Равшан Эрматов Бразилиядаги Жаҳон чемпионати ўйинларида ажойиб тарзда ишлаб, жаҳон футбол ҳамжамиятининг эътирофига яна бир сазовор бўлгани ҳеч кимга сир эмас. У Жаҳон чемпионати ўйинларида ҳакамлик қилиш борасида рекорд ўрнатгандан кейин обрўси янада ошиб кетди.
Шуни инобатга олган ҳолда, россиялик баъзи футбол журналистлари Равшан Эрматовни Россия чемпионати ўйинларини бошқаришга таклиф қилиш ташаббуси билан чиқишди. Аммо РФИ Инспекторлар қўмитаси бошлиғи Алексей Спирин бу ғояни инкор қилиб чиқди.
“Менинг билишмча, Эрматовнинг ўзида ҳам Россия чемпионатига келиб ишлаш, қўлидан келганча ёрдам бериш истаги бўлган. Аммо биз бу масалани яқин орада умуман кўриб чиқмоқчи эмасмиз. Бизда ўзимизнинг ҳакамлар бор, уларни тарбиялашимиз керак. Бугунги кунда хориждан ҳакам жалб қилиш амалиётидан воз кечганмиз.
Эрматов – яхши йигит. Ажойиб йўриқчи. Биз уни жуда ҳам яхши биламиз. Балки қачондир келажакда бу борада ҳамкорлик қилармиз. Аммо ҳозирча уни ҳакам ёки яна бошқа йўналишда таклиф қилишни истамаймиз. У ҳали кўп ҳакамлик қилиши керак. Тўрт йилдан кейин нима бўларкин, кўрамиз. Эрматов бизда ўтадиган Жаҳон чемпионатида ишлаш учун катта имкониятга эга”, - дейди Спирин.