Франция терма жамоаси билан жаҳон чемпиони бўлган, Италиянинг «Ювентус» клуби тарихида ўчмас из қолдирган афсонавий ҳужумчи Давид Терезеге бугун Аргентинада яшаб, футбол лойиҳалари билан шуғулланмоқда. Шунга қарамай, туринликларнинг бугунги натижаларига ҳам бефарқ эмасдай. Чунки унинг «кекса синьора» ҳаётини ёритишга ихтисослашган jufc.ru сайтига берган интервьюсида бир вақтлар жамоани буюклик сари етаклаган қадриятлар, соддалик ва ғалабага чанқоқлик ҳисси ҳамон ўзгаришсиз қолганини пайқаш қийин эмас. Қизиғи шундаки, франциялик собиқ футболчи бугунги кунда «Юве»ни таҳлил қилишдан кўра, ундаги янги юлдузларни кузатишни афзал кўради. Хусусан, Давид ёш истеъдод Кенан Йилдизнинг салоҳиятини алоҳида таъкидлаб, турк форвардининг ўйинидаги эркинлик ва ижодкорликни юқори баҳоламоқда.
– Сир эмаски, замонавий футболда алгоритмлар, статистика ва таҳлиллар ҳақида кўп гапириляпти. Ваҳоланки, «Ювентус»дай катта клубда ўйнаган пайтларингизда ҳам спортнинг бу тури анча соддароқ эди…
– Ҳа, чиндан ҳам бугун кўпчилик мураккаб таҳлиллар ва турли схемалар ҳақида баҳс-мунозара юритади. Лекин илгари сиз айтиб ўтгандек – футбол анча соддароқ эди. Мисол учун мен «Ювентус»да жуда оддий, аммо энг муҳим қоидани ўргандим. Яъни ҳар бир учрашувда ғалаба қозониш. Чунки айнан шу нарса жамоага натижа олиб келади. Биласизми… бу йил «Юве»нинг «Ривер Плейт» устидан қитъалараро кубок финалидаги ғалабасига 30 йил тўляпти. Шу муносабат билан бу икки жамоа ўртасида рамзий ўртоқлик учрашуви ўтказилса, жуда зўр бўларди.
– Фаолиятингиз давомида «Ювентус»ни тарк этишга энг яқин бўлган давр қачон эди?
– Кўпчилик бу борада 2001 йилги воқеликларни эслайди, аммо аслида энг оғир палла 2004 йилда бўлган. Ўшанда биз раҳбарият билан шартномани узайтириш борасида келиша олмадик. Чунки бош директор Лучано Моджи клуб манфаатини қаттиқ ҳимоя қиларди. Шу пайтда мени «Барселона»га сотиш эҳтимоли ҳам йўқ эмасди. Аммо Фабио Капеллонинг ташаббуси билан жамоада қолгандим. Ростини айтсам, аввалига унинг Дон Фабионинг гапларига тўлиқ ишонмаганман, лекин охир-оқибат ҳаммаси яхшилик билан тугаганди.
– «Ювентус» билан Чемпионлар лигасини юта олмаганингиздан афсусланасизми?
– Йўқ аксинча, мен Кальчополи можаросидан кейин ҳам жамоа билан қолганимдан фахрланаман. Тўғри, мазкур воқеликлар ортидан клуб «В» Серияга тушириб юборилди ва бу мен учун спорт жиҳатдан йўқотилган бир йил бўлди. Аммо шу орқали мухлислар меҳрини қозондим. Бу эса ҳар қандай совриндан кўра қадрлироқ. Эсимда, ўша пайтда чемпионатдаги ҳар бир рақибимиз «Юве»га қарши ўйинни байрамдек қабул қилганди.
– Ўзи аслида «Монако»дан «Ювентус»га ўтишингизда кимларнинг маслаҳатига қулоқ солгансиз?
– Мен ўша пайтда асосан Зинедин Зидан ва Дидье Дешамнинг маслаҳатларига қулоқ тутганман. Шунингдек, Мишель Платини ҳам шахсан қўнғироқ қилиб, Туринга ўтиш тўғри йўл эканлигини таъкидлаган. Аммо уларнинг ҳаммаси бир гапни алоҳида уқтирганди: «Бу ерда сени фақат голларинг орқали баҳолашади». Ваҳоланки, «Монако»даги муваффақиятларимдан кейин менга айнан шундай чақириқ керак эди. Эсимда, «Юве»га кўчиб ўтган илк кунларда энг катта қўллаш Зидан томонидан бўлганди.
– Жамоадошларингизга совға бериб турармидингиз?
– «Юве» сафида 100-голимни урганимда Туриннинг Куадрилатеро туманидаги клубда катта зиёфат уюштиргандим. Энг яхши рақс тушганлар – Паоло Монтеро ва Марсело Салаета бўлган. Яна шундай унутилмас кеча Павел Недвед «Олтин тўп»ни қўлга киритганда кузатилган. Ўшанда у бутун жамоага совға улашганди. Эҳ… бу даврларда клубдаги йигитларда ўзаро ҳурмат ва дўстлик жуда кучли эди.
– Жамоада ким кўпроқ жарима тўларди, сизми ёки Каморанези?
– Албатта Мауро. У аслида «Олтин тўп» даражасидаги ўйинчи эди. Ҳозир ҳам тез-тез гаплашиб турамиз. Каморанези баъзан ҳазиллашиб, Турин касалхоналарини «Юве»да тўлаган жарималари билан молиялаштирганини айтади. Яқинда унинг мураббий сифатида иш бошлаганини эшитиб роса хурсанд бўлдим. Тўғриси, бу мен учун кутилмаган янгилик эди.
– Бугунги «Ювентус» ҳужумчилари ҳақида фикрингиз қандай?
– Бу клубнинг ўзига хос анъаналари бор ва у ерда ҳужумчилардан доим гол талаб қилинади. Очиғи, мен Душан Влаховичдан ҳозиргидан кўра кўпроғини кутгандим. Бироқ у Туринга келганига беш йилдан ошган бўлсада, ҳалигача ўзини етакчи ҳужумчи ролида намоён эта олмаяпти. Ваҳоланки, Душан «Фиорентина»да жуда яхши ўйнаган, лекин «Юве» футболкасини кийиш бутунлай бошқа даража эканлигини тушуниши керак.
– Агар сизга маълум даражада имконият берилса, ҳозирги топ-ҳужумчилардан қай бирини жамоага олиб келган бўлардингиз?
– Мен ҳеч иккиланмасдан Роберт Левандовскини танлардим. Чунки у ҳатто 37 ёшида ҳам юқори даражада ўйнай олади. Айтиш керакки, Роберт – Эрлинг Холанд каби замонамизнинг энг сўнгги ҳақиқий марказий ҳужумчиларидан бири. Агар имконият бўлганида, уни ўз қўлимда кўтариб Туринга олиб келган бўлардим.
– Янги футболчилар Жонатан Дэвид ва Лои Опенда ҳақида қандай фикрдасиз?
– Дэвидни «Лилл»да ўйнаб юрган пайтлариданоқ яхши танийман. Шуни тўғри қабул қилиш керакки, у бунгача ғалаба мажбурияти унчалик катта бўлмаган клубда камол топди. «Ювентус»га тезда мослашиш эса осон эмас. Бироқ ўйлайманки, Жонатан Италияга келгач, «А» Серияни, жамоадошларини ва Спаллеттини яхшироқ тушуниб олиш имкониятига эга бўлиб улгурди. Демак, келаси мавсумда у иккинчи имкониятга эга бўлишга лойиқ. Опендага келсак, бу йигит ҳам тезкор ва яхши ўйинчи, лекин негадир у ҳам ҳалигача ўзининг нималарга қодирлигини кўрсата олмади.
– Кенан Йилдиз ҳақида фикрингиз? Уни баъзилар ҳатто Алессандро Дель Пьерога қиёслашмоқда…
– Айтиш шарт эмас, Алессандро Дель Пьеро алоҳида даражадаги афсона. Лекин бугун мен «Ювентус» ўйинларини асосан Кенан Йилдизнинг ҳаракатларини кузатиш учун томоша қиламан. У жуда ноёб истеъдод эгаси ва йўқ жойдан имконият ярата олади. Кенан айниқса майдондан ҳамда ўйиндан завқ олади, бу эса ҳужумчи учун жуда муҳим сифат. Менимча, унга «сохта тўққизлик» роли эмас, балки классик «ўнлик» позицияси кўпроқ мос келади, айниқса чап қанотдан ҳужум бошлашда.
Хуршид ЮСУПОВ тайёрлади
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
