Ўзбекистон аёллар терма жамоасининг собиқ бош мураббийи Тожикистонда эркаклар клубини бошқарадиган бўлди
Ўзбекистон аёллар терма жамоасининг собиқ бош мураббийи Шерали Бобоқулов Тожикистон Олий лигасида иштирок этувчи «Истравшан» клубига бош мураббий этиб тайинланди.
Ўзбек мутахассиси бу лавозимда мавсум бошидан буён жамоани бошқариб келган тожикистонлик Шуҳрат Шамсиев ўрнини эгаллади.
Бобоқулов учун бу тайинлов профессионал эркаклар футболидаги илк тажриба ҳисобланади. Унинг шартномаси жорий йил охиригача мўлжалланган. Мураббий олдига клубни лигадагидан чиқиб кетишдан сақлаб қолиш вазифаси қўйилган.
19 октябрь куни Бобоқулов раҳбарлигидаги илк ўйинда «Истаравшан» кутилмаганда Лига етакчиларидан бири — душанбелик ЦСКАни 2:1 ҳисоби билан мағлуб этди.
Қайд этиш лозим, «Истаравшан» таркибида тўрт нафар ўзбек футболчиси тўп сурмоқда.
Шерали Бобоқулов бир неча йил давомида Ўзбекистон аёллар терма жамоаси ҳамда Жиззахнинг «Сўғдиёна-W» клубини бошқарган. 2021 йилда у Ўзбекистон аёллар футболида йилнинг энг яхши мураббийи деб топилган. Унинг қўл остида «Сўғдиёна» мамлакат чемпионати ва Кубогини, шунингдек, ОФК аёллар клублар чемпионлигини қўлга киритган.
Манба: fergana.media
Киритилди: 09:52, 21.10.2025. Ўқилди: 425 марта. Фикрлар: 3 та.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Бўлимга тегишли қизиқарли хабарлар