13 сентябрь куни Ўзбекистон Суперлигаси 21-тури доирасида “Пахтакор” клуби Тошкентда “Нефтчи” жамоасини қабул қилади. Ушбу ўйин олдидан “ўзбек класикоси" тарихидаги энг эсда қоларли баҳсларни эслаб ўтамиз.
“Нефтчи” 2:0 “Пахтакор”
Ўзбекистон Республикаси мустақиллигидан кейин ўтказилган биринчи миллий чемпионат ўйинларида “Пахтакор” ва “Нефтчи” жамоалари қўш чемпионликни қўлга киритган. Бу натижада жамоаларнинг 34-турдаги ўйини катта аҳамиятга эга бўлди.
Мусобақа якунланишига 3 та тур қолганида “Нефтчи” жамоаси "шерлар"дан 3 очкога орқада борарди. 34-турда ушбу жамоалар Фарғонада тўқнаш келди. Ушбу учрашув Юрий Саркисян шогирдларининг 2:0 ҳисобидаги ғалабаси билан якунланди. Ўйинда киритилган голларга Равшан Бозоров ва Альберт Сараев муаллифлик қилди.
“Пахтакор” 5:4 “Нефтчи”
1993 йилги мавсум “Нефтчи” жамоасининг чемпионлиги билан якунланади. Бироқ, “Пахтакор” жамоаси турнир якунланишига 6 та тур қолган бир пайтда бўлғуси чемпионни мағлуб этиш орқали ўз мухлисларини хурсанд қилади.
1993-йилнинг 3 октябрь санасида “Пахтакор” Тошкентда “Нефтчи”ни қабул қилади. Учрашув 5:4 ҳисобида мезбонларнинг ғалабаси билан якунланади. "Шерлар"нинг голларига Мурод Алиев, Нўмон Ҳасанов, Шуҳрат Мақсудов, Фарҳод Магометов ва Миржалол Қосимов муаллифлик қилади. Фарғоналикларнинг жавоб голлари эса Степан Атоян (2 та), Рустам Дўрмонов ва Абдусамад Дўрмонов ҳисобига ёзилади.
“Пахтакор” 0:0 “Нефтчи”
1996 йилги Ўзбекистон кубоги мусобақасининг финал ўйинида “Пахтакор” ва “Нефтчи” ўзаро тўқнаш келди. “Пахтакор” стадионида ўтган ўйиннинг асосий вақти 0:0 ҳисобидаги дуранг натижа билан якунланди. Экстра-таймлар ҳам ҳисоб ўзгармади. Навбат пеналтилар сериясига етди. Футбол лотереясида эса “Нефтчи” жамоаси ғалабага эга чиқди.
“Нефтчи”дан пенальтиларни амалга оширган Сергей Ни, Раҳматулло Фузайлов, Акмал Холматов, Шуҳрат Шамсиев ва Сергей Андреев зарбада адашмади. “Пахтакор”дан эса Азамат Абдураимов, Николай Ширшов, Собир Ходиев ва Дилмурод Назаров пеналтидан аниқ фойдаланган бўлса-да, сўнгги зарбани йўллаган Андрей Акопянс гол кирита олмади. Шу тариқа, “Нефтчи” жамоаси ўз тарихида иккинчи марта Ўзбекистон кубогига эга чиқди.
“Нефтчи” 4:0 “Пахтакор”
2002 йилги мавсум тўлиғича “Пахтакор”га атилди дейиш мумкин. Жамоа Ўзбекистон чемпионлиги ва кубогига эга чиқди. Айниқса, кубок финалида азалий рақиби “Нефтчи” устидан ғалаба қозонди. Бироқ “Нефтчи” ҳам ушбу мавсум ўз майдонида мухлисларига “Пахтакор” устидан қўлга киритилган энг йирик ғалабасини тақдим эта олди.
2002 йилнинг 5 декабрь санасида жамоалар тўқнаш келди. Ўзбекистон Олий лигасининг 27-туридан ўрин олган ушбу баҳс Юрий Саркисян шогирдларининг 4:0 ҳисобидаги ғалабаси билан якунланди. Учрашувда киритилган голларга Анвар Бердиев (2 та), Мухтор Қурбонов ва Рустам Дўрмонов муаллифлик қилди.
“Пахтакор” 6:0 “Нефтчи”
2017 йилнинг ёзида “Пахтакор” жамоасида катта ўзгаришлар рўй берди. Жамоа ўз таркибини Олий лига юлдузлари ва маҳоратили легионер футболчилар билан янада кучайтиради.
2017 йилнинг 12 август санасида “Пахтакор” ўз майдонида “Нефтчи” клубини қабул қилади. Таъкидлаш керакки, ўша кезлари Вадим Абрамов шогирдларининг умуман ишлари юришмаётган, жамоа турнир жадвалида 15-поғонани эгаллаб турган вақтлар эди. Натижа ҳам клубларнинг ўша вақтдаги ҳолатига мос бўлди.
Учрашувда “Пахтакор” 6:0 ҳисобида ғалаба қозонди. Учрашувда киритилган голларга Тиаго Безерра (2 та), Азим Ахмедов, Игор Сергеев ва Владимир Козак муаллифлик қилди. Бу “Пахтакор”нинг ўз тарихида “Нефтчи” устидан қўлга киритилган энг йирик ғалабаси ҳисобланади. Шунингдек, ушбу ўйинда Игор Сергеев томонидан киритилган гол “Пахтакор” клубининг Суперлигадаги 1700-голи сифатида тарихда қолди.
“Нефтчи” 0:4 “Пахтакор”
2025 йил бошида ўз таркибини яхшигина кучайтириб олган “Нефтчи” жамоаси ушбу йилдаги биринчи “ўзбек классико”си олдидан мазкур баҳс фавориди деб эътироф этилганди. Сабаби, бу вақтга келиб “Пахтакор” клуби 5 та ўйиннинг 4 тасида мағлуб бўлган ва мавсумни жуда ёмон старт билан бошлаган эди. Аммо 19 апрелда бўлиб ўтган баҳсда умуман бошқача муҳит ҳукм сурди.
Педро Морейра бошчилигидаги жамоа Фарғонадан 0:4 ҳисобидаги ғалаба билан қайтди. Учрашувда киритилган голлар “Нефтчи” клубининг собиқ футболчиси Умар Адҳамзода (2 та), шунингдек, Игор Сергеев ва Брайан Риаскослар ҳисобига ёзилди.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
