13 sentyabr kuni O‘zbekiston Superligasi 21-turi doirasida “Paxtakor” klubi Toshkentda “Neftchi” jamoasini qabul qiladi. Ushbu o‘yin oldidan “o‘zbek klasikosi" tarixidagi eng esda qolarli bahslarni eslab o‘tamiz.
“Neftchi” 2:0 “Paxtakor”
O‘zbekiston Respublikasi mustaqilligidan keyin o‘tkazilgan birinchi milliy chempionat o‘yinlarida “Paxtakor” va “Neftchi” jamoalari qo‘sh chempionlikni qo‘lga kiritgan. Bu natijada jamoalarning 34-turdagi o‘yini katta ahamiyatga ega bo‘ldi.
Musobaqa yakunlanishiga 3 ta tur qolganida “Neftchi” jamoasi "sherlar"dan 3 ochkoga orqada borardi. 34-turda ushbu jamoalar Farg‘onada to‘qnash keldi. Ushbu uchrashuv Yuriy Sarkisyan shogirdlarining 2:0 hisobidagi g‘alabasi bilan yakunlandi. O‘yinda kiritilgan gollarga Ravshan Bozorov va Albert Sarayev mualliflik qildi.
“Paxtakor” 5:4 “Neftchi”
1993 yilgi mavsum “Neftchi” jamoasining chempionligi bilan yakunlanadi. Biroq, “Paxtakor” jamoasi turnir yakunlanishiga 6 ta tur qolgan bir paytda bo‘lg‘usi chempionni mag‘lub etish orqali o‘z muxlislarini xursand qiladi.
1993-yilning 3 oktyabr sanasida “Paxtakor” Toshkentda “Neftchi”ni qabul qiladi. Uchrashuv 5:4 hisobida mezbonlarning g‘alabasi bilan yakunlanadi. "Sherlar"ning gollariga Murod Aliyev, No‘mon Hasanov, Shuhrat Maqsudov, Farhod Magometov va Mirjalol Qosimov mualliflik qiladi. Farg‘onaliklarning javob gollari esa Stepan Atoyan (2 ta), Rustam Do‘rmonov va Abdusamad Do‘rmonov hisobiga yoziladi.
“Paxtakor” 0:0 “Neftchi”
1996 yilgi O‘zbekiston kubogi musobaqasining final o‘yinida “Paxtakor” va “Neftchi” o‘zaro to‘qnash keldi. “Paxtakor” stadionida o‘tgan o‘yinning asosiy vaqti 0:0 hisobidagi durang natija bilan yakunlandi. Ekstra-taymlar ham hisob o‘zgarmadi. Navbat penaltilar seriyasiga yetdi. Futbol lotereyasida esa “Neftchi” jamoasi g‘alabaga ega chiqdi.
“Neftchi”dan penaltilarni amalga oshirgan Sergey Ni, Rahmatullo Fuzaylov, Akmal Xolmatov, Shuhrat Shamsiyev va Sergey Andreev zarbada adashmadi. “Paxtakor”dan esa Azamat Abduraimov, Nikolay Shirshov, Sobir Xodiyev va Dilmurod Nazarov penaltidan aniq foydalangan bo‘lsa-da, so‘nggi zarbani yo‘llagan Andrey Akopyans gol kirita olmadi. Shu tariqa, “Neftchi” jamoasi o‘z tarixida ikkinchi marta O‘zbekiston kubogiga ega chiqdi.
“Neftchi” 4:0 “Paxtakor”
2002 yilgi mavsum to‘lig‘icha “Paxtakor”ga atildi deyish mumkin. Jamoa O‘zbekiston chempionligi va kubogiga ega chiqdi. Ayniqsa, kubok finalida azaliy raqibi “Neftchi” ustidan g‘alaba qozondi. Biroq “Neftchi” ham ushbu mavsum o‘z maydonida muxlislariga “Paxtakor” ustidan qo‘lga kiritilgan eng yirik g‘alabasini taqdim eta oldi.
2002 yilning 5 dekabr sanasida jamoalar to‘qnash keldi. O‘zbekiston Oliy ligasining 27-turidan o‘rin olgan ushbu bahs Yuriy Sarkisyan shogirdlarining 4:0 hisobidagi g‘alabasi bilan yakunlandi. Uchrashuvda kiritilgan gollarga Anvar Berdiyev (2 ta), Muxtor Qurbonov va Rustam Do‘rmonov mualliflik qildi.
“Paxtakor” 6:0 “Neftchi”
2017 yilning yozida “Paxtakor” jamoasida katta o‘zgarishlar ro‘y berdi. Jamoa o‘z tarkibini Oliy liga yulduzlari va mahoratili legioner futbolchilar bilan yanada kuchaytiradi.
2017 yilning 12 avgust sanasida “Paxtakor” o‘z maydonida “Neftchi” klubini qabul qiladi. Ta’kidlash kerakki, o‘sha kezlari Vadim Abramov shogirdlarining umuman ishlari yurishmayotgan, jamoa turnir jadvalida 15-pog‘onani egallab turgan vaqtlar edi. Natija ham klublarning o‘sha vaqtdagi holatiga mos bo‘ldi.
Uchrashuvda “Paxtakor” 6:0 hisobida g‘alaba qozondi. Uchrashuvda kiritilgan gollarga Tiago Bezerra (2 ta), Azim Axmedov, Igor Sergeev va Vladimir Kozak mualliflik qildi. Bu “Paxtakor”ning o‘z tarixida “Neftchi” ustidan qo‘lga kiritilgan eng yirik g‘alabasi hisoblanadi. Shuningdek, ushbu o‘yinda Igor Sergeev tomonidan kiritilgan gol “Paxtakor” klubining Superligadagi 1700-goli sifatida tarixda qoldi.
“Neftchi” 0:4 “Paxtakor”
2025 yil boshida o‘z tarkibini yaxshigina kuchaytirib olgan “Neftchi” jamoasi ushbu yildagi birinchi “o‘zbek klassiko”si oldidan mazkur bahs favoridi deb e’tirof etilgandi. Sababi, bu vaqtga kelib “Paxtakor” klubi 5 ta o‘yinning 4 tasida mag‘lub bo‘lgan va mavsumni juda yomon start bilan boshlagan edi. Ammo 19 aprelda bo‘lib o‘tgan bahsda umuman boshqacha muhit hukm surdi.
Pedro Moreyra boshchiligidagi jamoa Farg‘onadan 0:4 hisobidagi g‘alaba bilan qaytdi. Uchrashuvda kiritilgan gollar “Neftchi” klubining sobiq futbolchisi Umar Adhamzoda (2 ta), shuningdek, Igor Sergeev va Brayan Riaskoslar hisobiga yozildi.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
