Аёллар ўртасидаги баҳсларда хитойлик Жу Жинер (7,5 очко) бронза, Бибисора Ассубаева (8 очко) кумуш медални қўлга киритди. Ҳиндистонлик Ваишали Рамешбабу (8,5 очко) турнир ғолиби бўлди ва Жаҳон чемпионлиги учун хитойлик Жу Венжунга қарши баҳсда иштирок ҳуқуқини қўлга киритди.
Эркаклар иштирокидаги турнирда америкалик Фабиано Каруана (7,5 очко) бронза, нидерландиялик Аниш Гири (8,5 очко) эса кумуш медалга сазовор бўлди. Ўзбекистонлик гроссмейстер Жавоҳир Синдоров мусобақа тарихида энг кўп ғалаба (6 та) ва энг юқори очкони (10 очко) қўлга киритган ҳолда турнир якунланишига бир тур қолганда чемпионликни қўлга киритди. Унинг шарафига Ўзбекистон мадҳияси янгради.
“Мен жуда бахтиёрман. Бу мусобақада ғолиб бўлиш ҳар қандай шахматчининг орзусидир. Бу йўл жуда оғир бўлди. Биринчи навбатда давлатимизга, жамоамга, ҳомийлар ва мени қўллаб-қувватлаган барчага миннатдорлик билдираман. Турнир жуда ажойиб ва эсда қоларли тарзда ўтди. Бу ерда биз истаган ҳамма нарса бор эди. Ташкилотчиларга ҳам фантастик муҳит учун ташаккур. Видео ўйинлар ва падл (теннисга ўхшаш спорт тури) ўйнашга ҳам вақт топилди. Келажакда шундай шароит яратилган ҳар қандай турнирда иштирок этган бўлардим”, деди Жавоҳир Синдоров тақдирлаш маросимидаги нутқида.
Шунингдек, Ўзбекистон президенти Шавкат Мирзиёевнинг Жавоҳир Синдоров билан телефон орқали мулоқоти акс этган видео намойиш этилди.
Манба: daryo.uz
Киритилди: 06:54, 17.04.2026. Ўқилди: 482 марта. Фикрлар: 0 та.