«Боруссия» Скрипникка қарши
Бугун оқшом Бременда ўтадиган ўйин дортмундликлар учун ниҳоятда муҳим аҳамият касб этиши мумкин. Зеро бу ўйиндаги ғалаба Клопп шогирдларини хавфли зонадан олиб чиқиб кетиши аниқ. Ҳарҳолда, Чемпионлар Лигасида юришни давом эттираётган клуб учун миллий биринчиликдаги бу ўрин муносиб эмас... Фақат бунинг учун энг аввало украиналик мутахассис бошқаётган «Вердер»ни енгиш, қолаверса, «Штутгарт» ва «Гамбург» клубларининг очко йўқотишларини кутиш лозим. Юрген Клоппнинг фикрича, «Боруссия» ҳали «чўккани йўқ» ва жамоада курашиш учун имконият етарлича. Ҳеч кимга ўхшамаган мураббий шунчалик ўзига ишонадики (эҳтимол, бунинг аксидир?), ҳатто Вайденфеллердек дарвозабонни заҳирага ўтқазиб, 26 ёшли австралиялик Лангеракка ишонмоқда. Бу жуда қизиқ... Лекин бошқа томондан қаралса, дортмундликларни учинчи ўриндан бор-йўғи 12 очко ажратиб турибди. Агар Клопп инқилоб қила олса, «Боруссия» ҳаммадан ўзиб кетиши ҳам мумкин. Фақат, «Бавария»ни истисно қилганда...
«Рома» стюардга қарши
Италия чемпионатидаги марказий ўйин бу сафар «Рома» устози Руди Гарсиясиз ўтади. Чунки у ўтган турда Ўйингоҳи ходими (стюард)га қўполлик қилгани учун икки ўйинга дисквалификация қилинган. Клубни эса 20 минг евро жаримага тортишди. Аммо француз мутахасасиси бундан норози: «Аслида бу ерда ҳеч нарса бўлмаганди. Мен футболчилик ва мураббийликдаги фаолиятим давомида ўзимни идеаль ҳолда тута олганман. Ўзимни оқлаш учун қўлимдан келган ҳамма ишни қиламан». Қизиқ, бу қандай иш бўлиши мумкин? Майли, нимаики бўлмасин, «Рома»-«Милан» баҳсида Гарсия бўладими-йўқми, барибир, римликлар фаворит. Бунга ҳеч ким шубҳа қилмаяпти.
«Арсенал» Стерлингга қарши
ЧЛни шармандаларча тарк этган, премьер-лигада ўзига ярашмаган 11-ўринда бораётган «Ливерпул»да ўтаётган ҳафта ўрталарида умид учқунлари пайдо бўлди. Йўқ, бу ўринда гап «қизиллар»нинг Лига кубогида қандайдир «Борнмут»ни 3:1 ҳисобида енгганида эмас. Гап шундаки, ўйинда гол ҳам урган Раҳим Стерлинг 90 дақиқада 51 (!) марта шерикларига аниқ тўп узатди. Маълумки, Брендан Рожерс - «Барселона» усули шайдоси ва яқин-яқингача унинг жамоаси ҳам «тики-така» орқали кетма-кет ғалабаларга эришиб келаётганди. Аммо ҳозир «Ливерпул»да инқироз даври - ўйин ҳам, натижа ҳам деярли йўқ ҳисоби. Хуллас, «Арсенал»га қарши ўйинда ҳамманинг умиди айнан Стерлингдан.
«Бордо» Ляказеттга қарши
Ибрагимович жароҳатини даволаш билан шуғулланаётган бир пайтда Франция миллий чемпионатидаги етакчилик 23 ёшли «Лион» ҳужумчиси Ляказеттга ўтиб кетди. Зеро у 18 ўйинда 15 марта гол урган. Миш-мишлар уни Европанинг топ-клубларига боғлай бошлаганига ҳам анча бўлди. Бироқ Ляказетт ҳозирча буларга эътибор қаратмай, фақат ўз ишини бажармоқда. «Бордо» билан кечадиган ўйинда Ляказеттни қўриқлаш билан Сане ва Паллуалара шуғулланишлари кутилмоқда. Демак, уларга ҳавас қилиб бўлмайди.
«Атлетико» «Сан-Мамес»га қарши
«Реал» ва «Барселона» ортидан шошганча қуваётган Мадриднинг «Атлетико»сини мазкур турда энг мураккаб ўйинлардан бири кутиб турибди: рақиб - «Атлетик» (Бильбао). Бильбао шаҳри қанчалик чиройли бўлса, ундаги ўйингоҳ - «Сан-Мамес» меҳмонлар учун шунчалик ноқулай ҳамдир. Чунончи, «Атлетик» ўз уйида, қадрдон мухлислари кўзи ўнгида ҳар қандай рақибни қийнаб қўйиши мумкин. Бошқачасини кутиш ҳам ноўрин аслида. Чунки бу жамоа ҳалиям енгилмас басклардан иборат.
Сизу-биз кутаётган асосий учрашувлар:
20 декабрь, шанба
«Вердер» - «Боруссия» Д. «Везенштадион» ўйингоҳи. 21.30
«Рома» - «Милан». «Стадио Олимпико» ўйингоҳи. 00.45
21 декабрь, якшанба
«Ливерпуль» - «Арсенал». «Энфилд» ўйингоҳи. 21.00
22 декабрь, душанба
«Бордо» - «Лион». «Шабан-Дельма» ўйингоҳи. 01.00
«Атлетик» - «Атлетико». «Сан-Мамес» ўйингоҳи. 01.00
Матнда хатолик топсангиз, ўша хатони белгилаб, бизга жўнатинг (Ctrl + Enter).
Андижон
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
