Европа Чемпионлар Лигаси – қитъанинг энг нуфузли клублар турнири. Деярли барча футболчилар ушбу мусобақада ғалаба қозонишни орзу қилади, аммо бу чўққини забт этиш ҳаммага ҳам насиб этавермайди. ЕЧЛда порлаётган, голлар уриб, жамоасини ғалабалар сари бошлаётган бўлса-да, ҳалигача асосий совринга ета олмаётган футболчилар бор.
Stadion.uz ЕЧЛда ғолиб бўлишга лойиқ, аммо ҳали бу бахтга эриша олмаган 7 нафар амалдаги футболчини санаб ўтади.
Килиан Мбаппе («Реал»)
Мбаппе — ЕЧЛ юлдузлари ҳақида гап кетганда биринчи бўлиб хаёлга келадиган исмлардан бири. Унинг ҳисобида турнир тарихидаги олтинчи кўрсаткич бўлган 70 та гол бор. Шу билан бирга, Килиан бунча кўп гол уриб, ҳали бирор марта кубокни боши узра баланд кўтармаган ягона футболчидир.
Франциялик ҳужумчи жаҳон чемпиони бўлса-да, ЕЧЛда зафар қучмаган. Унинг ягона финалида «ПСЖ» 2020 йилда «Бавария»га имкониятни бой берган. 2024 йил ёзида Мбаппе айнан ЕЧЛда ғолиб чиқиш учун «Реал»га ўтди, бироқ ҳозирча бу мақсадга эришиш қийин кечмоқда: у келганидан сўнг «қаймоқранглилар» икки бор чорак финал босқичида мусобақани тарк этди.
Ламин Ямал («Барселона»)
Ямал «Барселона» билан икки карра Испания чемпиони ва Евро-2024 ғолиби ҳисобланади. Унинг ҳисобида ЕЧЛда урилган 11 та гол ҳам бор. Ламиннинг атиги 18 ёшда эканини ҳисобга олсак, бу ҳайратланарли натижа.
Унинг фаолияти юксалаётган даврда каталонияликлар ўтган мавсумда ярим финалгача, жорий мавсумда эса чорак финалгача етиб боришди. Ёш испанияликка порлоқ келажак башорат қилинмоқда, аммо у тарихдаги энг яхшилар қаторидан мустаҳкам жой олмоқчи бўлса, ЕЧЛ кубоги унинг ютуқлари рўйхатида бўлиши шарт.
Рафинья («Барселона»)
Ўтган мавсум Рафинья фаолиятидаги энг яхшиси бўлди — барча турнирларда 57 ўйинда 34 гол ва 26 голли узатма. Ўшанда бразилиялик футболчи 14 ўйинда 13 та гол уриб, ЕЧЛнинг энг яхши тўпурарларидан бирига айланганди. «Барселона»га ўтгунча ЕЧЛда умуман ўйнамаганини инобатга олсак, бу ажойиб кўрсаткич.
Жорий мавсумда Рафинья жароҳатлар туфайли бешта ўйинни ўтказиб юборди ва ҳисобига атиги 3 та гол ҳамда 3 та ассист ёздириб қўйди. Соғлом ҳолатда Рафинья, шубҳасиз, ЕЧЛда муваффақиятга лойиқ бўлган дунёнинг энг кучли ўйинчиларидан биридир.
Харри Кейн («Бавария»)
Кейн — дунёнинг энг яхши форвардларидан бири. Унинг фаолиятидаги 500 дан ортиқ голлари, «Тоттенхэм» афсонаси мақоми ва ҳақиқий профессионал сифатидаги обрўси бор. Харри майдонда қанчалик кўп меҳнат қилиши ва жамоасига фойда келтиришини ҳисобга олсак, у ЕЧЛда ғалаба қозонишга ҳаммадан кўра кўпроқ ҳақли.
2023 йил ёзида инглиз ҳужумчиси совринлар илинжида «Бавария»га ўтди. Қизиғи шундаки, у ЕЧЛ финалида «Тоттенхэм» таркибида ўйнаган (2019 йил). Ўшанда «шпорлар» «Ливерпуль»га ютқазган, аммо Кейн Мюнхен клубида асқатиши мумкин бўлган катта тажриба тўплаган. «Бавария» билан у чорак финал ва ярим финалгача борди. Финалга қайтиш вақти келди, бироқ йўлда жиддий тўсиқ — турнирнинг амалдаги ғолиби турибди.
Деклан Райс («Арсенал»)
Райс Европанинг энг яхши таянч ярим ҳимоячиларидан бири — «Арсенал» 2023 йил ёзида у учун «Вест Хэм»га 116 миллион евро тўлагани бежиз эмас. «Канонирлар» таркибида Деклан ўз мақомини янада мустаҳкамлади ва 2023/24 йилги мавсумда ЕЧЛ рамзий терма жамоасидан жой олди.
Деклан «Арсенал»га «Вест Хэм» билан Конференциялар Лигасида ғолиб чиққандан сўнг ўтди. У лондонликларнинг еврокубокларда ғолиблик тажрибасига эга кам сонли ўйинчиларидан бири. Райс ЕЧЛ даражасидаги футболчи, аммо унинг клуби бу турнирда муваффақият қозонишга тайёрми? Ҳозирча «Арсенал» фаворитлар қаторида саналмоқда.
Лаутаро Мартинес («Интер»)
Мартинеснинг даражасига турлича баҳо беришади. Аммо у икки бор финалда ўйнаганини ҳисобга олсак, ЕЧЛда ғолиб бўлишга лойиқ эмаслигини айтиб бўлмайди. Аргентиналик ҳужумчи ЖЧ-2022да кам гол ургани учун кўп танқид қилинганди, бироқ шундан сўнг у клуб даражасида янги босқичга чиқди.
Мартинес «Интер» билан 2023 ва 2025 йилларда финалга чиқди, 2024 йилда эса А Сериянинг энг яхши ўйинчиси деб топилди. Иккала финалдаги мағлубият Лаутаро учун аламли бўлди. Бошқа томондан, бу учинчи уринишда ниҳоят мақсадга етишиш ва «Интер» афсонасига айланиш учун кучли мотивация бўлиши мумкин.
Бруну Фернандеш («Манчестер Юнайтед»)
АПЛнинг энг яхши ўйинчиларидан бири бўлган Фернандеш сўнгги йиллардаги муаммоларга қарамай «Манчестер Юнайтед»га содиқ қолмоқда. «МЮ» сафидаги олти йил давомида Бруну фақат Англия Кубоги ва Лига Кубогини қўлга киритди. Бундай даражадаги ўйинчи учун бу жуда кам.
Португалиялик футболчи ҳали бирор марта манкунианликлар билан АПЛ чемпионлиги учун жиддий курашмади, ЕЧЛда эса фақат 1/8 финалгача етиб борди. ЕЧЛда катта ғалабалар тажрибаси йўқлигига қарамай, Фернандеш ўз маҳорати билан ушбу турнирда зафар қучишга лойиқ. Балки бу ёзда ўз келажаги борасида қарор қабул қилишда ушбу омил ҳал қилувчи аҳамият касб этар.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
