Бугун олий лиганинг 24-турига старт берилди. Жумладан “Насаф” жамоаси Бекобод шаҳрида “Металлург” жамоасига қарши майдонга тушди.
Биринчи даврада Қаршида бўлиб ўтган учрашувда “аждар”лар “Металлург” жамоасидан аламли мағлубиятга учрашган эди. Шу туфайли бугунги учрашувда “Насаф” жамоасининг бекободликлар билан қайсидир маънода ҳисоб-китоби бор эди.
Учрашувнинг дастлабки дақиқасидан ўйин тизгинини қўлга олишга ҳаракат қилган “Насаф” жамоаси ҳужумкор ўйин намойиш этишга ҳаракат қилди. 19-дақиқада ташкил этилган ҳужумда Баҳром Абдураҳимов жамоа сардори Артур Геворкянни рақиб жарима майдони ичида тўп билан таъминлади. Артур эса дарвозани аниқ нишонга олишда адашмади – 0:1. Ушбу гол Артур Гевркяннинг мавсумдаги 10-голи сифатида қайд этиладиган бўлди.
Учрашув биринчи бўлимининг қолган дақиқаларида майдон эгалари ҳисобни тенглаштириш учун анча ҳаракат қилишди. Аммо буни уддасидан чиқа олишмади.
Иккинчи бўлим бошидан майдон эгаларининг фаоллиги анча ошди, улар ҳисобни тенглаштириш мақсадида ҳужумларга зўр беришди. Ҳатто майдондаги ўйинчилар тўп учун курашда бир-бирларини аяб ҳам ўтиришмади. Натижада шифокорларнинг тез-тез майдонга чиқишларига тўғри ҳам келди.
Ана шундай шиддатли ўйин учрашув охиригача давом этди. Учрашув асосий вақтига қўшиб берилган икки дақиқа ҳам шундай руҳда бўлди.
Шундай қилиб, жамоа сардори Артур Геворкяннинг ягона урган голи “Насаф”нинг навбатдаги ғалабасини таъминлаб берди. Ғалаба муборак азиз “Насаф” мухлислари!
Олий лига, 24-тур
«Металлург» (Бекобод) – «Насаф» (Қарши) 0:1
Бекобод ш., “Металлург” стадиони. 30.09.2015. 16:00да
Ҳакамлар: З. Қодиров (Навоий), В. Лушин (Гулистон), Н. Рўзимов (Тошкент), И. Худойдатов (Тошкент)
Назоратчи: А. Абдуллаев (Тошкент).
ЎзПФЛ вакили: В. Леткин.
Гол: Артур Геворкян, 19 – 0:1,
“Металлург”: 91.Зафар Сафоев, 4.Ҳикмат Ҳошимов, 7.Дониёр Одилов (13.Александр Ковалев 80), 10.Шохназар Норбеков, 14.Даврон Каримқулов, 15.Алишер Зиёвуддинов (6.Дилмурод Каримов 66), 19.Руслан Вагапов, 20.Мирғиёс Сулаймонов, 22.Муроджон Тошматов, 77.Саиджон Абдужабборов, 88.Жавлон Мирабдуллаев.
Захира: 32.Сухробжон Султонов, 17.Нозимжон Эсонов, 21.Сардор Расулов, 23.Миртўра Акбаров, 55.Зоҳид Абдуллаев.
“Насаф”: 25.Элдорбек Суюнов, 4.Масуд Каримов, 9.Илҳом Шомуродов(41.Азамат Алланиёзов 49), 16.Алишер Юсупов, 17.Артур Геворкян, 18.Баҳром Абдураҳимов, 20.Эркин Бойдуллаев, 22.Шоҳруҳ Гадоев, 23.Шерзод Аъзамов, 33.Одил Ҳамробеков, 34.Фарруҳ Сайфиев.
Захира: 30.Ўткир Юсупов, 7.Акрам Бахриддинов, 8.Сирожиддин Қўзиев, 10.Кенжа Тўраев, 35.Ислом Рашидхонов, 38.Дониёр Нарзуллаев.
Огоҳлантириш: Муроджон Тошматов 35, Шоҳруҳ Гадоев 52, Фаррух Сайфиев 61.
Матнда хатолик топсангиз, ўша хатони белгилаб, бизга жўнатинг (Ctrl + Enter).