Карло Анчелотти “Реал” мураббийлигидан кетганидан сўнг, кўпчилик жамоага Юрген Клопп келишини кутган эди. Маълум вақт мобайнида “Қироллик клуби” немис мутахассиси билан келишувга эришди деган хабарлар ҳам пайдо бўлди. Бироқ жаноб Перес доимгидек ҳаммани ажаблантиришда давом этди ва клубга Рафаэл Бенитесни таклиф қилди. Шундан сўнг кўпчилик “Реал” энди кубок жамоасига айланади дея фикр билдира бошлашди.
Бенитеснинг натижалари
Бундай таҳминлар келтирилиши бежиз эмас эди албатта. Келинг даставвал Рафанинг олдинги натижаларига тўхталиб ўтсак. Бенитес 2004-йилда “Валенсия”ни Испания чемпиони қилганидан кейин Англиянинг “Ливерпуль” ва “Челси”, Италиянинг “Интер” ва “Наполи” жамоаларини бошқарди. Бу клублар ўз чемпионатларида етакчи бўлишларига қарамай, Бенитес уларни чемпион қила олмади. “Ливерпуль” билан Чемпионлар лигасида, “Челси” билан Европа лигасида, “Интер” билан эса клублар ўртасидаги жаҳон чемпионитда ғалаба қозонди. Бундан кўриниб турибдики Бенитес жамоани чемпионлик сари етаклай олмайди. Бироқ Перес бундай деб ҳисобламайдиган ер юзидаги санқоли кимслардан бири эди.
Мураббийга ишончсизлик
Дастлабки ойлардаёқ Бенитес ва футболчилар орасида келишмовчиликлар бошланиб кетди. Дастлаб Роналду, кейин Рамос, бироздан сўнг Хамес ҳам мураббий билан келиша олмай қолишди. Жамоанинг етакчи ўйинчилари ва мураббий ўртасидаги совуқ муносабатлардан сўнг, бошқа футболчилар ҳам Бенитесга унча ишонмай қўйган бўлсалар не ажаб.
Ҳужумкор “Реал” энди йўқ!
Бенитес ҳужумкор “Реал”ни ҳимоявий “Реал”га айлантириб ташлади. “Қироллик клуби” чемпионат ва Чемпионлар лигасидаги жами 16 та ўйиннинг 4 тасида рақиблар дарвозасига йўл топа олмади. Бу дегани ҳар 4 ўйиннинг бирида “галактикос” гол ура олмаяпти. Уч беллашувда 0:0 ҳисоби қайд этилганини ҳам таъкидлаб ўтиш жоиз. Жамоанинг самарадорлиги ҳам анча пасайиб кетди. Ла Лигадаги 12 ўйинда “Қироллик клуби” атиги 26 та гол урди. Жамоа охирги 6 мавсум давомида Премьерода 100 тадан ортиқ гол уриб келаётганди. Бу мавсум эса клубнинг ушбу ёқимли анъанаси давом этиши даргумон.
Роналдунинг самарадорлиги пасайди
Криштианунинг самарадорлигининг пасайишига ҳозирча иккита сабаб бор. Биринчиси унинг ёши бўлса, иккинчиси мураббий! Бенитес туфайли Роналду гол ура олмаяпти дейиш кулгули бўлар балки. Бироқ Моуриньо ва Анчелотти даврида Криштиану билан ҳозиргиси ўртасида осмон билан ерачалик фарқ бор. Португалиялик ҳаракат қилмоқда, бироқ омад ҳам кўпгина вазиятларда ундан юз ўгирмоқда. Балки Рафа Роннини етарлича руҳлантира олмаётгандир.
“Барса” билан ўйин
Бенитес “Барса”га қарши учрашувда тактик жиҳатдан ютқазди. Агар ўйинни кўрган бўлсангиз “Реал” футболчилари тўпни кимга оширишни ҳам билмай қолишди. Комбинацион ўйиндан асар ҳам йўқ. Футболчилар шунчаки таваккалига тўпни олдинга тепиб ҳужум қилишди. Жуда ҳам кучли деб эътироф этилган ҳимоя эса парчаланиб кетди. Рафа захира футболчисини алмаштиришда ҳам ўзини кўрсата олмади. “Реал” савиясига умуман тўғри келмайдиган, кечаги ўйинда майдонга нима учун тушганини ҳам билмаган Данильони эмас, тинмай ҳаракат қилаётган Марселонинг ўрнига Карваҳални тушириши бироз кутилмаган ҳол бўлди. Ушбу мавсумда “Реал” деярли ёрқин учрашув ўтказмади. Хаттоки йирик ҳисобда ғалаба қозонган ўйинларда ҳам, клубнинг ўйини унчалик ҳам ёрқин кечмади. Етакчи жамоалар билан баҳсларнику айтмаса ҳам бўлади. (“Атлетико”, “ПСЖ” ва “Барселона”га қарши ўйинлар назарда тутилмоқда)
Рафа кетиши керакми?
Клуб мухлислари жамоа президенти Флорентина Перес ва мураббий Рафаэл Бенитесдан истеъфо талаб қилишмоқда. Жамоа етакчиси Криштиану Роналду эса “Ё мен, ё Бенитес кетади” дея ултиматум қўймоқда. Бу воқеалар ҳудди ўтган мавсумда Энрике ва “Барса” билан бўлган вазиятни эсга солмоқда. Бироқ Мадридликларда вазият чигал. Агар Бенитес кетса ўрнига ким келади? Зидан келаси мавсумдан иш бошламоқчи эканлигини билдиргач, “галактиикос”га вақтинчалик мураббий керак бўлади. Бироқ ким ҳам вақтинча мураббий бўлишни хоҳларди? Перес Ди Маттеога ўхшаш мураббийни топа оладими? Буни энди вақт кўрсатади.
“Реал”нинг муаммоаси
Кечаги ўйин ҳам “Реал”га кучли марказий ҳужумчи керак эканлигини кўрсатди. Бензема 89 дақиқа давомида майдонда нима қилиб юрганини ўзи ҳам билмаса керак. “Реал” нима учун “Барса”дан бу қадар йирик ҳисобда енгилди? Каталонияликлар сафида МСН триоси бор. Агар Месси йўқ бўлса, унинг ўрнини бемалол Неймар ва Суарес боса олишларини исботлаб келишмоқда. Айрим баҳсларда Неймарнинг ўйини чиқмаса, Суарес, аксинча бўлганида эса Неймар катта саҳнага чиқиб жамоасига ғалабалар келтиришмоқда. Яъни “Барса”да тенг кучли 3 та ҳужумчи бор ва уларннинг бирортаси ўзини кўрсата олмаса, бошқаси катта саҳнага чиқиб кетаверади. “Реал”да эса бундай ҳужумчи йўқ ҳисоби. Роналдунинг ўйинлари ўхшамаётган пайтда Бензема 1-2 марта ўзини кўрсатди. Бироқ у стабил ҳужумчи эмас. Бейл барибир ҳужумчи бўла олмайди. “Қироллик клуби” бу мавсум ҳам совринсиз қолишни истамаса қишда Кавани, Агуэро, Левандовски ёки Обамеянгларнинг бирортасини қанча пулга бўлса ҳам сотиб олишига тўғри келади. Мабодо Роналду жароҳат олиб қолгудек бўлса борми….
Хулоса
Шахсий фикримча Бенитесга вақт берилса керак. Бу вақт қанчалик узоқ давом этиши мураббийнинг ўзига боғлиқ. Агар “Қироллик клуби” яқин 2-3 та ўйиннинг биттасида ютқазиб қўйса, Рафа буюруқни ҳам кутмасдан зудлик билан чамадонларини йиғиштириб жамоадан кетаверса ҳам бўлади.
Фурқат Юсупов
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
