ФИФА кунлари сабаб юзага келган халқаро танаффус вақтида Франция термаси ихтиёрида бўлган «Реал» ҳужумчиси Килиан Мбаппе аргентиналик собиқ футболчи Хорхе Валдано асос солган «Universo Valdano» подкастида қатнашди. Суҳбат давомида унинг «Реал Мадрид»га ўтиши, Винисиус ва Луис Энрике билан муносабатлари, «Мадрид дербиси»даги мағлубият, Месси билан ўйнаш имконияти, Хаби Алонсо ва Карло Анчелотти ўртасидаги фарқ каби мавзулар муҳокама қилинди.

- Бу йилги мавсум анча тиғиз тақвим остида бошланди. Айниқса, клублар ўртасидаги жаҳон чемпионатидан сўнг мавсумолди тайёргарлиги бор-йўғи 15 кун давом этди. Бундай зич тақвим ҳақида қандай фикрдасиз?

- Албатта қийин. Аслида ҳаммаси янги формат асосида ташкил қилинган КЎЖЧдан бошланди. Негаки биз АҚШдаги турнирда иштирок этаётган пайтимиз Испаниядаги бошқа жамоалар янги мавсум тадоригини бошлаб юборишганди. Тўғри, мусобақа «Мадрид» учун бироз ачинарли тарзда якунланди, аммо бу фаолиятимиздаги янги тажриба бўлди. Тақвимга келадиган бўлсак, албатта ўйинга бўлган иштиёқимиз юқори, лекин оғир ўтган мавсумдан кейин етарли дам олиш ҳам муҳим. Начора, кўп нарса футболчилар хоҳишига терс тарзда тузилади ва бунга кўникишга мажбурмиз.

- Назаримда бироз озгандай туюляпсиз. Бунга нима сабаб бўлди?

- Клублар ўртасидаги ЖЧ арафасида таомдан заҳарланиш натижасида яхшигина озиб кетдим ва 7 килограмм вазн йўқотдим. Лекин, шунга қарамай ўзимни ҳозир анча яхши ҳис қиляпман. Тўғри, оғирлигим олдингига қараганда бироз камроқ, лекин бунда ҳеч қандай муаммо кўрмаяпман.

- «Метрополитано»да «Атлетико»га қарши кечган ўйин яхшигина дарс бўлгандир?

- Ҳа, албатта. Нима бўлганини ўзимиз ҳам тушунмай қолдик. Чунки 2:1 ҳисобида олдинда бораётган пайт, яна 4та гол ўтказиб юбориш ҳеч кимни хаёлига келмайди. Тўғри, бу жамоа учун оғир синов бўлди, лекин хатолардан керакли хулоса чиқариб, олдинга интилишда давом этишимиз керак. Ўйлайманки, камчиликлар устида етарлича ишлаймиз ҳамда келажакда яна шундай ачинарли натижани бошдан кечирмаслик учун курашамиз.

- Бу ўйин «Атлетико» учун финал, «Реал» учун эса оддий учрашувдек туюлди...

- Улар дербига худди биз каби ғалаба қозониш иштиёқида келишди, ҳар бир муваффақиятга эришишди. Аксинча, биз шу куни ўз ўйинимизни намойиш эта олмадик. Учрашув назорати қўлдан чиқди ва якунда аламли мағлубиятга учрадик. Бор гап шу.

- Келинг энди Франция терма жамоаси ҳақида ҳам гаплашсак. Сиз терма жамоа либосида олдинги мундиалда 4та гол урдингиз ва камида яна 3та ЖЧда қатнашиш имкониятига эгасиз...

- Албатта, мен учун иккита Жаҳон кубоги ўтмишга айланди. Қолганларида эса юқори натижаларга эришни орзу қиламан. Айниқса, келаси йилги мундиалдан умидим катта. Мана, икки марта кетма-кет финалга чиқиш бахтига муяссар бўлдим - биттасида ғалаба қозондим, икинчисида эса мағлубият. Насиб қилса ЖЧ-2026да учинчи бор финалга чиқиб, яна бир бор бош совринга эга чиқмоқчиман. Ўйлайманки, биз 2022 йилги финалдан ўзига яраша сабоқ олдик. Энди олдимизда ўзимизни кўрсатиш учун яна бир имконият пайдо бўлмоқда. Бундан муносиб фойдаланишимиз керак.

- Бизнингча ҳам Франция жуда рақобатбардош терма жамоадай кўринмоқда. Бу жамоа мусобақанинг асосий фаворитлардан бири сифатида кўрилаётгани ҳам табиий...

- Ҳақиқатдан бизда жуда кучли таркиб бор ва бу бўлажак мундиалда катта устунлик бериши керак. Лекин, масалани бошқа томонини ҳам унутмаслик лозим. Айтмоқчиманки, терма жамоада энг яхши ўйинчилар жам бўлиши мумкин, аммо сифатли ўйин кўрсатишга имкон берадиган тактик ёндашувга эга кучли, яхлит жамоа тузмас эканмиз, жаҳон чемпионатида ғалаба қозона олмаймиз. Биз бўлажак мусобақагача нималарни ҳал қилишимиз кераклигини биламиз ва насиб қилса яна бир бор Франция термаси тарихига киришга ҳаракат қиламиз.

- Жаҳон чемпионати финалида учта гол уриб, якунда мағлубиятга учраш қандай туйғулар келтириб чиқарар экан?

- Тўғри, биз ҳужумчимиз ва ғалаба қозонишга қаратилган мақсад учун ҳаммадан кўра яқинроқмиз. Лекин финалда гол уриш ҳақида эмас, муваффақиятга эришиш ҳақида ўйлаймиз. Муҳими бош совринга эга чиқиш. Бу ким орқали амалга оширилади унчалик аҳамиятга эга эмас. Очиғи, Аргентина термаси Қатардаги финалда ғалаба қозонишга лойиқ эди, чунки улар бутун ўйин давомида жуда яхши ҳаракат қилишди ҳамда буни тан олиш бироз ачинарли. Лекин унутмаслик керакки, олдинда бизни яна бир мундиал кутмоқда ва бу сафар ҳам яна шундай вазиятга тушиб қолмаслик учун мусобақага муносиб тайёргарлик кўриш ва турнирда бор салоҳиятимизни ишга солишимиз лозим.

- Испания терма жамоасининг салоҳияти ҳақида нима дея оласиз?

- Испания ўйинни назорат қиладиган ва техник жиҳатдан жуда кучли жамоа. Уларда исталган рақибга қарши баҳсда устунлик қилиш имконини берадиган мукаммал таркиб бор. Бу мамлакат ёшлар жамоасидан тортиб катталар жамоасигача бир хил ўйин кўрсатадиган кам сонли термалардан биридир. «Қизил фурия»нинг ўзига ҳос жиҳати шундаки, таркибда жуда ёш, ғалабаларга чанқоқ ижрочилар жамланган. Менимча, улар ҳозир Европанинг энг яхши жамоаси. Аммо жаҳон чемпионати бошқа даража. Умид қиламанки, испанлар келаси йилги турнирда ёмон иштирок этишади ва биз ғалаба қозонамиз (кулади).

- Биламизки, 13 ёшингизда «Реал Мадрид»да кўрикдан ўтгансиз ва сизга клубда қолишни таклиф қилишган. Лекин кутилмаганда Францияга қайтишни маъқул кўрдингиз. Айтингчи, ўша вазиятда бундай қарорга келишингизда ким ёки нима сабаб бўлганди?

- Карьера шахсий масала эканини биладиган спортчилар оиласига эга бўлишнинг афзалликларидан бири шуки, у ерда мустақил қарор чиқара оласиз. Демоқчиманки, Францияга қайтиши қарори шахсий қарашларим орқали қабул қилинганди. Бунга на оилам ва бошқа кимнидир аралаштирмаганман. Албатта ўша пайтда ҳам «Реал»да ўйнашни орзу қилардим, лекин жамоада Бензема, Криштиану ва Бейл сингари ўйинчилар борлиги мени захира ўйинчисига айлантириб қўярди. Буни эса хоҳламадим. Шу боис вақти келгунича уйда - Парижда ўйнаш имкониятини танладим. Мана, Франциядаги 7 йиллик ақлбовар қилмас фаолиятимдан сўнг барибир «Реал» либосини кийдим ҳамда бундан ниҳоятда хурсандман.

- Шу тариқа Лига 1да дебютингизни нишонладингиз ва одамлар сизни Анри ҳамда Пеле билан солиштиришни бошлашди... Бу ҳолат қандайдир босим остида қолдирмадими?

- Йўқ нега энди? Тўғриси, бу каби гап сўзлар танилиш ва эътиборга тушиш учун қўл келди. Лекин ҳар гал ойнага қараганимда ўзимга бор ҳақиқатни айтишдан чарчамасдим: эндигина 16 ёшдасан ва ҳали ҳеч нарсага эришмадинг, уларнинг даражасига етишиш учун анча вақт бор. Қилишинг керак бўлган иш ва саёҳат аниқ. Демак, шунга қараб интил. Шундай қилиб, фақат бир нарса - ўз ўйинимни ривожлантириш ҳақида қайғурдим ҳамда салоҳиятимни бошқалар билан солиштирмасликка уриндим. Тўғри, ўша пайтдаёқ анча машҳур ва кўпчиликнинг эътиборини тортадиган ёш йигитча эдим. Аммо «Монако»да имкон қадар оддий ҳаёт кечиришим учун матбуотдан муносиб ҳимоя қила олишди.

- Ламин Ямал ҳақида қандай фикрдасиз? Зеро у 16 ёшидаёқ бутун дунёга танилиб улгурганди...

- «Монако»га ҳурмат сақлаган ҳолда айтаманки, Ламин ОАВда ёритилиши бўйича Франция клубидан анча каттароқ жамоада ўйнайди. Машҳурликнинг эса муайян рецепти йўқ ва бу босқичда ҳар ким ўзини ҳар хил тутади. Масалан мен 16 ёшда ўз тажрибамни бошдан кечирдим, ўйлайманки, у ҳам маълум саргузаштларга эга бўлади. Асосийси Ямалнинг футболга нисбатан иштиёқини қадрлашимиз керак. Қолганлари... бу унинг ҳаёти. Баъзида одамлар Ламиннинг шахсий ҳаёти ҳақида жуда кўп гапиришади, лекин менимча, уни тинч қўйиш лозим. Тан олишимиз керак, у футболда ажойиб иқтидор эгаси, аммо реал ҳаётда эндигина 18 ёшда. Бу ёшда эса ҳаммамиз хато қиламиз. У ўзининг ҳаётий тажрибасига эга бўлиши, ўзи учун нима яхши, нима ёмонлигини ажрата билиши керак. Биз фақат майдонда қилаётган ишларига баҳо беришимиз лозим. Қолганлари унчалик муҳим эмас, агар жиддий эътирозларга сабаб бўладиган иш қилмаса албатта.

- Ижтимоий тармоқларга бўлган муносабатингиз қандай?

- Жуда нормал. Интернетга киришдан олдин, футболчи бир нечта нарсалар билан келишиши керак. Одамлар унга, оиласига, жамоасига ва клубига нисбатан шафқатсиз муносабатда бўлишларини қабул қилиши лозим. Агар буларнинг барчасини қабул қила олмаса яхшиси бу каби платформалардан воз кечиш керак.

- Футбол дарғалари ҳақида гап кетганда Мессини эсламасликнинг иложи йўқ...

- Ҳа албатта. Майдонда етук, мукаммал ҳаётда эса камтарин, сокин футболчи билан бир жамоада ўйнаганимда ҳамиша фахрланаман. Месси «ПСЖ»га келганида ҳаммани ҳурмат қиладиган оддий одам эди. Ўйинчи сифатида эса у жуда бетакрор. Агар сизнинг жамоангизда шундай ижрочи бўлса ва сиз ҳужумчи бўлсангиз, шунчаки унинг ёнида бўлишингиз, нима қилаётганини кузатишингиз керак. Имкониятлардан қандай фойдаланади, қаерда тўхтайди, қаерда югуради, тўпга қандай тегинади барчасини ўрганиш лозим. Ўйлайманки, Лео билан бир жамоада тўп суриш менга футболни яхшироқ тушунишга ёрдам берди. Қисқа қилиб айтганда бундай ноёб ўйинчи атрофида бўлиш олтин имкониятдир.

- Луис Энрике билан муносабатларингиз қандай якунланди?

- Ҳаммаси дўстона шаклда якун топди. У жуда яхши инсон ва ажойиб мураббий. Мен бу мутахассис билан ҳамиша жуда яхши муносабатда бўлдим ва унга ҳаётдаги энг яхши нарсаларни тилайман. Шуни ишонч билан айтаманки, «ПСЖ»да Энрике қўл остида ажойиб вақт ўтказдим.

- Ва ниҳоят, «Реал Мадрид». Хўш айтингчи, Испанияда сизга кўпроқ нималар ёқади?

- Эҳҳе, жуда кўп нарсалар. Айтайлик, одамлари самимий ва меҳмондўст. Улар менга Мадриддаги биринчи кунданоқ жуда яхши муносабатда бўлишди ва ғамхўрлик қилишди. Очиғи ўзимни бу ерда испаниялик футболчидек ҳис қиламан, чунки уйимдан ташқаридагиларнинг менга нисбатан мана шундай илиқ муносабатда бўлишлари мусофир эканлигимни ҳам эсдан чиқариб юборади.

- Ҳамиша можарога айланиб кетиши мумкин бўлган «Реал Мадрид» атрофидаги баҳс-мунозаралар бўйича қандай фикрдасиз?

- Ҳакамлар биланми (кулади)?

- Йўқ! Мен ҳакамларни назарда тутмадим. Масалан, Винисиус билан муносабатингиз...

- Менимча, бу шунчаки Испаниядаги муаммо эмас, одамлар ҳамма жойда бир хил. Айтайлик, Францияда ҳам битта жамоада иккита машҳур ўйинчининг тўп суриши кенг муҳокамаларга сабаб бўлади. Турли нашрлар улар ҳақидаги янгиликлар билан кенг аудиторияни ўзларига қаратишга уринишади. Ростини айтсам, Винисиус билан муносабатларимиз жуда яхши. У ажойиб футболчи ва самимий инсон. Бизнинг мақсадимиз битта: «Реал»га ёрдам бериш ва чемпионликни қўлга киритиш. Бунинг учун иккаламиз ҳам қўлимиздан келганини қилишимиз керак.

- Сизнингча, Хаби Алонсо Карло Анчелоттидан нимаси билан фарқ қилади?

- Улар икки хил одам ва икки турли тажрибага эга мутахассислардир. Айтиш шарт эмас Анчелотти тарихдаги энг яхши мураббийлардан бири ва унинг қўл остида фақатгина омадли футболчилар тўп сурган. Алонсо эса энди кўзга ташланаётган ва нималарга қодирлигини исботлашга уринаётган мутахассис. «Реал»дек жаҳоннинг энг зўр жамоасида ишлаш унинг учун биринчи катта имконият. Умид қиламанки, барчамиз бу мутахассисга ўзини кўрсатишга ёрдам бериш асносида ўзимиз иштирок этаётган мусобақаларда бош совринларни қўлга киритамиз.

Манба: fondoruso.ru, Хуршид ЮСУПОВ тайёрлади