Берлинда УЕФА Чемпионлар Лигаси бош совринини навбатдаги марта боши узра баланд кўтарган Хави Эрнандеснинг «Барселона»даги 17 йиллик фаолияти юқори нотада якун топди. Ўзингиз ўйланг, у Каталония клубининг рамзига айланиш баробарида етарлича совринларни ютди. Хуллас, «Барселона»га кўп меҳнати сингган футболчи орадан бир неча кун ўтиб, Қатарнинг «Ал-Садд» жамоаси либосида оммага таништирилди. Эслатиб ўтамиз, бу испаниялик буюк футболчининг фаолиятидаги иккинчи клубдир.
2010 йилги жаҳон чемпионати ғолиби кўзлари порлаб турган ёш йигитчалар футболкаларига дастхат қўйиб бергач, FIFA.com сайти ижодкорлари билан бафуржа гаплашди. Хави суҳбат давомида «Барселона»нинг сўнгги мавсум 3та мусобақада ғолиб чиққани ва 2009 йилги муваффақият орасидаги фарққа тўхталди. Бундан ташқари, янги клуби, Қатар футболи ривожига нечоғли ҳисса қўша олиши борасидаги фикрлари билан ҳам ўртоқлашди.
- Таржимаи ҳолингизга назар ташласак, бу фаолиятингиздаги илк тақдимот маросими экани ойдинлашади. Қўлингизда янги жамоа либосини ушлаб тураркансиз, кўнглингиздан қандай ҳиссиётлар кечди?
- Авваллари бу каби ҳолатга тушмаганим боис, маросим ўзгача эҳтирос тақдим этди. «Барселона» клуби тизимига қўшилганимда 11 ёшли, эндигина футбол сирларидан воқиф бўлаётган болакай эдим, аммо ўшанда ҳам ҳозиргидек ҳаяжонланмагандим. Дарвоқе, Қатарда мени ғоят илиқ кутиб олишди. «Ал-Садд» клуби, мени қўллаб-қувватлаш мақсадида тақдимот маросимига ташриф буюрган болалар, ашаддий ишқибозлар томонидан кўрсатилаётган ҳурмат-эътибор учун ҳамма-ҳаммадан миннатдорман.
- Бутун фаолиятингиз ўтган клуб билан хайрлашишнинг айни вақти келганди, шундай эмасми?
- Ўтган йили онам ва дўстларим «Барселона»да яна бир мавсум қолишинг керак», деган фикрни илгари суришди. Натижада қандай қарорга келганимдан хабардорсиз. Ўзимни бахтиёр сезишга ҳақлиман, зеро, сўнгги мавсумда кўзлаган юксак марраларга эришдик. Буларнинг бари - орзуларим рўёбидир.
- «Барселона» «требл» (бир мавсумда 3та асосий мусобақада ғолиб чиқиш)ни такрорлаган Европадаги илк клубга айланди. Сиз эса мазкур зафарнинг асосий сабабчилардан бири сифатида эътироф этилдингиз. Хўш, 2009 йилги муваффақиятдан кўпроқ қувонганмидингиз ёки 2015 йилгиси ўзгача кечди?
- Ҳар иккиси бир хил аҳамиятга эга. Тўғри, бу гал «Барселона» сафида сўнгги ўйинларда майдонга тушаётганимни ҳис қилиб турдим. Шу боисми, бахтиёрлик ва ғамгинлик ўзаро уйғунлашиб кетди. Тан олиш керак, хайрлашиш учун бунданда қулай, ўз навбатида, ёқимли вазият вужудга келиши амри-маҳол. Қисқаси, бундан яхшиси бўлмайди. Умуман, ҳар икки «требл» ажойиб тарзда қайд этилди. Гарчи мазкур натижани такрорлашга унчалик ишонмаган бўлсак-да, ҳамжиҳатлик яна бир бор зафар қучишимизга замин яратди. Шу жамоанинг бир қисми бўлганимдан фахрланаман.
- Нимага асосланган ҳолда Қатарда ўйнашга қарор қилдингиз?
- Бу мен учун энг мақбул танлов, ўзига хос самарали лойиҳа бўлиши аниқ. Мавжуд вазият ўзим ва оиламни тўлиқ қаноатлантиради. Хусусан, «Ал-Садд» сафида маҳаллий чемпионат ва кубок турнири, Осиё Чемпионлари Лигасида муносиб қатнашиб, совринлар ютиш учун бор имкониятимни ишга соламан. Қисқаси, бу ерда ҳам «требл» қайд этиш имконияти юқори. Боз устига, Қатардаги фаолиятим кўнгилдагидек давом этса, 2022 йилги жаҳон чемпионати бош элчиларидан бирига айлансам, ажабмас. Бу ҳақда ўйлашнинг ўзи ёқимли. Кучли рақобатбардош клубга айланаётган «Ал-Садд» сафида эканимдан ғурурланаман. Келажакда мураббийлик лицензияси олиш, шунингдек, спорт директори лавозимида ишлашни режалаштирганман.
- Шаҳар бўйлаб сайрга чиқиш учун вақт топа олдингизми?
- Албатта, таассуротлар ижобий. Ҳамма мени катта қизиқиш билан қарши олди. Спортга катта эътибор қаратадиган Қатар ҳақида фақат илиқ фикрлар билдиришим мумкин. 2022 йилги мундиалга қадар фаолиятимни янада ривожлантиришим учун имкониятлар етарли.
- Демак, Қатар футболи маданиятини тараққий эттиришга ўз ҳиссангизни қўшишга тайёрсиз...
- Албатта. «Барселона»да тўплаган тажрибамни Қатар футболига татбиқ этишга интиламан. Кўриниб турибди, маҳаллий чемпионатда бизнинг услубимизда ўйнашни ёқтирадиган жамоалар бор. Сўнгги 10 йил мобайнида Каталония клуби ва Испания термасида худди шу услубда тўп сурдик. «Ал-Садд» ва унинг мураббийига бу борада кўмак берсам, ўзимни бахтиёр сезардим. Жамоа ўйинини кузатдим, футболчилар тўпни ўзларида кўпроқ ушлашга ҳаракат қилишяпти. Тушунарлики, бу услуб менга бегона эмас.
- Афтидан, кейинчалик Қатар терма жамоаси ҳам шундай ўйнамоқчи...
- Бу маҳаллий федерация мутасаддиларига боғлиқ. Улар айнан «Барселона» клуби ва Испания терма жамоаси ўйинидан дастуриламал сифатида фойдаланишга киришишган. Бу қарорни тўлиқ қўллаб-қувватлайман, зеро, жамоаларимизнинг жаҳон ареналарида қўлга киритган ютуқлари барчага маълум. Шунингдек, Қатар термасини 2022 йилги чемпионатгача рақобатбардош жамоага айлантириш йўлида кенг қамровли ишлар амалга оширилаётгани айни ҳақиқат.
- Сиз сўз юритаётган мундиалнинг Қатар учун қандай фойдаси бор?
- Мусобақа мезбонлигини қўлга киритишнинг ўзи асосий ютуқлардан бири саналади. Қолаверса, «Турнирнинг ноябрь ва декабрь ойларида ўтказилиши ўйинчиларга ҳар томонлама қулайлик туғдиради», деган фикрга тўлиқ қўшиламан. Аксарият стадионларга кондиционерлар ўрнатилиши ҳам мундиал иштирокчиларига зарур барча шарт-шароитлар яратиб берилишидан далолат. Қисқаси, футболчилар манфаати биринчи ўринга қўйилиши аниқ.
- Африка қитъасида ўтказилган 2010 йилги жаҳон чемпионатида Испания термаси сафида юксак маррага чиқдингиз. Нима деб ўйлайсиз, Яқин Шарқ ҳудудидаги ёшларни шундай улкан ютуқлар сари руҳлантира оласизми?
- Боя айтганимдек, «Барселона»да тўплаган тажрибамни нафақат Қатар, балки бутун минтақа футболи ривожи йўлида қўлламоқчиман. Асосий мақсадим - фидокорлик, меҳнатсеварлик, итоаткорлик сингари юксак фазилатларни тарғиб этиш. Қатар маданиятига астойдил киришиб, мамлакат футболини юксак марралар сари етаклашга муносиб ҳисса қўшмоқчиман.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
