Барчангиз кечаги ўйинни, айрим ишқибозларнинг наздида, уч йилдан буён "орзиқиб" кутилган ўйиннинг "биринчи" бўлимини ҳоҳ "Стемфорд Бриджда" бўлсин, ҳоҳ телевизор орқали бўлсин, томоша қилдингиз, албатта. Агар айрим сабабларга кўра, ўтказиб юборган бўлсангиз, сизга ушбу ўйин ҳақида Дрогбанинг гол урганлигини, "Барселона" мавсумдаги расмий ўйинларда учинчи бор мағлуб бўлганлигини ва "Барселона"нинг Санчес, Фабрегас, Педро каби футболчилари имкониятлардан фойдалана олмаслик бўйича беллашаганини ёки "Стемфорд Бридж"да ўрнатилаган дарвоза тўсини ва устунларининг мустаҳкамлигини бир неча бор текшириб кўрганликларини янгилик сифатида айтиб ўтишим мумкин, холос. Қолган барчаси ўша-ўша сценарий асосида кечди: "Барса" 10 киши бўлиб ҳужум уюштиришга ҳаракат қилди, "Челси" эса 10 кишидан иборат ҳимоя қўрғони тузиб ҳимояланди. Умуман олганда, ўйиннинг илк дақиқалари яхши бошланди. Дрогбанинг икки бор ҳимоячилардан қочиб кетиб, Валдес билан бирга-бир вазиятга чиқиб боришга уринишларию, Фабрегас, Санчесларнинг Чехнинг ҳушёрлигини текшириб кўришга қаратилган ҳаракатлари - ўйиннинг ҳақиқий жанговор руҳда кечишидан далолат эди гўё. Лекин, кейинчалик "Барселона"нинг ташаббусни ўз қўлига олиши ва тўпнинг 79% назорати каталонияликлар томонига ўтиши "Челси" футболчиларини бир оз ҳушёр тортишга мажбур қилди ва олдиндан тахмин қилинганидек, "Барселона"га ташаббусни бериб қўйиш ва уларнинг хато қилишини кутиб қарши ҳужумга ўтишни маъқул кўришди. Гол ҳам айнан шундай хато оқибатида урилди: Месси майдон марказида тўпни йўқотди ва Мейрелеш Алвеш ўз ўрнига вақтида қайта олмаганлиги оқибатида чап томондан ҳужум томон бемалол ҳаракатланаётган Рамиресга тўпни аниқ тарзда етказиб берди ва Рамирес Пуйол ва Маскерано ўз ўрнига қайтиб позицияни эгаллагунча Дрогбани тўп билан таъминлади, қолгани эса "Челси" мухлисларидан ҳам кўпроқ бошқа жамоаларнинг баъзи "содиқ" ва "собиқ" мухлисларини "хурсанд" қиладиган хурсандчилик билан якун топди. Қизиғи, гол урилгунга қадар, котд-ивуарлик футболчининг фақат ва фақат йиқилиш ва оффсайдда қолиб кетиш бўйича ўзи билан пойга ўйнаганлигини қайд этиш жоиз. Унинг бу қилиқларидан хуноби чиққан МЮ ҳужумчиси Уейн Руни ўз твиттерида шундай ёзиб қолдирди: "Дрогба, сен яхши футболчисан, фақат илтимос, ўрнингдан тур!". Балки, Дрогбанинг йиқилишлари ҳам ўйинга танланган тактиканинг бир қисмидир: "Барселона" футболчиларидан тўпни олиб қўйиш ёки "Барселона"нинг тезкор ҳужум уюштирмаслиги учун тўпни ўзида сақлаб қолиш? Лекин, нима бўлган тақдирда ҳам гол каталонияликларнинг қўпол хатоси оқибатида киритилди. Иккинчи бўлим эса тўлиғича майдоннинг иккинчи ярмида, "Челси"дарвозаси жойлашган томонда кечди. "Челси" футболчиларининг иккинчи бўлимда бирор марта ҳам Валдес дарвозаси томон зарба бермаганликлари, ҳатто айрим вазиятларда ҳужумчи(!) Дрогбанинг ўз жарима майдончаси ичида рақибдан тўпни олиб қўйганлиги уларнинг ҳимояда қай даражада зич ва жипслашган ҳаолатда ўйнаганликларини кўрсатиб турибди. Ўйиндан аввал аристократлар сардори Терри: "қачондир фаолиятимни тугатганимда Мессига қарши ўйнаганман деб фахрланиб юраман" деган маънода интервью берган эди, ушбу гапни айтиб бемалол мақтаниб юриш учун эса "Челси" ҳимоячиси Тим Кейхилл ҳақлироқ бўлди, назаримда. Месси тўп билан ҳаракатланаётганида бир неча бор тўпни олиб қўйиши ва икки қаватли ҳимоя қўрғонида унинг ажойиб ўйин кўрсатганлги таҳсинга сазовор. Ҳатто ўйиндан сўнг Кейхилл : "Ундан (Месси) тўпни олиб қўя олмайсиз, ҳаттоки атрофида 4-5 киши бўлиб қўриқласангиз ҳам, шундайми? Лекин, мен шу ишни қилдим, мен ундан тўпни олиб қўйишни уддаладим" дея интервью беришга ҳам улгурди. Ўйиннинг ҳақиқий қаҳрамони сифатида эса, "Челси" дарвозабони Чехни кўрсатсам, менимча, сиз ҳам қарши бўлмайсиз. Нега деган саволга жавоб беришимни истасангиз, ўйиннинг 87 дақиқасида Пуйолнинг бош билан берган антиқа зарбасини, ақлбовар қилмас сейв билан қайтариб қолганлигини такроран кўришингизни маслаҳат бераман. Ўйин охирида Педронинг дарвоза устунини нишонга олиши ва қайтган тўпни Бускетс дарвоза ортидаги мухлисларга инъом этиши, ўйиннинг 1-0 ҳисобида "Барселона"нинг мавсумдаги 3 мағлубияти билан якун топишини белгилаб берди. Ўйиндан сўнг Гвардиола ўз интервьюсида: "Ғолиблар ҳар доим ҳақ, шундай экан биз ҳозирча ноҳақмиз!" дея таъкидлаган бўлса, "Челси"нинг вақтинчалик бош мураббийи ёки бош мураббий вазифасини бажарувчи устози Ди Маттео: "Ўйиндан аввал кўпчилик, қария футболчилар ҳеч нарса қила олмаслигини ва қисқа вақт ичида иккита қийин учрашувда ўйнай олмаслигини таъкидлашган эди, бу нафақат Дрогба балки, таркибдаги кўпчилик ёши катта футболчилар ҳақидаги танқид эди. Лекин биз кеча ҳаммасини исботладик" дея айтиб ўтди. Агар биринчи учрашувда қайд этилган ижобий натижани ва ҳужумкор ўйин кўрсатадиган жамоани тўлиқ ўйин давомида ҳимояда тартибли ўйин кўрсатишга тайёрлай олганини инобатга олсак, Роман Абрамович энди бемалол Ди Маттеонинг исмидан олдин қўшиб айтилаётган "вазифасини бажарувчи" сўзини олиб ташласа ҳам бўлади. Аслида "биринчи бўлим" якунланди, холос. Ҳали бизни олдиндан 90 дақиқалик "иккинчи бўлим" кутиб турибди. "Барселона" 37000 инглиз фанатлари олдида қайд этмаган ижобий натижани, ўз уйида - "Ноу Камп"да, 90000 каталониялик ишқибоз қаршисида қўлга киритиши лозим. Чунки, "Барселона" футболчиларнинг бу мавсумда "Ноу Камп"да ўтказилган 30 учрашувнинг 27 тасида ғалаба қозониб, 3 марта дуранг ўйнаганликлари, уларнинг ўз мухлилсари қаршисида муносиб ўйин кўрсатишидан далолат. Демак, "Челси"нинг 1-0 ҳисобидаги минимал ғалабаси уларга руҳий кўмак вазифасини ўтаса, каталонияликлар учун "ўз уйингда деворлар ҳам ёрдам беради" деган ибора руҳий устунлик бериши аниқ. Жавоб ўйинида ким ғалаба қозониши ва финал ўйинида ким иштирок этиши эса 24 апрель куни ҳал бўлади. Унгача эса, каталонияликлар 21 апрель куни "Эль-Классико" деб номланган катта спектакльда иштирок этишади.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
FC Barcelona
