Ўзбекистон терма жамоалар маркази директори Асқар Толибжонов "Футбол Экспресс" газетасига интервью берди. Бу ҳақда championat.asia сайти хабар тарқатган.
У терма жамоанинг Молдова билан ўртоқлик учрашуви ҳақидаги маълумот асоссиз эканини айтган.
"Бу маълумот асоссиз. Қаердан олдинглар билмадим. Молдавия терма жамоаси билан ўртоқлик ўйини ўтиш борасида ҳеч қандай маълумот берганимиз йўқ. Лекин келаси йили кучли рақибларга қарши ўртоқлик учрашувларини албатта ўтказамиз ва буни дастуримизга киритганмиз", дейди Толибжонов мухбирнинг миллий терма жамоа 2016 йили дастлабки ўртоқлик учрашувини Молдовага қарши ўтказиши ҳақида аниқлик киритишини сўраб берган саволига.
У шунингдек терма жамоа ўйинлари нега янги "Бунёдкор" стадионида эмас, "Пахтакор" стадионида ўтказилганига ҳам изоҳ берган.
"Тўғри, жорий йилда ЖЧ-2018 саралаши босқичидаги иккита учрашувни "Пахтакор" стадионида ўтказдик. Майдоннинг ҳолатига қараб шундай қарорга келдик. Албатта, келаси йили майдоннинг ҳолати яхши бўлса, ўйинларни "Бунёдкор" стадионида ҳам ўтказамиз", - дейди у.
Эслатиб ўтамиз, ЎФФ расмий сайти 25 ноябрь куни Молдова ва Ўзбекистон терма жамоалари ўртасида 2016 йилнинг 9 февраль санасида, Туркиянинг Анталия шаҳрида ўртоқлик учрашуви бўлиб ўтиши ҳақида хабар берганди.
Кеча Молдова ФФ вице-президенти Ион Тестемицану Ўзбекистон билан келишув бўлганини таъкидлади.
Ўзбекистон ФФ матбуот хизмати раҳбари Санжар Ризаев эса Молдова-Ўзбекистон ўйинини авторизация қилиши учун ЎФФ ФИФАга ҳам хабар берганини билдирган.
Толибжоновнинг интервьюсига муносабат билдирганлардан бири, "Чемпион" газетаси муҳаррири Ш.Шокиржонов терма жамоалар маркази раҳбарининг ҳаракатларини қолоқлик дея баҳолаган.
Ҳуқуқшунос Хушнуд Худайбердиев эса бу воқеага муносабат билдира туриб, "Терма жамоалар маркази тўлиқлигича яхши мутахассисларга муҳтож ташкилот" эканини айтади.
Матнда хатолик топсангиз, ўша хатони белгилаб, бизга жўнатинг (Ctrl + Enter).