Республика қиличбозлик федерацияси йил якунларини сарҳисоб қилди, ҳамда спортчи ва мураббийлар ўртасида энг яхшиларини номини айтди.
- Жуда кўп ташкилий ишлар бўлиб ўтди, - дейди ўз чиқишида FFU раиси Собиржон Рўзиев. – Ҳудудий бўлинмаларни кучайтиришга катта эътибор қаратилмоқда. Мутахассисларимиз жойларда таъсис ҳужжатларни тайёрлашга, федерация филиаллари раҳбарларини танлаш учун конференциялар уюштириш мақсадида деярли барча вилоятларда бўлишди. Агар олдин қиличбозлик марказлари сифатида Тошкент шаҳри, Андижон, Самарқанд ва Навоий вилоятлари эътироф этилган бўлса, ҳозирда республика чемпионатлари, Ўзбекистон кубоги ва бошқа турнирларда Бухоро ва Қўқон вакиллари ҳам қатнашмоқда. Қаршида, Урганч, Наманган ва Гулистондаги болалар-ўсмирлар спорт мактабларида, олимпия захиралари коллежлариида махсус бўлинмалар очилган. Сурхондарёда, пойтахт ҳудудида секциялар иш бошлади. Уларнинг барчаларига керакли инвентарь спорт кийими, жиҳозлар етказилди. Бу ҳали кўринмаётган ишлар, аммо албатта яқин келажакда, балки кейинги йилиёқ ўз меваларини беради.
Собиржон Собитович ушбу спорт турини ривожлантиришдаги айрим муаммолар ҳақида ҳам гапирди. Жумладан, малакали мураббийлар етишмовчилиги сезилмоқда. Шу сабабли Халқаро қиличбозлик федерацияси кўмагида мана икки йилдирки, Тошкентда ушбу соҳанинг маҳоратли мутахассислари - кўпкарра олимпия чемпионлари Александр Романков, Виктор Кровопусков, Польша, Руминия, Латвия экспертлар иштирокида семинарлар ва маҳорат дарслари уюштирилди. Таъкидлаш жоизки, таъмирдан чиққан ва Марказий Осиёда энг яхши ҳисобланган махсус залда ташкил этилган тренингларда қитъанинг йигирмадан ортиқ давлат вакиллари, хусусан Австралия ва Янги Зеландия мутахассислари ҳам малака оширди.
Бугун ўзига хос анъанага эга бўлган ўзбек қиличбозлик мактаби яна равнақ топмоқда. Натижалар ҳам шундан далолат беради. Қарийб йигирма йил танаффусдан сўнг олимпия қиличбозлик йўлагига бизнинг юртдошимиз чиқди. 2012 йили Лондондаги Олимпиадада Руслан Кудаев муносиб қатнашди.
Пешқадамларга муносиб ўринбосарлар ҳам етишиб чиқмоқда. Бу йил Осиё биринчилигида Малика Ҳакимова ғолиб бўлди. Гулмира Зиёева ва Роман Александров ҳам Шанхайдаги нуфузли турнирда омадли иштирок этди. Кадетлар Марселдаги жаҳон кубоги босқичида дебют қилди.
Узоқ йиллардан бери илк бор Тошкентда халқаро турнир – Франциянинг Ўзбекистондаги элчиси кубоги учун мусобақа ташкиллаштирилди. Мусобақада Франция қилиқбозлик федерацияси раиси Фредерик Петрушка бошчилигида французлар жамоаси ташриф буюрди. У ўзи билан болалар анжомлари ва бошқа ўқув-машғулотларига керак бўладиган инвентарлардан иборат совғалар олиб келди. Турнир давомида икки мамлакат қиличбозлик федерациялари ўртасида ҳамкорлик ўрнатиш бўйича келишув имзоланди. Ёш ўзбекистонликлар жавоб ташрифи билан у ерда бўлиб қайтишди. Француз тенгдошлари билан ўқув-машғулот йиғинларини ўтказишди.
Ҳудди шундай икки томонлама меморандумлар Швеция, Италия, Россия, Украина федерациялари билан ҳам имзоланди.
Таъкидлаб ўтиш жоизки, Миллий олимпия қўмитасида давлатимиз раҳбарининг 2013 йил 25 февралда қабул қилинган “Ўзбекистон спортчиларини 2016 йилда Рио-де-Жанейро (Бразилия)да бўлиб ўтадиган ХХХI ёзги Олимпия ва XV Паралимпия ўйинларига тайёрлаш тўғрисида”ги қарори ижросини таъминлаш бўйича қиличбозлик федерацияси амалга оширган ишларни самарали, деб баҳолади. Бунда Андижонда ўз ичига 50 та ўринли меҳмонхонани олган махсус қиличбозлик мажмуасини қурилиши учун барча ҳужжатлар тайёрлиги инобатга олинди. Ушбу лойиҳанинг смета қиймати – 4,5 млрд сўмни ташкил қилади. Мазкур марказнинг қурилиши ишлари 2014 йил охирига келиб якунланади. Навоийдаги базани ҳам реконструкция қилиш ва бошқа вилоят марказларидаги залларни ҳам капитал таъмирлаш режалаштирилган. Бекобод металлургия комбинати ва Ташқи иқтисодий алоқалар ва инвестиция Вазирлиги кўмагида ушбу олимпия спорт турининг моддий-техник базаси мустаҳкамланмоқда.
Келгуси мавсумга мураббийлар кенгашининг тақвим режаси тасдиқланди ва унга кўра, асосий мусобақа Инчеондаги (Жанубий Корея) Осиё ўйинлари бўлади.
Тадбир якунида йилнинг энг яхшилари – мураббийлардан Ирина Васильева ва Шавкат Турдиқулов, спортчи Руслан Кудаев махсус совғалар билан тақдирланди.
Тимур Низаев
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
