ЧЛ гуруҳ босқичи 1-тури доирасида ПСВга қарши кечган ўйин «МЮ»нинг 20 ёшли вакили Люк Шоу учун ўта омадсиз келди: рақиб ҳимоячиси Эктор Моренонинг тўп ва футболчи оёғига аёвсиз ташлангани оқибатида унинг болдир суяги икки жойидан синди. Қуйида sovsport.ru сайти маълумотлари ёрдамида ушбу ёқимсиз воқеа тафсилотлари, унинг атрофидаги гапларга эътибор қаратамиз.
Иштирокчиларнинг фикрлари
- Менга далда бераётганингиз учун барчангизга катта раҳмат. Қанчалик тушкун аҳволда эканлигимни сўз билан ифодалашга ожизман. Саломатлигимни тиклаш жараёни бошланди. Майдонга янада кучлироқ ҳолда қайтишга ваъда бераман, - деб ёзди Люк Шоу «Твиттер»даги ўз саҳифасида. Эктор Морено ҳам сукут сақлашни истамади: «Люкнинг тезроқ соғайишига тилакдошман. Бундай кўргиликни ўз бошимдан ҳам кечирганман. Шу боис, унинг аҳволини тушуниб турибман. Умид қиламанки, сафга қайтишинг узоққа чўзилмайди ва тез орада яна майдонга тушасан, Люк».
Таъкидлаш жоиз, Морено ЖЧ-2014да Голландия термасига қарши баҳс (1:2)да Арьен Роббен билан тўқнашиб, айнан катта болдир суягини синдириб олган ва майдонга декабрь ойида қайтганди. Бу воқеани эслаган ПСВ бош мураббийи Филипп Коку шундай деди: «Шоунинг жиддий жароҳатланиши Моренони қаттиқ қайғуга солгани тайин. Ахир унинг ўзи ЖЧ-2014да худди шундай жароҳатга йўлиққанда ва бундай фалокатни ҳеч кимга раво кўрмаслигига аминман. Биз Люкдан узр сўраймиз». Қизиғи шундаки, Бразилияда ўтган мундиалда Голландия термасига Луи ван Галь устозлик қилганди. Энди у «МЮ»ни бошқараётган пайт шогирди шундай жароҳатга мубтало бўлди. Голландиялик мутахассис воқеага шундай изоҳ берди: «Агарда ўша вазиятда қизил карточка ва пенальти бўлганини таъкидласам, мени омадсизликни «хас-пўш» қилишликда айблашади. Ваҳоланки, гап иккала оёқда амалга оширилган ўта қўпол «подкат» ҳақида кетяпти...».
Британиялик экспертларнинг фикрлари
Чинакам жангчилик фазилатлари билан донг таратган «МЮ»нинг собиқ ярим ҳимоячиси Рой Кин ITV телеканали орқали лавҳани қуйидагича таърифлади: «Эктор ажойиб «подкат»ни амалга оширди. Жароҳат - бахтсиз ҳодиса. Футболчиларнинг вазиятга қандай муносабат билдиришганига эътибор беринг. Ортиқча эътироз сезилмади. Чунки Моренонинг ҳаракатларида ёвузлик аломатлари йўқ эди».
Daily Star вакили, собиқ ҳакам Ховард Уэбб ҳам айнан шундай фикрда: «Люк даҳшатли жароҳатга дуч келди. Унинг қисқа вақт ичида соғайишига тилакдошман. Лекин учрашув ҳаками вазиятга холис баҳо беришда адашмади. Зеро, Морено ўнг оёғи билан фақат тўпга ўйнади. Чап оёғи рақибига теккан бўлсада, бу атайин қилинган ҳаракат эмасди».
Лекин қарама-қарши фикрлар ҳам бор. Масалан, собиқ ҳакам Грэм Поллнинг фикрича, Никола Риццоли ҳимоячини майдондан четлатиши шарт эди: «Морено ўз рақибининг хавфсизлигини таъминлаши шарт экани ҳақида ўйлаб ҳам кўргани йўқ. Ҳа, унинг оёғи тўпга теккандир. Лекин ҳавода муаллақ қолган рақибига тегинмаслиги керак эди. Ҳимоячи ўз ҳакаратларини шунчаки, назорат қилолмай қолди. Риццолидек тажрибали ҳакам эса тажовузкор «подкат»ни дарҳол пайқаши лозим. У ПСВ ҳимоячини ўйиндан четлатмаслик ва пенальти белгиламаслик билан қўпол хатога йўл қўйди».
«МЮ»нинг муносабати
«МЮ»ни доимий ҳимоячидан (Шоу Голландия сафаригача АПЛнинг 5та ва ЕЧЛнинг 2та учрашувида тўлиқ вақт тўп сурганди) жудо қилгани учун манкунианлар Моренога дарғазаб қарашлари мумкин эди. Аммо улар Экторнинг ҳолатини холисона баҳоладилар. Буни Моренога келган хабарлар ва «МЮ»нинг «Твиттер»даги саҳифасида мексикалик ҳимоячининг англиялик касбдошига билдирган самимий тилакларига муносабатлардан ҳам билиш мумкин. Хуллас, манчестерликлар Экторнинг қилмишидан мамнун эмаслар, аммо унинг узрини қабул қилишгани аниқ.
футболчига далда
Бутун футбол жамоатчилиги Люкнинг тезда соғайиб кетишига тилакдош. Марҳамат, айрим мисоллар билан танишинг. «Саутгемптон» ўйинчилари шунчаки, томошабин бўлиб туролмасдилар. Ахир 10 ёшли Люкни айнан шу жамоа ўз қучоғига олиб, ардоқлаб тарбиялаган. «Авлиёлар»нинг португалиялик 31 ёшли сардори Жозе Фонте «Инстаграм»да шундай ёзди: «Бахтсиз ҳодисадан таъбим тирриқ бўлди. Лекин бу болакайнинг бўш келмаслигини яхши биламан. У жуда кучли йигит, тез орада янада иштиёқ билан сафга қайтади».
Бошқа жамоалар, ҳаттоки, бошқа лигалар вакиллари ҳам воқеага бефарқ қарамадилар. Масалан, «Ювентус» ярим ҳимоячиси Хуан Куадрадо тасалли берди. Яна собиқ футболчилар Люкнинг кўнглини кўтаришга уринмоқдалар. Дейлик, бразилиялик жаҳон чемпиони Кафу «Твиттер»га қуйидаги ибораларни битди: «Умид қиламанки, Шоу тезда майдонга қайтади. Кафу уни қаттиқ қучиб қолади».
Люк ўзини қандай ҳис этмоқда?
2013|2014 йиллар мавсумида «Саутгемптон»да Люк Шоуга устозлик қилган, ҳозирда «Тоттенхэм»ни бошқараётган Маурисио Почеттинонинг айтишича, у собиқ шогирди билан телефон орқали боғланган: «Мен Люк билан бафуржа суҳбатлашдим. У ўзини тобора яхши ҳис этмоқда. Биламан, Люк жуда кўп йиғлаган. Йўқ, оғриқдан эмас, шунча вақтни беҳуда ўтказишга мажбур бўлаётганидан...
...Ўша лавҳани кўрган заҳоти баданимда оғриқ турди. Лекин Моренонинг қасддан шикаст етказмаганига аминман. Бу футбол. Афсуски, вақт-вақти билан шундай кўнгилсизликлар учраб туради».
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
