Бугун нуфуз жиҳатдан қитъамизда клублар миқиёсидаги энг катта турнир саналувчиОсиё чемпионлар лигасида 4-тур учрашувларига якун ясалади.
Тур доирасидан ўрин олган бир қатор учрашувлар аллақачон якунланди. Шулар орасида Тошкентнинг “Локомотив” ҳамда Қатарнинг “Ал Садд” жамоалари ўртасида кечган беллашув анчагина муросасиз руҳда ўтди, дейиш мумкин. Боиси ҳар икки жамоа ҳам ғалаба учун қўлдан келганча ҳаракат қилди. Лекин якунда омад ғалаба қозонишни чиндан истаган “Локомотив”га насиб этди.
Бир жиҳатга алоҳида эътибор қаратишимиз лозимки, “Локомотив” учун ушбу учрашувда уч очко эмас, балки ҒАЛАБА, ғалаба бўлганда ҳам йирик ҳисобдаги ғалаба керак эди. Бундай дейишимизга бир қатор асослар бор.
Биринчидан, “Локомотив” ўтган галги беллашувда “Ал Садд”га 6:2 ҳисобида мағлуб бўлганди. Холбуки, Вадим Абрамов шогирдлари ўша учрашувда ҳам ёмон ўйин намойиш этишмаган эди. Лекин яратилган қулай имкониятлардан унумли фойдалана олмаслик ҳамда омад ўша баҳсда “темирйўлчилар” томонда бўлмаганди. Шу сабабли, ҳам бугунги баҳс “Локо” учун алоҳида аҳамиятга эга эди.
Иккинчидан, айнан ўша учрашувдан сўнг “Локомотив” юртимиздаго ОАВ томонидан кескин танқид остига олинди. Газета, журнал, сайтлар ҳамда телевидениеда “темирйўлчилар”нинг шарманда бўлганликлари, энди “Локомотив” учун ОЧЛда ҳаммаси якунлангани бот-бот таъкидланди.
Айниқса, СПОРТ телеканалида намойиш этиладиган "Футбол шарҳи" кўрсатувида "темирйўлчилар"нинг мағлубияти жуда ҳақоратомуз тарзда талқин этилганди. Зафар Имомхўжаев муаллифлигидаги мазкур кўрсатув ижодкорлари “Ас-Садд” – “Локомотив” учрашувига шарх беришаркан, лавҳага элимиз суйган санъаткор Озодбек Назарбековнинг “Юрагим-эй” номли ашуласини қўйишганди. Бу эса Вадим Абрамов бугунги учрашувдан сўнг бўлиб ўтган матбуот анжуманини тарк этиш жараёнида айтганидек, футболчилар ҳамда жамоани қаттиқ ҳафа қилган. Агар бу ҳолатга обьектив назар ташлайдиган бўлсак, “Футбол шарҳи” ижодкорлари ўша лавҳани тайёрлашда ошириб юборишганди.
Лекин бугун барчамиз гувоҳ бўлганимиздек, “Локомотив” ҳали баъзи бир журналистларимиз айтганларидек “синган” эмас экан. Бугун “темирйўлчилар” барча зоналарда бехато ўйнашди. Улар бугун кучли рақибга ҳеч бир жабҳада имкониятни бой беришмади. Катта эҳтимол билан, ўша кучли иштиёқ туфайли ҳам “Локомотив” бугун 5:0 ҳисобида чиройли тарзда ғалаба қозонди.
Кўрдик, “Локомотив”да салоҳият бор. Вадим Абрамов эса ўша салоҳиятни иштиёққа ҳамоҳанг қилишга уринмоқда. Бугун тажрибали мураббий бунинг устидан чиқди. Шогирдлари унинг ишончини оқлашди.
Умид қиламиз, “Локомотив” шу руҳда давом этади ва ҳали “синмагани”ни ҳамда “мустаҳкам” эканини бутун Осиёга намойиш этади.
Қизиқ томони, бу сафар “Футбол шарҳи” кўрсатувида мазкур учрашув лавҳасига қайси қўшиқ қўйилар экан?!
Бир тахмин қилиб кўринг-чи…!
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
