Кеча бўлиб ўтган ОЧЛ 2 гуруҳ босқичига қуръа ташлаш маросимидан кейин гуруҳлар ва рақиблар борасида турли хил фикрлар янграши табиий ҳол.
У ерда Осиё футболи жамоатчилиги вакиллари тўпланган бўлиб, Қатар футбол ассоциациясида фаолият кўрсатиб келаётган ҳамюртимиз, тажрибали мутахассис Алишер Никимбаев ҳам бор эди.
Биласиз, "Андижон"нинг гуруҳида Қатар вакили "Ал-Аҳли" ҳам бор. Никимбаев эса нафақат ушбу клубни, балки бошқа жамоаларни ҳам яхши билади.
Қолаверса, "Андижон"ни ҳам кузатиб келади. Шу мақсадда клуб матбуот котиби қуръадан сўнг Куала-Лумпурдаги "Intercontinental" меҳмонхонасида Никимбаев билан суҳбатда бўлди.
- Ўтган йили Ўзбекистон Кубоги финалидаги ғалаба туфайли "Андижон" ОЧЛ 2 йўлланмасига эга чиққанди. Ўша ўйиндан сизда қандай хотиралар қолган?
- Ростини айтсам, ўша ўйинни тўлиқ кўрмаганман. Лекин охирги қўшимча дақиқаларни кўрганман. Ўшанда каналимда "Андижон"ни иродали ғалаба қозонганини ва менга ёққанини ёзганман. Чунки охиригача кураш олиб борган. Ҳаттоки, баъзида энди пеналтилар сериясига ўтамиз дейилганда "Андижон" охиригача курашган. Бундай пайтда сўнгги дақиқаларда ўз дарвозасидан гол ўтказиши ҳам ҳеч гап эмас. Бироқ "Андижон" қўрқмасдан ҳужумлар уюштирган ва охирида ғалаба қозонган. Мана, шунинг эвазига "Андижон" биринчи марта расмий халқаро турнирларда қатнашади.
Гуруҳдаги рақиблар ҳақида гапирсак, ўзи бу турнирда осон рақиблар йўқ. Кимдир Туркманистон клубини ёки Баҳрайн жамоасини менсимаслиги мумкин. Лекин "Аркадаг"ни ҳам, "Ал-Халдия"ни ҳам ҳурмат қилиш керак. Масалан, мен ўтган йили "Ал-Халдия"нинг ўйинига ОФК комиссари сифатида борганман. Бир нарсани айтишим мумкинки, "Ал-Халдия" билан ўйнаш осон бўлмайди. Шунинг учун тайёргарлик кўриш керак. "Ал-Аҳли" Қатар чемпионати жамоаси ва мен уларни яхшироқ билишим мумкин. Осиё майдонларида иштирок этганига анча бўлди, деярли биринчи марта қатнашяпти, дейиш мумкин. Чунки ўшандан кейин бир нечта авлод ўтиб кетди. Қатарда шундай клублар борки, бир йил қандайдир натижалар кўрсатиб, кейин пастлаб кетишлари ҳам мумкин. Менимча, гуруҳдаги тўртта жамоа ҳам деярли тенг кучга эга. Ўзингиз биласиз, "Аркадаг" ўтган йили ҳам ОЧЛ 2 да қатнашиши керак эди. Аммо улар ўзлари "Чақириқ Кубоги"да қатнашиб, турнирни ютиб яна ОЧЛ 2 га қайтишди. Муаммо шунда бўлиши мумкинки, гуруҳдаги охирги тур ўйинлари декабрь ойи охирларида бўлади. "Андижон" унгача 2-3 ҳафта ўйин амалиётисиз қолади. Шу ҳақида ўйлаш керак. Лекин "Андижон" жамоасини гуруҳдан чиқишга имконияти жуда баланд. Албатта, кейинги босқичга чиқиши керак. Максим Шатских жамоасининг охирги бир-икки ойдаги ўйинларини кўрдикки, ўйин ўзгаряпти. ОЧЛ 2 нинг биринчи ўйинигача яна бир ой бор. Жамоа ишлашда давом этса, натижага эришса бўлади.
- Демак, фикрингизча "Б" гуруҳида фаворит ёки аутсайдер йўқ?!
- Менимча, йўқ. Балки кимдир "Ал-Аҳли" деб ўйлаётган бўлиши мумкин. Тўғри, уларнинг таркибида Юлиан Дракслер каби ўйинчилари бор. Аммо у ҳам ёш эмас ва олдинги даражасида эмас. Кимдир Туркманистон ёки Баҳрайн клубларини менсимаслиги мумкин. Мен учун тўртта жамоа деярли тенг.
- "Андижон"ни устун тарафларидан бири унинг мухлислари ва бу алоҳида мавзу...
- Ўтган йили Андижонда футзал бўйича ўтказилган жаҳон чемпионатида бўлганман. Ўшанда жамоа мухлисларини ўзим кўрганман. Бошқа ўйинларда телевизорда бўлса ҳам қандай ишқибозлик қилишини кузатганман. Олимпиадага боришган. Терма жамоа билан Абу-Дабига боришган. Мухлислар жамоага қўшимча куч беради. Умид қиламанки, фан-клуб нафақат уйидаги, балки сафар учрашувларига ҳам боришади. Жамоа учун қўшимча куч-қувват ва ёрдам бўлиши лозим.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
