Қишки трансфер даврида "Сурхон" клуби сафига ўтган Отабек Боймуродов клуб матбуот хизматига интервью берди.
— Отабек, аввало «Сурхон» таклифи қандай пайдо бўлди ва нега айнан ушбу клубни танладингиз?
— Менга жамоа бош мураббийи Станислав Петрович қўнғироқ қилди. У менинг фаолиятим ривожи учун истиқболли деб ҳисоблаган лойиҳа ҳақида маълумот берди. Шунингдек, бу шаҳар мен учун бегона эмас — онам Сурхондарёда туғилиб, шу ерда вояга етган.
— Сиз мамлакатимиздаги энг яхши ёш дарвозабонлардан бири сифатида эътироф этилмоқдасиз. Шу билан бирга, «Сурхон» сафида ёш посбонлар — Дилшод Йўлдошев ва Даврон Мерганов ҳам бор. Рақобатга муносабатингиз қандай?
— Мен соғлом рақобатни ижобий қабул қиламан. Рақобат инсонни ҳар куни ўсишга ва ривожланишга ундайди. Дилшод ва Давронни яхши биламан, уларни ҳурмат қиламан — иккаласи ҳам кучли дарвозабонлар. Мен улардан ёшроқман, аммо бу катта аҳамиятга эга эмас. Ўйлайманки, бир-биримиздан кўп нарса ўрганамиз.
— Жамоадаги муҳит қандай ва кимлар билан тезроқ тил топишдингиз?
— Жамоада муҳит яхши. Йигитларнинг аксарияти билан аввалдан танишман, турли жамоаларда бирга ўйнаганмиз. Қолганлари билан ҳам танишиб олдим. Айни пайтда энг кўп Даврон Мерганов билан мулоқот қиламан.
— 2023 йилда сиз U-20 Осиё Кубоги чемпиони бўлдингиз ва мусобақанинг энг яхши дарвозабони деб топилдингиз. Асосий ютуқларингизга эришиб бўлдингиз, деб ҳисоблайсизми?
— Менимча, асосий ютуқлар ҳали олдинда. Осиё Кубоги — ўтган босқич. Энди олдинга интилиб, янги мақсадлар сари ҳаракат қилиш керак.
Шу билан бирга, Ўзбекистон футболида яратилаётган шароитларни ҳам кўриб турибмиз — янги майдонлар қурилмоқда, футболчилар учун имкониятлар кенгаймоқда. Бу эса меҳнат орқали катта натижаларга эришиш мумкинлигини кўрсатади. Энг муҳими — ўз устида ишлаш.
— Ушбу мавсумда клуб раҳбарияти жамоа олдига қандай вазифалар қўйган?
— Жамоамиз ёш, аммо салоҳияти юқори. Ҳар бир учрашувда ғалаба учун майдонга чиқамиз. «Сурхон»да ёш футболчиларга катта эътибор қаратилаётганини аввалдан билардим. Бу ҳам қароримга таъсир қилди. Қўйилган мақсадлар максимал даражада юқори.
— Қайси машҳур дарвозабоннинг ўйинини кузатишни ёқтирасиз?
— Аввало, Мануэль Нойернинг ўйинини кузатаман. У кўп йиллар давомида юқори даражани ушлаб келмоқда. Ўйин услуби жиҳатидан эса Тибо Куртуа менга яқин, чунки у ҳам баланд бўйли. Унинг ҳаракатларидан дарвозабон учун зарур жиҳатларни ўрганишга ҳаракат қиламан.
— «Сурхон» мухлисларига тилакларингиз?
— Ҳар бир ўйинда мухлисларни хурсанд қилишни истаймиз. Биз катта масъулиятни ҳис қиламиз, чунки бутун Сурхондарё биздан натижа кутади. Мухлисларнинг ишончи ва қўллаб-қувватлаши жуда муҳим. Ҳар бир учрашувда бор кучимизни сарфлашга ҳаракат қиламиз.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
