Камтарин «Лестер»нинг муваффақиятларига ўз голлари билан салмоқли ҳисса қўшаётган Жейми Варди бутун Англияни ўзи ҳақида гапиришга мажбур этмоқда. Испанияда эса, Иманоль Агирече бўй кўрсатмоқда. Хуллас, қуйида терма жамоалар ўйинлари сабаб, озгина тин олган Европа топ-миллий биринчиликларига зимдан назар соламиз. Тўғрироғи, тўпурарлик қобилиятини ишга солганча, мавсум кашфиёти бўлишга даъво қилаётган 6 нафар футболчини алоҳида эътироф этамиз.
Жейми ВАРДИ («Лестер», 28 ёш, 12та ўйинда 12та гол)
Англия премьер-лигасида мавсумнинг деярли учдан бир қисми ортда қолди ва ҳозирдан асосий кашфиёт бўлишга номзод футболчи тайин - Жейми Варди. 28 ёшли ҳужумчи бундан 3 ой аввал ҳам фақат «Лестер» фанатларига яхши таниш эди. Энди эса, бутун Англия у ҳақда гапирмоқда. Эътиборлиси, Жейми агарда 21 ноябрь куни «Ньюкасл»-«Лестер» ўйинида ҳам гол урса, унда афсонавий Рууд ван Нистелрой билан бир қаторга жойлашади. Яъни голландияликнинг АПЛда кетма-кет 10та ўйинда гол уриш рекордини такрорлайди. Бир қарашда, бу Варди учун осон масаладек. Ахир у 29 августдан буён мунтазам рақиблар дарвозасига йўл топиш уддасидан чиқмоқда. 12та гол, шундан 9таси кетма-кет равишда - бундай натижа Жейми Варди учун янги футбол ҳаёти йўлини очди. Дейлик, ёш саналмайдиган ҳужумчини Англия терма жамоасига 2 марта чақиришди. Агарда Жейми ҳозирги маҳсулдорлигини кескин пасайтириб юбормаса, катта эҳтимолки, келаси ёз Францияга Европа чемпионатида ўйнаш учун боради. Айтиш жоиз, бундан бир неча йил олдин шеффилдлик нотаниш йигит Англия чемпионшипида ўйнаш билан чекланиб юрарди. Шу жойда таъкидлаш ўринли, Вардининг салоҳияти қуюқ туман билан ўралган. Ҳарқалай, уни ёши туфайли бир йилча олдин худди шу тарзда юзага қалқиб чиққан Гарри Кейнга қиёслаш асло мумкин эмас. Бинобарин, 21 ёш ва 28 ёш - бу футболчилар учун сезиларли фарқ. Яхшиси, Вардини АПЛда 25-26 ёшларида ёрқин ўйнашган Чарли Остин ва Энди Жонсон (тегишлича 19 ва 21та гол уришган)га ўхшатиш керак. Ҳа, уларнинг иккиси ҳам навбатдаги мавсумдаёқ чемпионшипга қайтганди. «Лестер» эса ҳозир етарли очколар захирасига эга ва унга элитадан тушиб кетиш хавф солаётгани йўқ. Аммо Вардининг дейлик, «Манчестер Юнайтед» ёки «Челси»га ўтиши реал воқеликдан анча йироқ, барибир. Зеро, айни пайт бу ҳақда жиддий гап-сўз йўқ.
Иманоль АГИРЕЧЕ («Реал Сосьедад», 28 ёш, 9та ўйинда 8та гол)
Жорий мавсум «Реал Сосьедад»нинг ишлари сира юришмаяпти. Мисол учун, салбий натижалар сабаб, яқиндагина клубда 1 йил ҳам ишлашга улгурмаган Дэвид Мойес истеъфога чиқарилди. Хуллас, янги мавсумнинг старт босқичини ўз ҳисобига «плюс» белгиси билан ёзиб қўйишга муносиб саноқли футболчилардан бири - бу Вардининг тенгдоши ва амплуадоши Иманоль Агирече. Унинг якка ўзи жамоани тепага тортишга уриняпти - бу гап айни пайт унча муболаға саналмайди. Ҳар ҳолда, Иманолнинг голлари «Сосьедад»нинг бутунлай пастга шўнғиши олдини оляпти. Қаранг, Агирече баскларнинг Ла-лига мавсуми доирасидаги 12та ўйинларидан 9тасида иштирок этди ва 8та гол урди. Эҳтимолки, у ҳозир фаолиятидаги энг асосий даврни бошидан ўтказаётгандир. Ваҳоланки, Иманоль бутун ҳаёти давомида фақат «Реал Сосьедад»ни «кўрган», холос. Хуллас, тақдир ҳукмига кўра, 28 ёшига келибгина ниҳоят, алмаштирилмас футболчига айланмоқда ва деярли ҳар бир ўйинда рақиблар дарвозасини ишғол қилмоқда. Ким билади, балки Испания терма жамоаси бош мураббийи Висенте Дель Боске ҳам эртами-кеч Иманолнинг сермаҳсул ўйинларига эътибор қаратар...
ЭДЕР («Сампдория», 29 ёш, 12та ўйинда 9та гол)
Муддатидан анча кеч, аммо ёрқин «очилган» яна бир ҳужумчи. Эдер - асли бразилиялик итальян. Унинг қуйи лигалардан элитага, юлдузлар қаторигача босиб ўтган йўли анча узун ва бу жараён нақ 10 йил вақт олди. Оддий айтганда, Эдер «Эмполи», «Брешиа», «Фрозиноне», «Чезена» каби клублардаги фаолиятидан сўнг «Сампдория»га кўтарилди ҳамда орзусига эришди. Яъни 2015 йилнинг март ойида илк марта Италия терма жамоасига жалб этилди. 29 ёшли яримфахрий жорий мавсум Антонио Конте ниҳоятда тўғри қарор қабул қилганини тўла исботлаяпти. Хуллас, мураббий шиддаткор ва меҳнаткаш бразилияликни қўққисдан «Скуадра Адзурра»га чақириб, хато қилмаган, шекилли. Қаранг, Эдер «А» сериясининг дастлабки 12та турида 9та гол уриб, бутун ўтган мавсумда қайд этган натижасини такрорлади. Натижада терма жамоадан яна таклиф олди. Эдер, шунингдек, Варди ва Агиреченинг футболдаги йўллари шуни кўрсатмоқдаки, 25-26 ёшгача юлдуз бўлолмаслик ва терма жамоадан четда юришлик умид узишга асос эмас. Зеро, биттагина ёрқин мавсум кенг даражада машҳурликка эришиш учун кифоя қилади.
Миши Батшуайи («Марсель», 22 ёш, 13та ўйинда 8та гол)
«Марсел»нинг ҳозирнинг ўзидаёқ нафақат Франция, балки бутун Европада мавсум стартини «расво» қилган клублар қаторига қўшиш мумкин. Чунончи, марселликлар ўтган мавсум ЧЛ йўлланмасини қўлга киритишга яқин келгандилар, энди эса, Лига 1да атиги 13-ўринда бормоқдалар. Энг ачинарлиси, мавсумнинг учдан бир қисми тугаган пайт ҳам жамоа ўйинида алоҳида учқун сезилаётгани йўқ. Тўғри, Франциянинг 9 карра чемпиони мухлислари ҳамон ҳаммаси изга тушишидан умидворлар. Бунга асослари ҳам бор - Миши Батшуайи ажойиб голлари билан мавсум кашфиётига айланмоқда. Айни пайт 22 ёшли ҳужумчи тўпурарлик пойгасида кимсан Златан Ибрагимовичдан атиги 1та голга ортда қоляпти. Ёзда «Марсель» бир қатор етакчи футболчиларидан айрилди. Хусусан, ҳужум чизиғи вакиллари - Андре-Пьер Жиньяк ва Андре Айю кетишди. Уларнинг ўрнига ҳеч ким сотиб олинмади ва айни шу ҳолат Батшуайига қўл келди. Яъни ёш иқтидор ўз салоҳиятини кўрсатиш фурсати келганини тўлиқ фаҳмлаб, бор имкониятини ишга соляпти. Бельгиялик футболчи шунингдек, ҳаракатларига яраша, ўз миллий жамоаси устози Марк Вильмотс эътиборига тушди. Боз устига, унинг таркибида ҳам гол уришни пайсалга солгани йўқ: март ойида Кипр термасига қарши кечган ўртоқлик учрашувида ўз статистикаси ҳисобини очди. Натижада Вильмотс уни охирги йиғин (Италия ва Испания термаларига қарши ўйинлар учун)га ҳам таклиф қилди. Миши бунга жавобан итальянлар дарвозасини ишғол қилди. Ҳа, Бельгия термаси учун яна бир топ-савияли футболчи етишиб чиқмоқда. Эҳ, одамнинг ҳаваси келади. Ахир Бельгияда бундай иқтидорларнинг сон-саноғи йўқ-ку.
Риёд МАҲРЕЗ («Лестер», 24 ёш, 11та ўйинда 7та гол)
Клаудио Раньери жамоаси жорий мавсум шунчалик яхши кўриняптики, унинг бирданига 2 нафар вакили премьер-лига тўпурарлари жадвалида юқори ўринларда бормоқда. Яъни Варди қатори қанот ярим ҳимоячиси Риёд Маҳрез ҳам юқори маҳсулдорликни намойиш этяпти. Асли жазоирлик, Франция футболи тарбияланувчиси саналган Риёд Англияга 2014 йилнинг бошида «Гавр»дан кўчиб ўтди. У нисбатан қисқа вақт ичида Найжел Пирсон ишончини қозониб, «Лестер»нинг асосий ўйинчиларидан бирига айланди. Раньери бошқарувида эса, асосий таркибдаги жойини мустаҳкамлаш билан чекланиб қолмай, жамоа етакчилари қаторига қўшилди. Яна бир муҳим факт: 24 ёшли араб жорий мавсум кўп гол уриш баробарида премьер-лиганинг энг яхши ассистентлари рўйхатида кучли учликда боряпти. Эҳтимол, айни ҳозирги шароитда Маҳрез-Варди боғламига АПЛдаги энг кучли тандем сифатида баҳо бериш ўринлидир. Ҳарқалай, асосан шу жуфтликнинг самарали ҳаракатлари ўлароқ, пицца хуштори - Клаудио Раньери шогирдлари миллий биринчиликда 3-ўринни эгаллаб туришибди ва ўз мавқеларини бой бериш ниятида эмаслар.
Лукас ПЕРЕС («Депортиво», 27 ёш, 11та ўйинда 7та гол)
«Депортиво» - испан футболининг элит гуруҳига қайтиш йўлида изланаётган клуб. Унинг яқин ўтмишда ЧЛ ярим финалида иштирок этганини ҳисобга олсак, худди шундай. Албатта, жамоанинг чўққига кўтарилиши учун ҳали кўп вақт керак. Лекин «Депор»нинг ўтган мавсумдаги каби лигада қолиш учунгина курашмаётгани ҳам ҳақиқат. Клуб равнақига салмоқли улуш қўшаётган асосий футболчи - бу ҳужумчи Лукас Перес. У жамоасининг жорий мавсум примерода урган жами голларининг деярли ярмига муаллифлик қилди. Шундай бўлиб чиқдики, бутун ҳаёти давомида айнан «Депортиво» либосини кийиш орзусида юрган Ла-коруньялик йигит жонажон шаҳри жамоаси сафига фақат ўтган йили, нақ 26 ёшида қўшилди. Қолаверса, Лукас дастлабки даврда захирадан майдонга тушиш билан чекланди ва аҳён-аҳёнда гол урди, холос. Лекин мавсум якунига қадар асосий футболчилардан бирига айланди. Мана, бош мураббий Виктор Санчес янги мавсумдан эътиборан Лукас Пересга 100 фоиз ишонч билдирмоқда ва у бунга ўз голлари билан жавоб қайтаряпти. «Краснодар» устози, Львовнинг «Карпати»сида Лукас билан бирга ишлаган Олег Кононов унга қуйидагича таъриф берди: «Перес ғоят универсал йигит. У ҳужумда ҳам, ҳимояда ҳам, ҳужумкор хавбек мақомида ҳам бемалол ўйнашга қодир. Хуллас, салоҳияти анча баланд ва доимо вазиятни ўз клуби фойдасига ҳал қилади». Муҳими, Лукас ҳозир бу фикрларни тўлиқ исботлаяпти.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
