Футбол бўйича Ўзбекистон миллий терма жамоаси бош мураббийи Фабио Каннаваро Ўзбекистон футбол ассоциациясига берган интервюсида футболчиларни терма жамоага жалб қилиш ҳақида гапирди.
“Гап ёшда эмас, сифатда. Футболчининг неча ёшга киргани эмас, истеъдоди ва жангчи сифатидаги характери муҳим. Агар футболчи 17–19 ёшда тайёр бўлса, миллий жамоага чақирилиши керак. Нега уларни ёш деб, U-21 ёки U-23 жамоаларида қолдиришимиз керак? Агар бирор ўйинни кўришга борсам, бу шунчаки ташриф эмас. Мен футболчининг реал вазиятдаги ҳаракатларини ўз кўзим билан кўришни истайман. Сафарда бўлсам ҳам стадионларга боришни афзал кўраман. Ўйинни жонли томоша қилиш ўрнига уйда кетма-кет бир нечта видео кўриш мен учун зерикарли. Стадионга бориб футболчини бевосита кузатишни хоҳлайман, чунки барча майда деталларни видео орқали кўриб бўлмайди. Айнан шу майда жиҳатлар кейинчалик муҳим аҳамият касб этади”, — деди Каннаваро.
Маълумот учун, Ўзбекистон миллий терма жамоаси январ ойида Бирлашган Араб Амирликларида ўқув-машғулот йиғинини ўтказди. Ушбу йиғин давомида бош мураббий Фабио Каннаваро бир қатор янги футболчиларни синовдан ўтказди. Улар орасида дарвозабон Самандар Муротбоев ва ҳимоячи Беҳруз Каримов ҳам бор эди.
Йиғин доирасида миллий терма жамоа Хитой терма жамоаси билан 2:2 ҳисобида дуранг ўйнади, шунингдек, Арманистоннинг “Урарту” клубини 4:2 ҳисобида мағлуб этди.
Матнда хатолик топсангиз, ўша хатони белгилаб, бизга жўнатинг (Ctrl + Enter).