Март ойи ўрталари эди. “Арена” эшиттиришининг навбатдаги сонларидан бирида телефон орқали боғланган мухлислардан бири чиқиб, “шу Қосимов масаласини муҳокама қилмасак бўлмайдими. Бир неча ойдан бери гапирилади. Бирибир фойдаси йўқ. Жонга ҳам тегиб кетди бу масала. Футболда ундан бошқа муҳокама этадиган мавзу қолмадими?”, дея сўраб қолди. Ўз ўрнида мен унга ўша кунги “Арена”нинг мавзусини эслатдим: “Бунёдкор”нинг Осиё чемпионлар лигасидаги иштироки!
Мавзу шу бўлгандан кейин жамоанинг бош мураббийи ҳақида мухлисларнинг гапларини тўсиб қўя олмаймиз. Бунинг устида бош мураббий миллийда ҳам ишласа! БААни енга олмаган пайтимизда “Бунёдкор”да ҳам ишлар юришмай қолди. Табиий, мухлислар учун бу икки мавзу қайноқ бўлади. Ўша куни мавзуни Қосимов номини тилга олмасдан давом эттиришга уриниб кўрдим. Футбол мухлисларининг аксарияти “Миржалол Қосимовнинг икки жойда ишлаши бир-бирига халақит беради”, деган фикрда собит қолишди.
Мана энди Миржалол Қосимов “Бунёдкор”ни тарк этар экан, унинг исми шарифи ОАВда энг кўп тилга олинади. Агарда бизда ҳам кимдир буни ҳисобга олса, апрелнинг биринчи ўн кунлигида Қосимов номи топ ўнталикка киришига шубҳа йўқ. Бундан кейин ҳам Миржалол ака ҳақида кўп гаплар ёзилади. Ҳозир ёзилаётган сатрлар ҳам шулар жумласидан. “Бунёдкор”нинг 2014 йилги мавсумга тайёргарлигига бошчилик қилган, жамоада катта қудратга эга бўлган мураббийнинг кетиши бироз ғайритабиийдек туюлмоқда. Клуб расмий сайтида бу футболимиз раҳбариятининг талаби билан бўлгани изоҳланган. Қизиқ, футболимиз раҳбарияти бунданда муҳим даврларда нега шундай талабни қўймаган экан?
2012 йил 4 июнь куни миллий терма жамоани қабул қилиб олганида Қосимов ва “Бунёдкор” ОЧЛда яхши иштирок этаётганди ва ўша йилда иккала томонни ҳам бирдек олиб боришига розилик билдирилди. Лекин, 2013 йилги мавсумдаги ўйинлар (ЖЧ саралашлари, плей офф) ҳозиргилардан мингчандон муҳим эдику! Нега ўша пайт футболимиз раҳбарияти Қосимовга шундай талабни қўймади? Балки, бу иш бир йил аввал қилинганида ҳозир Қосимов терма жамоа билан мундиалга тайёргарлик кўраётган, яна аллақайси мураббий “Бунёдкор” билан гуруҳда етакчилик қилаётган бўлармиди...
Қосимовнинг “Бунёдкор”дан кетишини кўпчилик Инчеондаги Осиё ўйинларида иштирок этадиган термага ҳам унинг раҳбарлик қилиши билан боғлашмоқда. Агар шундай бўлса Жанубий Кореяда ўтадиган мусобақа 1994 йилги Осиё ўйинларидан 20 йилдан сўнг такрорланмоқда ва бу юбилейга терма жамоамиз совға ҳозирлаши керак. Хуллас, Миржалол Қосимов олдида яна бир уддаланиши қийин вазифа кўндаланг бўлди. ФИФА ёки ОФКнинг тақвимидан ўрин олмаган ушбу мусобақани ютиш учун Қосимов “Бунёдкор”ни бой бермоқда. Бу гапларни ҳали ЎФФ расман тасдиқламади, агар тақдиғини топадиган бўлса, Шуҳрат Мақсудовнинг мураббийликдаги авторитети нима бўлади? Уммондаги Осиё чемпионатида муваффақиятсизликдан сўнг ҳам лавозимини сақлаб қолган Мақсудовнинг шогирдлари Осиё ўйинларида ҳам қатнашиши табиий.
Ўзбекистон футбол федерациясининг бугунги ривожланган ахборот майдонида ягона маълумот тарқатувчи манбаси ҳисобланган Твиттердаги саҳифасида “Қосимов 2015 йилги Осиё Кубоги стартигача фақат миллий терма жамоа бош мураббийи сифатида фаолиятини давом эттиради” деб ёзиб ўтилган. Твиттердаги бу гапларга ишонсак, юқоридаги муҳолазаларимиз ўз кучини йўқотади. Лекин, твиттер барибир твиттерда, у расмий бўладими, норасмийми, сайт эмас, ижтимоий тармоқ!
Масаланинг яна бир томони бор. Миржалол Қосимов бошчилигидаги миллий терма жамоа олдида Осиё кубогида аввалгидан кўра яхши натижага эришиш, ҳеч бўлмаганда аввалгисини яхшилаш вазифаси турибди. Ғурур ва ор учун ҳам футболчи ва мураббийлар буни қилишлари керак, юқоридан ҳеч ким вазифа қўймаган тақдирда ҳам. Шундай экан, Қосимовнинг миясини энди Осиё ўйинлари билан чалғитмаслик керак!
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
