Аввал хабар қилганимиздек, 10 декабрда пойтахтимиз Тошкентда тўпланиб, тиббий кўрикдан ўтган “Насаф” футболчилари айни кунларда Қарши шаҳрида янги мавсумга тайёргарликни бошлаб юборишган.
Жамоа машғулотларни кунига икки маҳалдан клуб базасида, “Марказий” стадионда жойлашган машғулотлар майдонида давом эттирмоқда. Таркибдаги ўзгаришларга тўхталадиган бўлсак, ҳозирда ўтган мавсумда жамоа таркибида ҳаракат қилган барча футболчилар машғулотларда қатнашишмоқда. Иккинчи даврада жароҳат олиб, маълум муддатга сафдан чиққан Шоҳруҳ Гадоев ва Эркин Бойдуллаев ҳам индивидуал тарзда машғулотларни бошлашган. Шунингдек, ўтган мавсумда ижара асосида “Динамо” ва “Қизилқум”да тўп тепган Нодир Санақулов ва Элдор Бойматов ҳам жамоа билан бирга. Қолаверса, ўтган мавсумда ўринбосарлар таркибида ҳаракат қилган дарвозабонлар Убайдулла Алоханов, Алибек Туропов, ҳимоячи Тоҳир Абдураззоқов, ярим ҳимоячи Нажмиддин Номуродов ҳам асосий таркиб аъзолари билан машғулотларни ўтказишмоқда.
Қаршиликлар Янги йилга қадар Қаршида машғулотларни давом эттиришади ва январь ойида илк хорижий йиғинни Туркияда ўтказишади.
Матнда хатолик топсангиз, ўша хатони белгилаб, бизга жўнатинг (Ctrl + Enter).