ФИФА 2026 йилги жаҳон чемпионатида иштирок этадиган барча 48 терма жамоанинг якуний қайдномасини эълон қилди.
Ташкилот АҚШ, Канада ва Мексика мезбонлик қиладиган ва тўққиз кундан кейин старт оладиган мундиалда қатнашувчи барча жамоаларнинг расмий рўйхатларини тақдим этди.
Тарихда илк бор жаҳон чемпионатида 48 та миллий терма жамоа иштирок этади. Қайдномаларга жами рекорд даражадаги 1248 нафар футболчи киритилган бўлиб, мусобақа доирасида 104 та учрашув ўтказилади.
Футболчиларнинг 357 нафари камида битта жаҳон чемпионатида қатнашган бўлса, 891 нафар ўйинчи учун бўлажак мусобақа дебют турнир бўлади.
ФИФА жаҳон чемпионатининг янги иштирокчиларига алоҳида эътибор қаратди. Тарихда биринчи марта Ўзбекистон, Иордания, Кабо-Верде ва Кюрасао терма жамоалари мундиалда иштирок этади. Ташкилотда таъкидланишича, турнирнинг кенгайтирилиши жаҳон чемпионатини бутун дунё футболи учун янада кенг қамровли мусобақага айлантирди.
Мундиалнинг асосий воқеаларидан бири сифатида Ўзбекистон миллий терма жамоасининг дебюти қайд этилди. ФИФА «Манчестер Сити» ҳимоячиси Абдуқодир Ҳусановни миллионлаб ўзбекистонлик мухлисларнинг орзусини рўёбга чиқаришга ҳисса қўшган ёш футболчилардан бири сифатида алоҳида эътироф этди.
Шунингдек, мусобақада бир қатор тарихий натижалар қайд этилиши мумкин. Лионель Месси, Криштиану Роналду ва Мексика терма жамоаси дарвозабони Гильермо Очоа жаҳон чемпионатларида олти марта иштирок этган илк футболчиларга айланиши мумкин.
Турнирнинг энг ёши катта иштирокчиси — Шотландия терма жамоасининг 43 ёшли дарвозабони Крэйг Гордон бўлса, энг ёш футболчи — Мексика терма жамоасининг 17 ёшли ярим ҳимоячиси Хильберто Мора ҳисобланади. Қайдномалардан 20 ёшдан кичик 22 нафар ва 40 ёшдан катта 7 нафар футболчи ўрин олган.
Иштирокчилар таркиби замонавий футболнинг глобал хусусиятини ҳам акс эттирмоқда. Жаҳон чемпионатида 71 мамлакатдан 449 та клуб вакиллари қатнашади. Қатар ва Саудия Арабистони каби айрим терма жамоалар асосан миллий чемпионат футболчиларидан ташкил топган бўлса, Конго ДР, Сенегал, Уругвай, Кот-д’Ивуар, Кабо-Верде ва Кюрасао терма жамоалари тўлиқ хорижда тўп сураётган ўйинчилардан шакллантирилган.
Мусобақа регламентига кўра, қайдномалар тасдиқланганидан кейин ўзгартишлар фақат жиддий жароҳат ёки касаллик ҳолатида, тегишли терма жамоанинг илк ўйинидан камида 24 соат олдингача киритилиши мумкин.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
