Эдин Жеко Босния ва Герцеговина терма жамоасидаги фаолиятини якунлашини маълум қилди.
40 ёшли «Шальке» ҳужумчиси бу қарорини ижтимоий тармоқларда эълон қилди. Жеконинг миллий жамоа сафидаги сўнгги ўйини 2 октябрь куни Миллатлар лигасида Швецияга қарши уй учрашуви бўлади.
«Фаолиятим давомида ҳар сафар ушбу футболкани кийганимда ҳис қилган ғурурим билан ҳеч нарсани тенглаштириб бўлмайди. Ҳеч нарсани. Бу болаликдаги орзуим эди. Мен бу орзумни мамлакатим шарафини ҳимоя қилган 151 та ўйиннинг ҳар бирида ўзим билан олиб юрдим. Ҳар сафар биринчи мартагидек фахрландим.
Туркияга қарши ўша ўйиндан бери қарийб йигирма йил ўтди. Кўп нарса ўзгарди, жумладан мен ҳам, аммо бу футболкага бўлган муҳаббатим ўзгармади. Энди четга чиқиш вақти келганини ҳис қиляпман. Агар терма жамоада 40 ёшимгача ўйнаган бўлсам, бу ҳар сафар ўзимни тўлиқ бағишлаганим учун. Ҳар сафар...
Мамлакатингиз учун ўйнаш — футбол менга тақдим этган энг ҳис-туйғуга бой имконият. 2014 йилдаги илк жаҳон чемпионатимизга йўлланмани қўлга киритиш футболчи сифатида ҳаётимдаги энг бахтли лаҳзалардан бири бўлиб қолади. Ўша оқшом Уэльсга қарши гол урганимда, кейин эса март ойида Зеницада Италияга қарши ўйинда ҳис қилган туйғуларим қалбимда абадий қолади. Юртдошларимизнинг шаҳарларимиз кўчаларида ғалабани нишонлаётганини кўриш — футбол менга берган яна бир беқиёс туҳфа бўлди.
Мен билан бирга бўлган ва бу ажойиб сафар давомида мени қўллаб-қувватлаган барча инсонларга миннатдорчилик билдириш учун ҳали вақт бўлади. Ҳозирча эса Швецияга қарши ўйинда ҳам ёнимда бўлишингизни истайман, токи ҳис-туйғуларимизни яна бир бор бирга баҳам кўрайлик. Чунки бу ажойиб лаҳзаларнинг ҳар бирини биз бирга бошдан кечирдик. Мамлакатим шарафини ҳимоя қиладиган сўнгги оқшомимни ҳам айнан шундай ўтказишни хоҳлайман: сизлар билан бирга, болалигимдан севган ва бутун умрим давомида севиб қоладиган футболкамни кийиб», — деб ёзди Жеко.
Жеко Босния ва Герцеговина терма жамоаси сафида 2007 йилдан бери ўйнаб келади. У 151 та ўйинда 73 та гол урган. Ҳужумчи миллий жамоа таркибида икки марта — 2014 ва 2026 йиллардаги жаҳон чемпионатларида иштирок этган.
Матнда хатолик топсангиз, ўша хатони белгилаб, бизга жўнатинг (Ctrl + Enter).