Златан Иброҳимович — бу футболчи ҳар доим ўзига хос интервьюлари-ю хатти-ҳаракатлари билан жамоатчилик эътиборини ўзига тортиб келади. Айниқса, унинг журналистлар билан муомаласи ҳар доим баҳс-мунозараларга сабаб бўлган. Хўш, у нега журналистларни ёмон кўради? Айб кимда, Златандами ёки журналистларда? Келинг, бу саволга жавоб топиш учун унинг айрим интервьюларига мурожаат қиламиз.
«ҲЕЧ НАРСАНИ БИЛМАСАНГ, ГАПИРМА!»
Златан Иброҳимович миллий чемпионат доирасидаги ўйинлардан бирида жароҳат олиб, маълум муддат майдонга туш олмаганди. Ўшанда журналистлардан бири уни суҳбатга чорлади.
Иброҳимович маълум муддатлик танаффусдан кейин «Лион»га қарши ўйинда майдонга тушган ва гол киритганди. Аммо журналист Златанга «Сент-Этьен» дарвозасини ишғол қилганлигини айтди. Бу факт швециялик юлдузни ғазаблантирди. Оқибатда интервью қуйидагича кўриниш касб этди:
Журналист: — Мана, икки ойлик танаффусдан кейин яна майдонга қайтдингиз. Ўзингизни қандай ҳис қиляпсиз?
Иброҳимович: — Икки ой?
Журналист: — Ҳа.
Иброҳимович: (ғалати жилмайиб): — «Сент-Этьен»га гол урдимми?
Ноқулай сукут
Иброҳимович: — Илтимос, ҳеч нарсани билмасанг, яхшиси, менга гапирмай қўя қол.
САВОЛЛАР ЎРИНЛИ БЎЛМАСА...
Яна бир интервьюсида Златан журналистни яхшигина хижолат қилди. Таъкидлаш керакки, бунда ҳам Иброҳимовични айблаб бўлмайди. Чунки журналист швециялик футболчидан Эдинсон Кавани билан муносабатлари бузилгани ҳақида сўради, Златан эса бу савол ўзига ёқмаганини яшириб ўтирмади ва интервью йўналишини тамомила ўзгартириб юборди. Интервью эса қуйидагича кўриниш олди.
Журналист: — Одамлар Эдинсон билан ўртангиздаги ёмон муносабат ҳақида кўп гапиряпти.
Златан: — Одамларми ёки сиз?
Журналист: — Матбуот билан алоқадаги кўплаб одамлар.
Златан: — Одамларми ёки сиз?
Журналист: — Мен кўпчилик билан ўртангиздаги муносабат ҳақида гаплашдим. Улар бу ҳақда салбий фикр билдиришди. Бу ёлғонми?
Златан: — Унда сиз бу ҳақда мендан кўпроқ нарса билар экансиз-ку! Яна нега сўраяпсиз?
Журналист: — Йўқ, йўқ, мен билмайман...
Златан: — Лекин бу ҳақда сиз гапиряпсиз, мен эмас.
Журналист: — Мен шундай жавоб берасиз деб тахмин қилгандим.
Златан: — Бу ҳақда фақат сиз гапиряпсиз. Мен қаердан биламан?
Журналист: — Қаердан? Айни дамда биз бу ҳақда кўп эшитяпмиз. Майдонда ҳам бирга шуғулланмаяпсизлар. Ёки бош мураббийнинг аралашуви билан алоқаларингиз яхшиландими?
Златан: — Сиз футболни мендан яхши биласизми?
Журналист: — Йўқ.
Златан: — Унда нега бу мавзуда суҳбатлашяпсиз?
Журналист: — Мен сизга савол беряпман. Ўз ишимни қиляпман.
Златан: — Сиз журналистмисиз ёки телеоператор?
Журналист: — Журналистман.
Златан: — Унда нега камера кўтариб олгансиз? Сизга алоҳида телеоператор керак эмасмиди?
Журналист: — Менинг раҳбарим... Нима десам экан?
Златан: — Демак, бунга унинг пули етмайди.
Журналист: — Ҳа.
Иброҳимович: — Кавани билан муносабатларимиз яхши. Бор гап шу.
Бу жавобларда ҳам Иброҳимовичнинг ўзига хос характери кўриниб турибди. Бундай суҳбатдан кейин бошқа журналистлар футболчи билан ўйлаб гаплашишга мажбур бўладилар.
«ОШХОНАГА КИРИНГ-ДА, ОВҚАТ ТАЙЁРЛАНГ»
2012 йил баҳорида Иброҳимович билан Массимилиано Аллегри ўртасида унинг «Милан»дан кетиши билан боғлиқ можаро келиб чиқади. Шунда журналист Вера Спадини шведциялик футболчининг бош мураббийдан нега жаҳли чиққани билан қизиқади. Ибра эса унинг саволига «Мен Аллегридан ғазабланибманми? Агар одамлар ҳеч нимани билишмаса, умуман гапирмаганлари маъқул», — деб жавоб беради. Аммо Вера яна шу мавзуга қайтавергач, Иброҳимовичнинг ғазаби қўзийди ва хунук қилиб қилиб, «Овозингни ўчирасанми ёки йўқми? Ундан кўра, ошхонага бориб, кечки овқатингни тайёрла», деб бақиради. Бироқ кейинчалик қизишиб кетганини тан олиб, Спадинидан узр сўрайди ҳамда унга чиройли гулдаста совға қилади.
МАШИНА ОСТИДА ҚОЛАЁЗГАН АЁЛ
Апеннин ярим оролида Иброҳимович журналистлар билан умуман келишмаган. Жумладан, италиялик журналист аёллардан бири Златандан интервью олмоқчи бўлади ва у келаётган машина йўлини тўсиб чиқади. Афтидан, у ноодатийроқ репортаж тайёрламоқчи бўлган. Аммо аёл машина йўлидан зўрға қочиб қолади, боиси Иброҳимович машинасини тўхтатишни хаёлига ҳам келтирмаганди.
«СИЗ ХУДОДАН СЎРАНГ»
Иброҳимович кўп гапиришни ёқтирмайдиганлар сирасига киради. Шунинг учунми, журналистлар ундан интервью олишга ҳар доим қийналади. Хусусан, ўтган йили Бразилияда бўлиб ўтган жаҳон чемпионати доирасида ўтказиладиган Швеция ҳамда Португалия ўртасидаги ўйиндан олдин журналистлардан бири швед футболчисини суҳбатга чорлайди.
Журналист: — Португалияга қарши ўйинда Швециянинг имкониятлари қандай?
Иброҳимович: — Буни фақат Худо билади.
Журналист: — Тўғри. Аммо бизни сизнинг жавобингиз қизиқтиряпти.
Иброҳимович: — Мен айтдим-ку Худо билади деб.
«THE MIRROR — МАЗХАРАБОЗ»
«The Mirror» нашри Ибрагимоч билан суҳбатни чоп этган, суҳбатдан эса швециялик футболчининг «Агар Англияга кўчиб ўтсам, Премьер-лига»да тўп сурадиган ҳимоячиларни ҳеч иккиланмай алдаб ўтаман» қабилидаги гаплари жой олганди. Бироқ ҳужумчининг ўзи бу интервью умуман бўлмаганини таъкидлади.
«Мен англиялик журналистлар билан умуман суҳбатлашмаганман, айниқса, «The Mirror» ходимлари билан. «The Mirror» шунчаки масхарабоз», — дейди Иброҳимович.
«ҚЎЛИМДАН ҚЎЛИНГНИ ТОРТ!»
Буни қарангки, Иброҳимович нафақат ўзини, ҳатто фарзандларини ҳам айрим журналистлардан узоқроқ тутаркан. Бу факт 2014 йилда ўз исботини топди. Журналистлардан бири Иброҳимовични Франция чемпионлиги билан табриклаётган пайтда тасодифан суперюлдузнинг ўғлини туртиб юборади. Бу эса Златаннинг жаҳлини чиқаради. У журналистга нафрат билан тикилиб, «Ўғлимдан қўлингизни тортинг», деб дакки беради.
Юқоридаги мисоллардан шундай хулоса чиқариш мумкин, Златандан интервью олмоқчи бўлган журналист пухта тайёргарлик кўриши керак. Чунки у журналист томонидан йўл қўйилган ҳеч бир хатога кўз юмиб кетмайди. Бир сўз билан айтганда, Златан билан бўладиган можароларнинг сабаби кўпроқ журналистларга бориб тақалади. Яна Златандан муаммомиз интервью олиш учун қуйидагилар талаб этилади: аниқ фактлар, ўринли саволлар ва суҳбатлашиш маданияти.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
