Суперлигaнинг 25-туридан ўрин олган “Навбаҳор” – “Бунёдкор” (0:2) учрашувидан кейинки матбуот анжуманининг иккинчи қисмида мезбонлар бош мураббийи Шерзод Жўраев иштирок этиб, ОАВ ходимларининг саволларига жавоб берди.
“Лочинлар” устози одатдагидек, ўз сўзини ўйин ҳақидаги фикрлари билан бошлади.
– Ассалому алайкум! Учрашувни барчанглар кўрдинглар, тўғриси, баҳснинг бундай кечишини кутмагандим. Бугунги мағлубият учун айбни ўз зиммамга оламан. Чунки жамоанинг тайёргарлигига мен масъулман. Аслида шогирдларим ютқазишни хоҳлашмади ва охиригача ўйинда бурилиш ясатишга интилишди. Лекин учрашувнинг 1-бўлимидаги хатолар якунда меҳмонларга ғалаба келтирди.
– Жамоани бошқаришда қийнчиликлар бўлмаяптими? Футболчилар кўрсатмалaрингизни бажаряптими?
– Бу Суперлигадаги эндигина учинчи ўйиним. Менда ҳали тажриба йўқ. Лекин йигитлар кўрсатмаларимни амалга оширяпти. Лекин бу футбол. Футболда эса ҳамма нарса юз бериши мумкин. Ўйинчилар майдонга тушишганидан сўнг, Наманган аҳли ва “Навбаҳор” учун майдонда барча имкониятларини ишга солишлари лозим.
– Бугунги беллашувда икки хил бўлим гувоҳи бўлдик. “Навбаҳор” жамоаси аъзолари 2-бўлимда бошқача ўйин намойиш этган ҳолда, учрашувда бурилиш ясатишга интилишди. Лекин ҳужумлар якунига етмади. Танаффусда шогирдларингизни қандай руҳлантирдингиз? Умуман олганда, бугунги таркибдаги футболчиларнинг ҳаракатлари ҳамда ўйиндан қониқдингизмu?
– Таъкидлагандимдек, Суперлигадаги мураббийлик борасида менда тажриба камроқ. Вақти-соати билан тажрибага эга бўламиз, албатта. Йигитларга “Навбаҳор” мухлисларини доимо хурсанд қилиш кераклиги, чунки улар бундан кўпроғига лойиқ эканликларини уқтирдим.
Сўнгги мавсумларда жамоамизнинг чемпион бўлишига бир қадам қолди, икки марта Ўзбекистон кубоги финалига қадар етиб борди. Ушбу сўзларим билан эртага чемпионликни олиб бераман, демоқчи эмасман. Шунчаки, “Навбаҳор” мухлислари ижобий натижаларга лойиқ эканликларини таъкидламоқчиман, холос.
Таркиб борасида тўхталадиган бўлсам, машғулотларда қайси футболчилар яхши иштирок этса, ўйинга тайёр бўлишса, ўша ўйинчиларни майдонга туширдим. Иккинчи бўлимда жамоа ўйинини кучайтириш учун Муҳаммадали Ғиёсов, Шоҳмалик Комиловни захирадан майдонга тушириш режамда аввалдан бор эди.
– Урилмаган пеналти ўйинга қанчалик таъсир ўтказди?
– Балки, ўша 11 метрли жарима зарбаси урилганида, иккинчи бўлимда бошқача ўйин томоша қилишимиз, учрашув натижаси ҳам ўзгача бўлиши мумкин эди. Бироқ, бу билан баҳона изламоқчи эмасман. Айтилганидек, ютса – жамоа ютaди, ютқазса – мураббий. Ҳозирча тажрибам камроқ.
– “Навбаҳор”нинг U-21 ёшлар жамоасидан ҳам асосий таркибга футболчилар жалб этиладими?
– Шундай режамиз бор. Албатта, ёшлар жамоамиздаги 3–4 нафар футболчини асосий таркибга жалб этиш режамизда бор. Буни клуб раҳбарияти билан келишган ҳолда амалга оширамиз.
– Жамоада штатли пеналтичи борми ёки қайси футболчида ишонч юқори бўлса, 11 метрли жарима зарбасини амалга оширадими? Бўиси, пеналтини турли футболчилар амалга оширмоқда. Олдинги беллашувда Аббосжон Ғуломов пеналтини амалга оширган бўлса, бугунги баҳсда Русланбек Жиянов 11 метрли жарима зарбасини тепди. Бу борада нима дея оласиз?
– Ҳар бир ўйиндан олдин стандарт вазиятлар ва пеналтини қайси футболчилар амалга оширишини аниқлаб бераман. Бизда штатли пеналтичилар кўп. Улар: Азимжон Аҳмедов, Аббосжон Ғуломов, Русланбек Жиянов ва Забиҳилло Ўринбоевлар. Улардан қайси бирида ишонч кучли бўлса, пеналтини ўша футболчи амалга оширади. Бугунги баҳсга Азимжон Аҳмедов, Аббосжон Ғуломов ҳамда Русланбек Жияновларни пеналтичи сифатида танлагандим.
– Забиҳилло Ўринбоев аввалги 2 та беллашувда майдонга тушмаганди. Лекин бугунги баҳсда асосий таркибдан жой олди ва унга кўпроқ имконият бердингиз. Ушбу ҳолатни қандай изоҳлайсиз?
– Забиҳилло Ўринбоевдаги хоҳишни кўриб, уни асосий таркибда майдонга туширдим. У машғулотларда астойдил шуғулланди. Бугунги ўйинни 2 нафар ҳужумчи билан бошлашга қарор қилдим. Шунинг учун Ўринбоев бошланғич таркибдан ўрин олди. Тўғри, бу баҳона бўлиши мумкин. Эмоцияга берилувчан бўлганлигим боис, ҳалигача бугунги учрашув ҳолатидан чиқиб кетолганим йўқ. Анчагача ўзимга келолмасам ҳам керак. Йигитлар кўрсатмаларни керак бўлса, минг фоизга бажаришлари шарт. Бундай тезлик билан футбол ўйнаб бўлмайди. Миллионлар ўйинида тезроқ фикрлаш, тўпни тезроқ жамоадошига етказиб бериш лозим. Камчиликлар устида ишлаб, уни бартараф этишга ҳаракат қиламиз. Барча мураббийларда мағлубиятли ўйинлар бўлиб туради. Кейинги баҳсларда мухлисларни хурсанд қилишга интиламиз.
– Бугунги ўйинда Бенжамин Тейди ва Жулио Сезарлар нима учун майдонга тушишмади?
– Тейдининг машғулотда оёғи синиб қолди, у энди икки ҳафтача майдонга туша олмайди. Сезар даражасидаги футболчилар эса ўзимизда ҳам бор. Шунинг учун маҳаллий, ёш ўйинчиларга имконият беришга қарор қилдим. Улар ҳам секин-аста тажрибаларини ошириб боришлари лозим. Наманганда иқтидорли футболчилар кўп. Уларга ҳам имконият бериш керак.
– “Навбаҳор”га бош мураббий сифатида тайинланаётганингизда клуб раҳбарияти билан суҳбатлашгансиз, албатта. Олдинда жамоанинг яна 5 та учрашуви бор. Сизга қандайдир вазифа қўйилганми, шунингдек, келаси мавсумга ҳам режалар борми?
– Айтганимдек, бу менинг Суперлигадаги учинчи ўйиним ва ҳали менда тажриба кам. Ҳозир нимадир десам, бу баҳонага айланади. Бу борада ҳеч нарса дея олмайман. Мендан аввалги мураббий Сергей Лушан ҳам имконияти даражасида фаолият олиб борди, ҳаракат қилди. Йигитларга тезкорликни кучайтириш лозимлигини, йўқса, қийн бўлишини таъкидладим.
Менга жорий мавсумни якунлаб қўйиш вазифасини қўйишди. Наманганлик бўлганим, “Навбаҳор” менга қадрдон бўлганлиги боис, таваккал қилган ҳолда жамоани қабул қилдим. Бундай ҳолатда четда тура олмасдим. Буйоғи, барчаси Аллоҳдан. Олдиндан башорат қила олмайман.
– Кейинги баҳсда “Навбаҳор” “Қўқон-1912” жамоаси меҳмони бўлади. Ўша баҳсда ёш футболчиларга ҳам имконият берасизми?
– Айтганимдек, Наманганда иқтидорли ўйинчилар кўп. Балки, Асадбек Жўрабоев ва Наврўзбек Иминжоновлар Қўқондаги баҳсда асосий таркибдан ўрин олишар. Буни клуб раҳбарияти билан маслаҳатлашган ҳолда ҳал этамиз.
“Навбаҳор” ПФК матбуот хизмати.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
