Футболда янги чақириқ – бу ҳамиша юқори босқичга кўтарилиш имконияти. Кот-д’Ивуар миллий жамоасининг тезкор ва техник жиҳатдан савияли қанот ҳужумчиси Симон Адингра учун ҳам «Монако» сафига қўшилиш шундай муҳим қадамлардан бири, албатта. Аниқроқ айтсак, ҳуқуқий жиҳатдан «Сандерленд»га тегишли футболчи жорий мавсум якунига қадар Франциянинг машҳур клубида ижара муддатини ўтайди. Князлик клуби бош директори Тьяго Скуро ташаббуси билан ўтказилган матбуот анжуманида иштирок этган ивуарлик вингер «Монако» лойиҳаси ҳақида самимий фикр билдириш баробарида келгуси режаларига ҳам тўхталди.
«Монако»га ўтиш варианти
– Музокара жараёнида асосан клуб лойиҳаси ҳамда унда қандай ўрин тутишим ҳақида гаплашдик. Бош мураббий Себастьян Поконьоли билан суҳбатдан сўнг эса жамоа олдига катта вазифалар, юқори марралар қўйилганини тушундим. Хуллас, «Монако» лойиҳаси жиддий қизиқиш уйғотди ва узоқ ўйлаб ўтирмай, таклифга ижобий жавоб бердим. Ўйлайманки, француз тилини мукаммал билишим янги муҳитга тез мослашишимда асқотади. Умуман олганда, клубга сифатли ёрдам бериш ва ўз имкониятимдан келиб чиққан ҳолда, энг яхши ўйинимни кўрсатиш учун келдим.
Ҳозирги жисмоний ҳолати
– Тан оламан, жорий мавсум «Сандерленд»да баъзи қийинчиликларга дуч келдим. Лекин ҳозир бор эътиборим «Монако»га қаратилган. Мақсад – клуб билан олдинга интилиш. Айни паллада ўзимни яхши ҳис қиляпман, на жисмоний ва на руҳий жиҳатдан муаммо бор. Зотан, табиатан қизиққонроқман ва футболдан лаззат олишим жуда-жуда муҳим. Бу эса ўйин амалиётига боғлиқ, албатта. Насиб этса, «Монако»да ўз салоҳиятимга нисбатан ишонч, ўйин ритми ва идеал спорт формасини тезда тиклайман.
Кейинги 6 ойлик мақсад
– Асосийси – Франция кубогида муваффақиятли иштирок этиш. Бу йўлда максимал даражада куч сарфлаб, клуб лойиҳасининг бир қисмига айланишни истайман. Мен учун устувор вазифалардан яна бири – терма жамоага қайтиш. Бу масалада Кот-д~Ивуар термаси бош мураббийи билан гаплашдим ва у «Монако»га ўтиш қароримни тўлиқ оқлади.
Франция чемпионатига мослашув…
– Лига 1 ҳақида кўп нарса биламан, чунки бу ерда бир қатор дўстларим тўп суришмоқда. Улар ўз услубим ва фазилатларим билан чемпионатда бемалол ўйнаб кетишимни айтишди. Шунингдек, турли мусобақаларда Франция клубларига қарши майдонга тушганман ва мамлакат футболи ҳақида маълум таассуротим йўқ эмас. «Монако»да кучли ижрочилар жамланишганини ҳам биламан. Янги клубдошларим мени илиқ кутиб олишди ва илк машғулотларданоқ муҳитга тезроқ тушишимда ёрдам беришди.
Вильфрид Синго ва Ансу Фати ёрдами
– Бу ерга келишимдан олдин қадрдон дўстим Вильфрид Синго ички муҳит ва клуб ҳаёти ҳақида атрофлича гапириб берди. Қарор қабул қилишда унинг фикрларини ҳам инобатга олдим, албатта. Ансу Фати билан эса «Брайтон»да бирга ўйнаганмиз, Англиядаги ҳамкорлигимиз яхши кечганди. Шундай экан, у ҳам янги жамоага тезроқ мослашишимга ёрдам беради.
М.ПЎЛАТОВ
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
