Эрон кубоги. Ҳамробеков ва Ўрунов жамоалари баҳсида “Трактор” ғалаба қозонди
Эрон кубогининг 1/16 финал босқичида Табризнинг «Трактор» ҳамда Теҳроннинг «Персеполис» жамоалари ўзаро баҳс олиб борди.
Бугун мазкур босқич доирасида Ўзбекистон миллий терма жамоаси футболчилари Одилжон Ҳамробеков ва Остон Ўрунов тўп сурадиган жамоалар ўзаро тўқнаш келди. Табриз шаҳридаги “Ёдгори Имом” стадионида бўлиб ўтган учрашувнинг асосий ва қўшимча вақтларида 1:1 ҳисоби қайд этилди, ғолиб пенальтилар сериясида аниқланди.
Пенальтилар сериясида Одилжон Ҳамробеков жамоаси — “Трактор” 8:7 ҳисобида ғалаба қозониб, мусобақанинг 1/8 финал босқичига йўл олди. “Персеполис” эса Hazfi Cup турнири билан хайрлашди.
Ҳар икки ўзбекистонлик футболчи учрашувни асосий таркибда бошлади. 58-дақиқада Меҳди Туробий гол уриб, Табриз клубини ҳисобда олдинга олиб чиқди. Асосий вақтга қўшиб берилган 6-дақиқада эса Ҳусайн Каноний мувозанатни тиклади. Қўшимча бўлимларда ҳам ҳисоб ўзгармади. Пенальтилар сериясида эса омад табризликларга кулиб боқди.
Учрашувни тўлиқ ўтказган Одилжон Ҳамробеков пенальтилар сериясида ўз зарбасини аниқ амалга оширди. “Персеполис” бош мураббийи эса 81-дақиқада Остон Ўруновни захирага олди.
“Трактор” Эрон кубогининг 1/8 финал босқичида “Шамс Азар Қазвин” жамоасига қарши баҳс олиб боради. Мазкур учрашув 12 январь куни “Сардор Азадеган” стадионида ўтказилади.
Маълумот учун, Эрон Про лигасининг жорий мавсумида “Персеполис” 14 та учрашувдан сўнг 25 очко жамғариб, турнир жадвалида 2-ўринни эгаллаб турибди. 13 ўйинда 21 очко тўплаган “Трактор” эса 5-поғонада бормоқда.
Манба: daryo.uz
Киритилди: 22:11, 18.12.2025. Ўқилди: 726 марта. Фикрлар: 0 та.
Матнда хатолик топсангиз, ўша хатони белгилаб, бизга жўнатинг (Ctrl + Enter).