Биз "қизил иблислар"нинг нуфузли мусобақадаги тўпурарлари ТОП-10 талигини сизга тақдим этамиз.
10. Дуайт Йорк. 36 ўйин – 11 гол
"Қизил иблислар" шарафини 1998-2002 йиллар давомида ҳимоя қилган Тринидадлик ҳужумчи клубнинг ЧЛдаги энг яхши тўпурарлари ўнталигидан жой олган. Йорк жамоа учун омадли мавсум бўлган 1998/1999 йилда ўз ҳисобига 8 та гол ёздириб қўйган эди. Ўша йили у "Бавария", "Барселона", "Интер" ва "Ювентус" каби жамоаларга қарши ўйинларда муҳим голларга муаллифлик қилган. Дуайт ҳисобида турнирдаги 1 та чемпионлик бор.
9. Рой Кин. 71 ўйин – 12 гол
Ирландиялик ярим ҳимоячи "Манчестер Юнайтед"да 1994-2005 йилларда тўп суриб, Чемпионлар лигасида 12 та тўпга муаллифлик қилди. Кин 1999/2000 йилги мавсумда 6 та гол уради. Бироқ ўша мавсумнинг чорак финалида "Олд Траффорд"да "Реал"га қарши ўйинда ўз дарвозасини ишғол қилиб қўйиб, омадли мавсумига эрта барҳам беради. Кин клуб билан ўша машҳур 1999 йилги турнирда ғолиблик нашидасини сурди.
8. Девид Бекхем. 77 ўйин – 14 гол
"Жарима тўплари қироли" ҳисобланадиган Бекхем клуб таркибида 1994-2003 йиллар давомида тўп сурди. Унинг ҳисобида "манкунианликлар" учун ЧЛда урилган 14 та гол мавжуд. Девид жамоадаги охирги ўйинида "Реал" дарвозасини 2 марта ишғол қилади. У 1999 йилги мусобақанинг "олтин" таркибидан жой олган эди.
7. Криштиану Роналду. 52 ўйин – 15 гол
Роналду "МЮ"да қанот ярим ҳимоячиси вазифасини бажариб берганлиги боис, унчалик ҳам кўп гол киритмаган. У "қизил иблислар" шарафини 2003-2009 йилларда ҳимоя қилган. Криштиану ЧЛдаги илк голини 27-учрашувида урган. Португалиялик футболчи 2008 йилги мавсумни ажойиб тарзда ўтказиб, тўпурарлик ва чемпионликни қўлга киритди.
6. Энди Коул. 48 ўйин – 18 гол
Инглиз ҳужумчиси Фергюссон қўл остида 1996-2002 йилларда тўп сурди. У Чемпионлар лигасида 18 марта рақиблар дарвозаларини ишғол қилган. Энди мусобақада икки марта "хет-трик"ка эришган. 1997-йилда "Фееноорд" ва 2000-йилда "Андерлехт" посбонларини Коулдан учта тўп "совға" олишган. Ҳужумчи 1999 йилда клуб билан турнир ғолиблигига эришади.
5. Оле Гуннар Сулшер. 77 ўйин – 19 гол
Тўпурарлар экваторидан "кулиб турувчи жаллод" лақабли Сулшер эгаллади. Норвегиялик ҳужумчи Манчестерликлар таркибида 1996-2007 йилларда майдонга чиққан. Сулшер энг муҳим голини 1999-йилги финалда киритганди. Ўшанда ҳужумчи 81 дақиқада заҳирадан майдонга тушиб 90 дақиқада гол киритган эди. У голларининг 8 тасини захирадан майдонга қўшилган ўйинларда киритган. Сулшерда ҳам турнирдаги 1 та ғалаба мавжуд.
4. Пол Скоулз. 124 ўйин – 24 гол
Скоулз бутун фаолиятини "МЮ"да ўтказди. У 1994-2013 йиллар давомида тунирда 24 та голни ўз номига ёздириб қўйган. Полнинг жамоа учун урган энг муҳим голи 2008-йили ярим финалда "Барселона"га қарши ўйинга тўғри келади. Ўшанда Пол ягона голга муаллифлик қилиб, жамоасини финалга олиб чиққан эди. Охир оқибат ўша йили "Юнайтед" мусобақа ғолибига айланди. Скоулз билан боғлиқ яна бир факт: у голларининг 9 тасини сўнгги 10 дақиқада киритган.
3. Райан Гиггз. 141 ўйин – 27 гол
"Юнайтед" афсоналаридан бири Гиггз ҳам бутун фаолиятини "қизил иблислар" сафида ўткзади. Уэлслик ярим ҳимоячи мусобақада жами 27 та голни ўз ҳисобига ёзиб қўйган. Гиггзнинг энг муҳим голи 1999-йилги ярим финалига тўғри келади. "Олд Траффорд"да "Ювентус"дан мағлубиятга учраётган "МЮ"нинг жонига сўнгги сонияларда Гиггз оро кирганди. Ўшанда унинг голи жавоб ўйини олдидан "қизил иблислар"га юқори кайфият бағишлаганди. Райан юқоридаги ўйинчилардан фарқли ўлароқ турнирда 2 марта ғолиблик нашидасини сурган.
2. Уэйн Руни. 81 ўйин – 29 гол
Руни "манкунианликлар" таркибида 2004-йилдан буён тўп сурмоқда. Унинг мусобақадаги дебюти фантастикага айланганди. Уейн илк ўйинида "Фенербахче" дарвозасини нақ 3 марта ишғол қилганди. Энг муҳими у биронта ҳам ўйинда захирада қолиб кетмаган. Руни ЧЛнинг финалларида 3 марта тўп суриб, 1 марта гол урган. Бироқ унинг голи жамоага ёрдам бера олмаганди. Руни ҳисобида ҳозирча турнирдаги битта ғолиблик мавжуд.
1. Рууд Ван Нистелроой. 43 ўйин – 35 гол
Голландиялик ҳужумчи 2002-2006 йилларда "Манчестер Юнайтед" таркибида, турнирда 35 та гол киритган. У уч марта Чемпионлар лигасида тўпурарликни қўлга киритган. Шунингдек 2002/2003 йилги мусобақада ўзи майдонга тушган барча 9 та ўйинда рақиблар посбонларини ранжитган. Нистелроой 2004-йили "Спарта" дарвозасини 4 марта ишғол қилиб, ЧЛда "покер"га эришган саноқли футболчилар сафидан жой олди. Афсуски мана шундай ажойиб кўрсаткичларга эга футболчи, Чемпионлар лигасида муваффақият қозона олмаган.
Фурқат Юсупов тайёрлади.
Манба: www.Furkat.uz
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
