэдучою («Бари», «Эспаньол», «Вест Хэм», «Штутгарт», «Монако»)

Руминиялик ҳужумчининг фаолияти 19 йилга (1985-2004) чўзилди. Шу давр ичида Флорин 10та турли клубларда тўп сурди. Жумладан, у 1990 йилда Италиянинг «Бари», «Верона», «Брешия» ва «Милан» клубларида ўйнади. 1994 йилда Испанияга йўл олган футболчи «Эспаньол»да ёрқин ўйин кўрсатиб, 1996 йилда «Вест Хэм»га ўтди. Бироқ инглиз футболига мослаша олмади. Кейин ҳужумчи бир йилни Германияда «Штутгарт» билан ўтказди. Фаолиятининг сўнгги босқичида Рэдучою «Монако»да ўтказиб, 12та ўйинда 2та гол урди. Дарвоқе, Флоринни кўпчилик мухлисларга яхши таниш бўлган Мирча Луческу Бухарестнинг «Динамо»сида кашф этганди.

Стеван Йоветич («Фиорентина», «Манчестер Сити», «Севилья», «Монако, «Герта»)

Қачонлардир Йоветич ўз даврининг келажаги порлоқ ҳужумчисига айланган ва «Фиорентина»га ўтган вақтида кўплаб грандлар эътиборини торт­ганди. Натижада Италиядаги қониқарли иштироки эвазига Стеван 2013 йилда 23 млн. фунт стерлинг эвазига «Манчестер Сити» таркибидан жой олди. Англияда Черногория терма жамоасининг аъзоси 2 йилда 11та гол урди. Бироқ жароҳатлар туфайли унинг ўйин вақти камайиб кетди. Охир-оқибат, Йоветични фаолиятининг сўнгги босқичида, «Севилья», «Монако» ва «Герта»даги даврида жароҳатлар қийнади. 2017-2021 йиллар оралиғида ҳужумчи турли шикастланишлар таъсирида 150дан ортиқ учрашувларда майдонга туша олмади. Лекин шунга қарамасдан, 35 ёшли футболчи ҳанузгача Кипрнинг «Омония» клубида савияли тўп сурмоқда.

Жастин Клюйверт («Рома», «Ницца», «РБ Лейпциг», «Валенсия», «Борнмут»)

Эътиборли жиҳати шундаки, Клюйверт 25 ёшга чиққунга қадар топ-лигалар бешлигининг барчасида тўп суришга муваффақ бўлган. Нидерландиялик ҳужумчи «Рома»да тўп сурган вақтида Германия, Франция ва Испания клубларида ижара асосида майдонга тушган ва узил-кесил Англиянинг «Борнмут» клубига ўтганди. Шундан бери 26 ёшли Жастин барқарор ва савияли ҳужумчи мақомида АПЛда сифатли ўйин намойиш этмоқда, ўтган мавсумда 12та гол урди. Ҳа, айтганча, у афсонавий Патрик Клюйвертнинг ўғли, яқинда Жастин ота, Патрик эса бобо бўлишди. Жастинни «Барселона» футболкасида кўриш ажойиб бўларди, бироқ унга бошқа гранд қизиқиш билдирмоқда. Ким билади дейсиз, эҳтимол қачондир шундай ҳам бўлиши мумкин, кичик Клюйверт ротация ўйинчиси сифатида Каталония грандига асқотган бўларди.

Дарвоқе, Жастин топ-лигалар бешлигининг барчасида гол урган. Бу борада у футбол тарихидаги 3-тўпурар. Фаҳмлаган бўлсангиз, унинг ўтмишдошлари - Рэдучою ва Йоветич юқорида зикр этилди. Қизиғи шундаки, Патрик Клюйверт ўғлининг ёнидан жой олиши мумкин эди - у «Барселона», «Ньюкасл», «Милан» ва «Лилл»да тўп сурган, фақат «Бундеслига клубида ўйнаган эмас.

Пьер-Эмерик Обамеянг («Милан», «Дижон», «Боруссия Д.», «Арсенал», «Барселона»)

Мазкур рўйхатда Обамеянг алоҳида юлдузча билан белгилаб қўйилишининг сабаби шуки, у Франция, Англия, Испания ва Германияда эсда қоларли даражада тўп сурган бўлсада, «А» Серияда бирор марта майдонга тушмаган. Габон терма жамоасининг аъзоси 2007 йилдан 2011 йилгача «Милан» сафида ўйнаган бўлсада, айнан Италия чемпионатида умуман, иштирок этмаган, кўпи билан фақат захирада ўтирганди. Шундай қилиб, «А» Серияда ўйнамаган, лекин «россонерлар» таркибидан ўрин олган Обамеянгни рўйхатга киритдик. Ҳужумчининг нисбатан сермаҳсул ва сермазмун фаолияти Германиянинг «Боруссия Д.» ва Англиянинг «Арсенал» клубларида кузатилди. Шунингдек, у «Барселона», «Сент-Этьен» ва «Марсел»да ҳам яхши таассурот қолдирди. Яқинда Саудия Арабистонида «Ал-Қодисия» шарафини ҳимоя қилган 36 ёшли Пьер-Эмерик яна Европага қайтди - «Марсель» уни жон деб қабул қилди.

Манба: soccer.ru,  С.РАҲМОНОВ тайёрлади