Qishki transfer davrida "Surxon" klubi safiga o‘tgan Otabek Boymurodov klub matbuot xizmatiga intervyu berdi.
— Otabek, avvalo «Surxon» taklifi qanday paydo bo‘ldi va nega aynan ushbu klubni tanladingiz?
— Menga jamoa bosh murabbiyi Stanislav Petrovich qo‘ng‘iroq qildi. U mening faoliyatim rivoji uchun istiqbolli deb hisoblagan loyiha haqida ma’lumot berdi. Shuningdek, bu shahar men uchun begona emas — onam Surxondaryoda tug‘ilib, shu yerda voyaga yetgan.
— Siz mamlakatimizdagi eng yaxshi yosh darvozabonlardan biri sifatida e’tirof etilmoqdasiz. Shu bilan birga, «Surxon» safida yosh posbonlar — Dilshod Yo‘ldoshev va Davron Merganov ham bor. Raqobatga munosabatingiz qanday?
— Men sog‘lom raqobatni ijobiy qabul qilaman. Raqobat insonni har kuni o‘sishga va rivojlanishga undaydi. Dilshod va Davronni yaxshi bilaman, ularni hurmat qilaman — ikkalasi ham kuchli darvozabonlar. Men ulardan yoshroqman, ammo bu katta ahamiyatga ega emas. O‘ylaymanki, bir-birimizdan ko‘p narsa o‘rganamiz.
— Jamoadagi muhit qanday va kimlar bilan tezroq til topishdingiz?
— Jamoada muhit yaxshi. Yigitlarning aksariyati bilan avvaldan tanishman, turli jamoalarda birga o‘ynaganmiz. Qolganlari bilan ham tanishib oldim. Ayni paytda eng ko‘p Davron Merganov bilan muloqot qilaman.
— 2023 yilda siz U-20 Osiyo Kubogi chempioni bo‘ldingiz va musobaqaning eng yaxshi darvozaboni deb topildingiz. Asosiy yutuqlaringizga erishib bo‘ldingiz, deb hisoblaysizmi?
— Menimcha, asosiy yutuqlar hali oldinda. Osiyo Kubogi — o‘tgan bosqich. Endi oldinga intilib, yangi maqsadlar sari harakat qilish kerak.
Shu bilan birga, O‘zbekiston futbolida yaratilayotgan sharoitlarni ham ko‘rib turibmiz — yangi maydonlar qurilmoqda, futbolchilar uchun imkoniyatlar kengaymoqda. Bu esa mehnat orqali katta natijalarga erishish mumkinligini ko‘rsatadi. Eng muhimi — o‘z ustida ishlash.
— Ushbu mavsumda klub rahbariyati jamoa oldiga qanday vazifalar qo‘ygan?
— Jamoamiz yosh, ammo salohiyati yuqori. Har bir uchrashuvda g‘alaba uchun maydonga chiqamiz. «Surxon»da yosh futbolchilarga katta e’tibor qaratilayotganini avvaldan bilardim. Bu ham qarorimga ta’sir qildi. Qo‘yilgan maqsadlar maksimal darajada yuqori.
— Qaysi mashhur darvozabonning o‘yinini kuzatishni yoqtirasiz?
— Avvalo, Manuel Noyerning o‘yinini kuzataman. U ko‘p yillar davomida yuqori darajani ushlab kelmoqda. O‘yin uslubi jihatidan esa Tibo Kurtua menga yaqin, chunki u ham baland bo‘yli. Uning harakatlaridan darvozabon uchun zarur jihatlarni o‘rganishga harakat qilaman.
— «Surxon» muxlislariga tilaklaringiz?
— Har bir o‘yinda muxlislarni xursand qilishni istaymiz. Biz katta mas’uliyatni his qilamiz, chunki butun Surxondaryo bizdan natija kutadi. Muxlislarning ishonchi va qo‘llab-quvvatlashi juda muhim. Har bir uchrashuvda bor kuchimizni sarflashga harakat qilamiz.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
