Edin Jeko Bosniya va Gersegovina terma jamoasidagi faoliyatini yakunlashini ma’lum qildi.
40 yoshli «Shalke» hujumchisi bu qarorini ijtimoiy tarmoqlarda e’lon qildi. Jekoning milliy jamoa safidagi so‘nggi o‘yini 2 oktyabr kuni Millatlar ligasida Shvesiyaga qarshi uy uchrashuvi bo‘ladi.
«Faoliyatim davomida har safar ushbu futbolkani kiyganimda his qilgan g‘ururim bilan hech narsani tenglashtirib bo‘lmaydi. Hech narsani. Bu bolalikdagi orzuim edi. Men bu orzumni mamlakatim sharafini himoya qilgan 151 ta o‘yinning har birida o‘zim bilan olib yurdim. Har safar birinchi martagidek faxrlandim.
Turkiyaga qarshi o‘sha o‘yindan beri qariyb yigirma yil o‘tdi. Ko‘p narsa o‘zgardi, jumladan men ham, ammo bu futbolkaga bo‘lgan muhabbatim o‘zgarmadi. Endi chetga chiqish vaqti kelganini his qilyapman. Agar terma jamoada 40 yoshimgacha o‘ynagan bo‘lsam, bu har safar o‘zimni to‘liq bag‘ishlaganim uchun. Har safar...
Mamlakatingiz uchun o‘ynash — futbol menga taqdim etgan eng his-tuyg‘uga boy imkoniyat. 2014 yildagi ilk jahon chempionatimizga yo‘llanmani qo‘lga kiritish futbolchi sifatida hayotimdagi eng baxtli lahzalardan biri bo‘lib qoladi. O‘sha oqshom Uelsga qarshi gol urganimda, keyin esa mart oyida Zenisada Italiyaga qarshi o‘yinda his qilgan tuyg‘ularim qalbimda abadiy qoladi. Yurtdoshlarimizning shaharlarimiz ko‘chalarida g‘alabani nishonlayotganini ko‘rish — futbol menga bergan yana bir beqiyos tuhfa bo‘ldi.
Men bilan birga bo‘lgan va bu ajoyib safar davomida meni qo‘llab-quvvatlagan barcha insonlarga minnatdorchilik bildirish uchun hali vaqt bo‘ladi. Hozircha esa Shvesiyaga qarshi o‘yinda ham yonimda bo‘lishingizni istayman, toki his-tuyg‘ularimizni yana bir bor birga baham ko‘raylik. Chunki bu ajoyib lahzalarning har birini biz birga boshdan kechirdik. Mamlakatim sharafini himoya qiladigan so‘nggi oqshomimni ham aynan shunday o‘tkazishni xohlayman: sizlar bilan birga, bolaligimdan sevgan va butun umrim davomida sevib qoladigan futbolkamni kiyib», — deb yozdi Jeko.
Jeko Bosniya va Gersegovina terma jamoasi safida 2007 yildan beri o‘ynab keladi. U 151 ta o‘yinda 73 ta gol urgan. Hujumchi milliy jamoa tarkibida ikki marta — 2014 va 2026 yillardagi jahon chempionatlarida ishtirok etgan.