«Ювентус»нинг бразилиялик ҳимоячиси Глейсон Бремер ўтган йил октябрь ойида оғир жароҳатга йўлиқиб тўққиз ойга сафдан чиққанди. Натижада, қарийиб бутун бир циклни майдон ташқарисида ўтказишга мажбур бўлган футболчи жорий йилги мавсум стартида чиройли қайтиш қила олди ва яна ўзининг юқори даражасини намойиш этишга киришди. Яқинда у GLOBO нашрига берган интервьюсида жароҳатга йўлиққан даврдаги вақтини қандай ўтказгани ва албатта, янги мавсум режалари билан ўртоқлашди.
«Бу менинг энг яхши мавсумим бўлиши мумкин эди»
— Хабарингиз бор, ўтган йилги мавсумни ажойиб тарзда бошлаш асносида «Юве»нинг 7та ўйинида майдонга тушгандим. Жамоа эса бу вақт ичида атиги биттагина гол ўтказиб юборганди. Ҳа, эҳтимол бу менинг энг яхши мавсумим бўлиши мумкин эди, лекин афсуски, Чемпионлар лигасидек жуда муҳим ўйинда фаолиятимдаги илк жиддий жароҳатга йўлиқдим. Тўғриси, бунинг нечоғлик қўрқинчли эканлигини дарҳол англагандим, зеро майдонга йиқилган заҳотим тиззам ёрилиб, ғалати овоз чиқарганди. Бунинг оқибатида менга нафақат хоч пайлари йиртилиши, балки мушаклар шикастланиши ташхисини ҳам қўйишди. Энг ёмони эса шифокорлардан тўққиз ой майдонга туша олмаслигимни эшитиш бўлганди.
«Жароҳат нафақат футболчини, балки инсонни ҳам ўзгартиради»
— Агар тўшакка михланиб қолсангиз ҳаммаси жуда қийинлашиб кетаркан. Айниқса, одатий ҳаёт тарзидан узилиб қолиш кишини нечоғлик асабийлаштириб қўйишини ўзимда ҳис қилиб кўрдим. Ачинарлиси, дастлабки икки ой давомида оёғимни ерга қўя олмадим ва уйни фақат қўлтиқ таёқ билан айланардим. Муҳими ўша оғир кезларда оилам ҳамда яқинларим ёнимда бўлишди ва уларнинг ёрдамида барча муаммоларни енгиб ўтишга эришдим.
«Икки баробар кўпроқ машқ қилдим»
— Кимда-ким жароҳат олган футболчи машғулот ўтказмайди, деб ўйласа қаттиқ адашади. Шахсан мен ўзига хос режа асосида эрталаб клубда, тушдан кейин эса уйда шахсий мураббий билан астойдил ишладим. Аммо тан оламан бу давр мобайнида оилам учун кўпроқ вақт ажратдим ва баъзан дам олиш кунлари саёҳатга ҳам чиқдик. Шунингдек, узоқ вақтдан бери режалаштирган китобимни ёздим ва... гитара чалишни ўргандим.
«Мутолаа ва афсоналардан илҳом»
— Бўш вақтларимда шунингдек, мураббийликка ихтисослашган китобларни кўпроқ ўқий бошладим. Бундан ташқари Коби Брайант ва Майкл Жорданнинг ҳаёт йўли ва фаолиятига доир маълумотларни мутолаа қилишни яхши кўраман. Улар нафақат спортда, балки ҳаётда ҳам ҳар қандай инсон учун намуна. Шахсий китобимни эса жароҳатга йўлиқишдан олдин ёзиб бўлгандим, фақат уни чиқариш учун қулай вақтни кутдим. Тьяго Линьярес билан ҳамкорликда ёзилган «Bom Dia, Campeao» («Хайрли тонг, чемпион») китобим фаолиятимни ҳақида ҳикоя қиладиган ўзига хос кундаликдир.
«Мен яна ўзимни топдим»
— Болалигимда отам ҳар доим гитара чалишни ўрганишга ундарди. Мен эса: «Йўқ, ҳозир шунчаки футбол ўйнашни хоҳлайман. Балки кейинроқ» деб қўярдим. Буни қарангки, жароҳат менга ушбу машғулот билан шуғулланиш имконини берди ва ниҳоят гитара чалишни ўргандим. Умуман олганда менга мусиқа, маъноли қўшиқлар, эстрада, сокин оҳанг жуда ёқади... Жароҳат олганимдан сўнг икки ой ўтгач, аста-секин юра бошладим ва она юртим Итапитангага бордим. Чунки қишлоқда ўсганим боис азалдан очиқ табиатга яқинроқ, шовқин-суронсиз, босимсиз ҳаётни яхши кўраман. Сабаби у ерда оила билан ёлғиз, тинч ва мазмунли ҳаёт кечириш мумкин.
«Дунёни ўзим учун қайта кашф қилмоқчи эдим»
— Аста секин оёққа тура бошлагач рафиқам ва қизим билан бирга Мисрга бордик. Бу ажойиб воқеа эди: икки-уч кун чўлда сайр қилдик, туяларни кўрдик, хуллас кўп нарса ўргандик. Одатда бошқа вақт бундай саёҳатларга унча вақтимиз бўлмасди. Умуман олганда мен ҳар доим ўзим учун дунёни қайта кашф қилишни ва янги маданиятларни ўз кўзим билан кўришни хоҳлардим. Шу боис келгусида Амазонка ва Африка давлатларига бориб маҳаллий аҳолининг ижтимоий ҳаёт тарзи ҳамда маданий меросини ўрганиш ниятим бор.
«Сафга қайтиш худди дебют каби бўлди»
— Жароҳатимдан кейин биринчи марта майдонга тушганимда ўзимни жуда асабий ҳис қилдим. Бу менга худди профессионал фаолиятимдаги биринчи ўйинимдек туюлди. Ҳа, албатта аслида бу нормал ҳолат, лекин асосийси ўзимни қўлга олишни уддаладим. Тиззамга келадиган бўлсак, алоҳида реабилитация жараёни ҳали тугамади. Бу борада ҳар куни махсус муолажа ва машғулотлар олиб бораман. Шунингдек, мушакларнинг мустаҳкамлигини сақлаб туришим ва жароҳат қайталамаслиги учун жисмоний тайёргарликка бир маромда эътибор қаратишим керак. Албатта, кундан кунга соғайиб кучга тўлиб боряпман, лекин эҳтиёткорликни унутмаслик лозим. Зеро, ҳар уч кунда майдонга тушган футболчи танасида қандайдир зўриқиш бўлиши табиий. Шунинг учун ўйиндан кейинги тикланиш жараёни ҳар томонлама мукаммал бўлиши керак.
«Ўзимни етакчи каби ҳис қиламан»
— «Ювентус»даги фаолиятимдан мамнунман ва ўзимни жамоа етакчиларидан бирига айланаётгандек ҳис қиляпман. Қолаверса, узоқ танаффусдан сўнг Туринга ўзимнинг яхши кўрган ишим билан шуғулланиш учун қайтиб келдим. Қувонарлиси, клубдагилар мени илиқ кутиб олишди. Мухлислар ҳам, раҳбарият ҳам доим ёнимда бўлишди. Биз бу оғир синовни биргаликда енгиб ўтдик десам ҳам бўлади. Улар мени ҳар қадамда қўллаб-қувватлашди. Айтиш керак, мен ёш бўйича ҳам, бу ерда ўтказган вақтим бўйича ҳам «Юве»даги энг тажрибали футболчилардан бириман. Шундай экан жамоа сафидаги ёш футболчиларга қўлимдан келганича ёрдам беришни хоҳлайман. Умид қиламанки, биз биргаликда яна бир йирик совринни қўлга киритамиз ва клубни катта ғалабалар сари етаклаймиз.
«Келаси йилги жаҳон чемпионатида ўйнашни орзу қиламан»
— Албатта, ЖЧ-2026 ҳақида ўйламасликнинг мутлақо иложи йўқ. Лекин мундиалда иштирок этиш учун ҳам жисмоний, ҳам ўйин амалиёти бўйича яхши кўрсаткичларга эга бўлишим кераклигини тушунаман, албатта. Менимча, бу фақат вақт масаласи. Агар ўзимнинг аввалги савиямга қайта олсам яна терма жамоадан чақирув олиш учун катта имконият борлигига аминман. Ҳар ҳолда шунга умид қиламан. Тўғрисини айтганда бундай жароҳатни бошдан кечиргандан кейин футболчи эҳтиёткорроқ ва хавотирга берилувчан бўлиб қоларкан. Айтайлик бу каби оғир хасталикдан сўнг баъзи ўйинчилар аввалги даражаларига қайта олишмайди — ва мен бу нима учун эканлигини яхши тушунаман. Ўйлашимча, футболчи шундай ҳолларда руҳий саломатлиги устида ишлаши керак, чунки руҳият ҳамма нарсани бошқаради.
Хуршид ЮСУПОВ тайёрлади
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
