Қарийиб 10 йил давомида «Ливерпуль» тизимида камол топиб, замонамизнинг энг маҳоратли қанот ҳимоячиларидан бирига айланган Трент Александер-Арнольд аввалги мавсум якунида «Реал» либосини кийиш ишқида «қизиллар» билан хайрлашди. Табиийки, Арне Слот жамоаси асли ливерпуллик футболчини олиб қолишга роса уринди, бироқ Трент фаолиятида туб бурилиш ясаш фикридан қайтмади. У яқинда GK журналига берган интервьюсида жонажон жамоасидан кетиш қарори хусусида яна бир марта атрофлича тўхталди.
«Ливерпул»дан кетиши
- Тан оламан, ҳаётимдаги энг оғир қарорлардан бирини қабул қилишимга тўғри келди. Зеро, «Ливерпуль» қадрон уйимга айланганди. Айнан шу клуб туфайли ўзим севган машғулот билан шуғуланиш ва яшаш бахтига муяссар бўлдим. Шунингдек, «Энфилд»да кўплаб унутилмас воқеликларни бошдан кечирдим, турли совринлар соҳибига айландим. Лекин қачондир янги чақириқ бўлиши ва кўникилган муҳитни ўзгартириш хоҳиши туғилиши табиий эди. Ўйлайманки, жамоадан кетиш учун қулай фурсатни тўғри танлай олдим.
«Реал»нинг чорлови
- «Мадрид» шубҳасиз, исталган футболчини ўзига маҳлиё қиладиган жамоа ҳисобланади. Шунинг баробарида бундай катта клубда ўйнаб кетиш нақадар қийинлиги ҳам барчага маълум. Очиғи, буни янги имконият ўлароқ қабул қилдим ва салоҳиятимни тўлиқ ишга солиш ишқида ёняпман. «Бернабеу» - муқаддас маскан. Мана, «Қироллик клуби» либосини кийгач, бунинг юки нечоғли оғирлигини яққол ҳис қилдим. Бир сўз билан айтганда, «Реал»да эканлигимнинг ўзиёқ ҳаттоки, машғулотларда бор кучни сарфлашимни тақозо этади.
Беллингемнинг таъсири
- Очиғи, бир тўхтамга келиш жараёнида Жуд билан бир неча марта гаплашдим. У клуб ва Мадриддаги ички муҳит ҳақида фақат ижобий фикрлар айтди. Шу тариқа менда ўз салоҳиятимни янги жойда синаб кўриш хоҳиши кучайди. «Реал»нинг улкан қадриятлари шундоқ ҳам маълум эди ва бундай клуб чорловидан кўз юмиш осон эмас. «Ливерпул»дан кетишим эса жамоа амбициялари эмас, балки шахсий ёндашувга боғлиқ.
АПЛ ва Ла Лига ўртасидаги фарқ
- Испания чемпионати услуб ва кескинлик нуқтаи назаридан АПЛдан бироз фарқланиши сезилмоқда. Муҳими, бу ерда ҳам футболдан чинакамига завқланиш учун барчаси мавжуд. Албатта, мақсадим катта - «Мадрид» тарихига қалин из босишни истайман. Шунчаки, футболчи эмас, балки шахс сифатида ҳам.
Шахсий қарашлар ўзгариши
- Табиийки, бу ўтиш нафақат профессионал футбол нуқтаи назаридан, балки шахсий ҳаёт масаласида ҳам кескин ўзгариш ҳисобланади. Ахир янги мамлакат, янги маданият - буларнинг барчаси сизга шахс сифатида янгича туртки беради.
Исми бўйича чалкашликлар...
- Европада жуда кўпчилик исмим билан мурожаат қилишда чалкашиб кетади. Кимлардир Алекс, бошқалар Арнольд, деб чақиришади. Шунинг учун ўзим буни соддалаштирдим - Трент.
Мадрид шаҳрига баҳо
- Мадрид худди Ливерпуль каби тарихий ва гўзал шаҳар. Бу ерда тил ўрганаётганим, янги саргузаштларни бошдан кечираётганим ва шаҳарнинг бой маданиятини ҳис қилаётганимдан бағоят хурсандман.
МУҲАММАДХОН тайёрлади
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
