Жозе Моуриньо “Фенербахче”дан истеъфога чиқарилгач, унга 15 миллион евро товон пули тўлангани, умуман португалиялик мутахассис шунақа истеъфолардан шу пайтгача 90 миллион евро ишлаб олгани ҳақида кўп ерда ёзиляпти. Аммо ҳаммаси айнан шундай эмас, баъзи жиҳатлар бор.
Агар клуб мураббий билан маълум муддат учун шартнома тузган бўлса-ю, уни ўша муддат келмасдан истеъфога чиқарса, пул тўлайди, тўғри. Бу пул келишувга кўра икки турли бўлади. Биринчиси, мабодо мураббий муддатидан олдин бўшатилса, маълум аввалдан келишилган сумма ёки истеъфо пайтида келишув асосида бир марталик пул тўлаб берилади, тамом. Одатда унақа катта сумма бўлмайди.
Энг кўп тарқалгани, ўша шартнома муддати тугагунча агар мураббий ишласа, ҳаммаси бўлиб қанча маош олган бўларди, шу суммадан келиб чиқилади. Аммо агар мураббий истеъфога чиққач, то ўша муддат тугагунча бошқа клубда иш бошласа, сумма қисқаради.
Айтайлик, мураббий “А” клуб билан 2027 ёзгача 10 миллион йиллик маошга келишди. Демак у 2 мавсумда 20 миллион евро олиши керак. Клуб уни ярим йилдан сўнг истеъфога чиқарса, ўша қолган қисми – 15 миллион еврони ҳам тўлаб бериши керак. Аммо 2026 йил ёзда мураббий “Б” клубда иш бошлади. “А” клуб фақат ярим йил ишсиз қолган пайт учун 5 миллион еврони тўлаб беради. Иккинчи йил учун тўламайдими? Тўлайди, фақат “Б” клубдаги маош 10 миллион евродан кам бўлса, ўша етмаган қисмини қоплаб беради. “Б” клуб 8 миллион евро тўласа, қолган 2 миллион еврони “А” клуб қоплайди холос. Агар “Б” клуб ҳам 10 миллион евро ё ундан каттароқ суммага келишган бўлса, “А” клуб иккинчи йил учун умуман товон пули тўламайди.
Шунинг учун мураббийларнинг истеъфо пайтида ошкор қилган катта товон пуллари кўпинча тўлиқ тўланмаслигини инобатга олиш керак. Чунки одатда мураббийлар бир йил ўтмасдан барибир бошқа клубда иш бошлашади. Жозе Моуриньо ҳам фаолияти давомида максимум 1.5 йил танаффус қилган холос. Табиийки, унинг ҳақиқатда олган товон пуллари айтилаётганидан бирмунча кам.
Савол туғилади, мураббийлар эски муддат тугагунча, мазза қилиб дам олиб юришса бўлмайдими, барибир ўша суммани ё эски, ё янги клубидан оларкан-ку, деб. Бундай савол туғилишининг сабаби, биз ўзи пул ҳақида кўп ўйлашимиздан. Мураббийлар жараённинг ўзига, ёнғоқнинг шақирлашига ишқибоз. Шунингдек, муваффақият орқали улар ўзларига ном қозонишлари, кейинги шартномалар учун нархни оширишлари мумкин, дам олиб ўтириб буни амалга ошириш имконсиз.
Қаҳрамон Асланов
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
