Анри, Линекер, Скоулз, Ширер, Невилл, Каррагер - Англия телевидениеси терма жамоаси жорий мавсум премьер-лиганинг ҳар қандай клубига дарс бериши мумкин. «ССФ» нашри яқин келажакнинг ажойиб юлдузларига нигоҳ ташлаб, футбол майдонидаги сермазмун фаолиятдан сўнг ўзларини экранга уришган ва Европанинг топ-чемпионати таҳлилчиси сифатида ҳам маълум ютуқларга эришган сўз усталарини ажратиб кўрсатди.
Гари ЛинЕкер (54 ёш, Англия терма жамоаси тарихидаги иккинчи энг яхши тўпурар, ЖЧ-86нинг бош голеадори)
Иш жойи: ВВС
1999 йилдан буён Британия ҳудудидаги энг машҳур таҳлилий кўрсатув - The Match of the Day (премьер-лиганинг ҳар бир турига бағишланадиган ушбу шарҳ-таҳлилий кўрсатув ҳафтанинг дам олиш кунлари оқшом пайти эфирга узатилади)ни олиб бораётган Линекер яна турли телеканалларда эксперт ролида чиқиш қилиб, йилига 2 млн. фунтдан кўпроқ даромад оляпти. Собиқ голеадорнинг таҳлилчи сифатидаги устун томонлари кўп: ўйинни яхши тушунади, тили ўткир, муҳокамаларда рўйхотирликни бир четга йиғиштириб қўяди. Мисол учун, ФИФАни ҳам кескин танқид остига олаверади: «Ташкилотда бўлаётган ҳамма ишлар - масхарабозлик ва бунинг сабабчиси - Блаттер». Шунингдек, АПЛ раҳбарияти кўп бора Линекернинг ўткир «найза»си таъмини татиб кўрган: «Премьер-лигани жаҳондаги энг кучли чемпионат ўрнида кўришни тўхтатиб, амалий ишга ўтиш керак». Гари танқидлардан ташқари, мақтовларни ҳам ўрнига қўяди ва бунда ўзига хос услублардан фойдаланади: «Месси - даҳо, шундай экан, у Роналдудан кучли», «Моуриньо шунчалик зўрки, Англия чемпионати олтин медали ва кубогини бир кунда қўлга кирита олади». Яқинда тарқалган хабарга кўра, BT Sport (BT Group телекоммуникацион корпорациясининг бир қисми) Линекерни ўз томонига оғдириб, уни ЧЛ трансляциялари «юзи»га айлантирмоқчи экан. Ҳозирча Гари бу масалада бош қотиряпти.
Сўз
- АПЛни жаҳондаги энг яхши чемпионатдек кўрсатишни тўхтатиш шарт...
Тьерри Анри (37 ёш, Европа ва жаҳон чемпиони, Франция терма жамоаси ва «Арсенал» клуби тарихидаги энг яхши тўпурар)
Иш жойи: Sky Sports
Франциялик собиқ ҳужумчи дунё бўйича энг кўп маош олувчи ТВ-эксперт ҳисобланмоқда. У 6 йиллик шартномага асосан ҳар мавсум 4 млн. фунт олади. «Фаолиятим давомида энг яхши жамоаларда тўп сурдим, энди эса энг яхши телевидение жамоасига қўшилдим», - деди Анри шартномага имзо чекиб бўлгач. Французнинг теледебюти январь ойида «Вест Хэм»-«Халл Сити» ўйинига тўғри келди ва бу «болғачилар»нинг мавсум давомида Sky Sportsда энг катта телеаудитория йиққан учрашувлари бўлди. Тўғри, Тьерри янги ролга энди-энди мослашяпти. Яъни унда ҳозирча кескинлик ва шов-шув кўтариш хусусиятлари етишмаяпти. Анри кўпинча собиқ футболчи ва «Ливерпул»нинг таниқли мураббийи Грэм Сунесс билан жуфтлик ҳосил қилиб ишлаяпти. Чунончи, Сунесс эфирга чиқиш ва кескинликни таъминлаш бобида нисбатан тажрибалироқ саналади.
Сўз
- Фаолиятим давомида фақат кучли жамоаларда ўйнадим, энди эса ТВнинг энг кучли жамоасига қўшилдим.
Гари Невилл (40 ёш, Англия терма жамоаси ва «МЮ» клубининг собиқ ҳимоячиси)
Monday Night Football кўрсатуви бошловчиси. Гари ўз адаши - Линекер билан Англия футбол телевидениесидаги энг ёрқин юлдуз мақоми учун рақобат олиб боряпти. Алекс Фергюсон ўз вақтида Невиллга шундай хитоб қилган экан: «Гари, менимча, оғзингни юмганингда ёки ухлаганингда, тилинг Худога шукрона келтирса керак». Гарининг ўзи эса телевидениедаги дебютини ҳаяжон билан эслайди: «Шунчалик асабийлашганманки, ҳар 10 сонияда стакандан сув ҳўплагандим. Боз устига, қўлларимни қаерга қўйишни билмасдан, шунчаки, ручкани маҳкам ушлаганча уни қўйиб юбормагандим». «МЮ»нинг собиқ сардори вақт ўтиши билан эфирга яхши ўрнашиб олди ва ҳаттоки, ўтган йили АПЛнинг энг яхши шарҳловчиси номига муносиб кўрилди. У шунинг баробарида эксклюзив интервьюларга ҳам уста: айтайлик, Бекхэм фаолиятини тугатишини эълон қилиши ҳамоно у билан жонли интервью уюштирганди. Айтганча, Гари 2012 йилдан буён Англия терма жамоасида Рой Хожсонга ассистентлик қилишга ҳам улгуряпти.
Сўз
- Эфирга илк чиқиш пайти ҳар 10 сонияда сув ҳўплагандим.
Алан Ширер (44 ёш, АПЛ тарихидаги энг яхши тўпурар)
Иш жойи: ВВС
The Match of the Dayнинг яна бир таҳлилчиси. Афсонавий тўпурарнинг ҳар бир чиқиши ВВСга 8 минг фунтга тушади. Ширер шунингдек, радио ва интернетда ҳам ўйинларни таҳлил қилиб туради. Лекин минус томонлари кўпроқ: кўпчиликнинг фикрича, жуда содда ва одатий сўзлар билан чекланади (мисол: «Кейнинг «Челси» ҳимоячилари билан рақобатини кузатиш қизиқарли»), яна башорат қилишда қаттиқ янглишади. Дейлик, ЖЧ-2014 арафасида Руни Бразилиядан чемпионатнинг бош тўпурари сифатида қайтишини таъкидлашдан ташқари, Германия термасига «Юлдузларсиз жамоа», - дея баҳо берганди.
Сўз
- Англия термаси Коста-Рикани ҳар қандай таркиб билан мағлуб этади. (ЖЧ-2014 доирасидаги ўйинга башорат. Амалда учрашувда ҳисоб очилмади).
Шунингдек, Жейми Каррагер Monday Night Football (Sky Sports) кўрсатуви бошловчиларидан бири сифатида Гари Невиллдан қолишмасликка интиляпти. Ушбу каналда яна Жейми Реднапп (Харри Реднаппнинг ўғли, Фрэнк Лэмпарднинг амакиваччаси) ҳам эксперт сифатида ишлаяпти.
Оуэн Харгривс, Стив Макманаман, Дэвид Жеймс, Майкл Оуэн ва Пол Скоулз ВТ Sportда таҳлилчилик қилишяпти. Инглизлар Оуэнни зерикарли фикрлари ва овозининг дағаллиги учун унча ёқтиришмайди. Аксинча, Скоулз бир мавсумдаёқ томошабинлар меҳрини қозонди. Бунда Жек Уилшер ҳақида айтган гаплари катта роль ўйнади: «У 16 ёшида ҳозиргидан анча яхшироқ ўйнарди». Умуман, Скоулз бир қатор қизиқарли иборалар тўпламини йиғишга улгурди: «Клубда Яя Турени туғилган куни билан табриклашмабдими? Уни шунчаки, қучоқлаб қўйиш керак», «Гарет Бэйл «МЮ» учун яралган», «Барселона», «Реал» ва «Бавария» клублари АПЛда ўйнашганида, 10-15 очко фарқи билан ғолиб чиқишарди» (премьер-лига раҳбариятига танқид).
ITV эса Ли Диксон, Гордон Страчан, Глэн Ходдл ва Ян Райтни эскперт сифатида жалб этяпти.
Англия телевидениеСИда энг кўп
маош олувчи 5 нафар эксперт
Эксперт Канал Маоши (йилига млн. фунт ҳисобида)
1. Тьерри Анри Sky Sports 4
2. Гари Линекер ВВС 1,5
3. Гари Невилл Sky Sports 1,2
4. Майкл Оуэн ВТ Sport 1
5.Алан Ширер ВВС 0,5
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
