Юртимизда Олий Лиганинг янги мавсуми старт олишига ҳам оз вақт қолмоқда.
Барча жамоалар ҳам янги бошланажак мавсумга пухта ҳозирлик кўришга интилишди. Нафақат футболчиларнинг жисмоний тайёргарлиги ёки жамоанинг юртимизда ва хорижда йиғинлар олиб боришига эътибор қаратилди. Балки клубларнинг барча жиҳатдан 2016-йилги мавсумга тайёр бўлишига урғу берилди.
Мисол тариқасида Олий Лиганинг янги иштирокчисига айланган “Обод” жамоаси ҳам 2016 йилга ўзгача тайёргарлик олиб борди. Жамоа қишки йиғинлар давомида хорижга чиқишга ҳам улгурди. Қолаверса, Nike фирмаси билан ҳамкорлик йўлга қўйилди. Унга кўра, “Обод” футболчилари янги мавсумда айнан шу фирма либосларида майдонга чиқишади.
Биз ҳам шуни инобатга олгн ҳолда, Олий Лига-2016нинг барча иштирокчилари янги мавсумни қандай либосларда ўтказиши борасида маълумот беришга қарор қилдик.
“Пахтакор” – Adidas
Мамлакатимизнинг амалдаги чемпиони – “Пахтакор” янги мавсумда ҳам ўз анъанасига содиқ қолган ҳолда Adidas фирмаси либосларидан фойдаланади. Жамоа 2003 йилдан буён шу фирма билан ҳамкорлик қилиб келади. Бу йил ҳам анъана бузилмади ва ўртадаги ҳамкорлик давом эттириладиган бўлди.
“Пахтакор”нинг асосий либоси ранги сариқ бўлади. Бу либосда “шерлар” аллақачон учрашув ўтказишга улгурди. Суперкубок учун кечган баҳсда айнан сариқ рангли либосда майдонга чиқилди. Сафар учрашувлари учун эса оқ рангли либос тайёрланди.
“Локомотив” – Joma
Тошкентнинг “Локомотив” жамоаси эса сўнгги йилларда Joma билан ишлаб келмоқда. Жамоа ўтган мавсумда ҳам Joma либосларидан фойдаланганди. Бу йил либослар Jomaдан буюртма қилинди. Уй учрашувлари “Локо”нинг анъанавий ранги саналувчи қизил рангли либосда ўтказилса, сафар ўйинлари учун оқ рангдаги формалар ҳозир қилиб қўйилди.
“Насаф” – Adidas
Қаршининг “Насаф” жамоаси ҳам мана 6 йилдирки, Adidas билан ҳамкорлик қилиб келяпти. Бу йил томонлар ўзгача кўринишда либос тайёрлашди. Унга кўра, “Насаф” янги мавсумни оқ рангли либосда ўтказади. Мазкур форма анча нафис кўринишда ишланганини таъкидлаш жоиз. Сафар учрашувлари учун эса кўк рангдаги форма танланди.
“Бунёдкор” – Jako
Тошкентнинг “Бунёдкор” клуби ҳам янги мавсум учун жуда чиройли кўринишдаги либос тайёрлади. Жамоа 2012 йилдан буён Германиянинг Jako фирмаси билан яхши алоқаларни йўлга қўйган. Ҳар мавсум аввалида либослар Германиянинг ўзидан келтирилади. Бу мавсумда ҳам жуда нафис ишланган либослар олиб келинди.
“Қалдирғочлар”нинг асосий либоси оқ рангда бўлса, сафар ўйинларида жамоа кўк рангдаги формада майдонга чиқиши кўзда тутилган.
“Андижон” – Macron
“Анджон” ҳам янги мавсумга ҳар томонлама яхши тайёргарлик олиб борди, деса бўлади. Жамоа бу йил ҳам Италиянинг Macron фирмаси либосларидан фойдаланадиган бўлди. Ўтган йили ушбу фирма “Бургутлар” учун анчагина чиройли форма тайёрлаб берганди. Бу йил ҳам ҳамкорлик давом эттириладиган бўлди. Асосий либос – доимгидек оқ рангда, сафар ўйинлари учун эса кўк рангдаги формадан фойдаланиладиган бўлди.
“Навбаҳор” – Jako
Наманганнинг “Навбаҳор” клуби эса бу йил теҳник ҳамкорини ўзгартирди. Жамоа ўтган йили Joma билан ҳамкорлик қилганди. Лекин бу йил жамоа Германиянинг Jako фирмаси либосларидан фойдаланадиган бўлди. Энди айнан Jako етказиб берадиган либосларда “лочинлар” футболчилари майдонга чиқишади.
Жамоанинг асосий ранги доимгидек сариқ бўлади. Сафар учрашувлари эса кўк рангдаги либосда ўтказилади.
“Машъал” – Patrick
Муборакнинг “Машъал” клуби янги мавсумда ҳам Patrick фирмаси либосларидан фойдаланади. Жамоа ўтган йили ҳам Patrick билан ҳамкорлик қилганди. Асосий либос ранг сифатида кўк танланди. Сафар учрашувларида эса “газчилар” сариқ рангдаги формаларда майдонга чиқишлари кўзда тутилган.
“Шўртан” – Joma
Ғузорнинг “Шўртан” клуби ҳам Joma либосларидан фойдаланишни афзал билди. Жамоа ўтган мавсумда ҳам мазкур фирма билан ҳамкорлик қилганди. Ҳар икки томонни ҳам ҳамкорлик қониқтирган кўринади, бу йил ҳам томонлар биргаликда ишлашга қарор қилишди.
“Оқ бўрилар”нинг асосий либослари ҳаворанг бўлиши мўлжалланган. Сафар ўйинлари эса оқ рангдаги формада ўтказилади.
“Сўғдиёна” – Joma
Жиззахнинг “Сўғдиёна” жамоаси янги мавсумда Joma билан ҳамкорликни давом эттиради. Томонлар ўзаро келишувга кўра ҳамкорликни яна бир мавсумга узайтиришга қарор қилишди. Биласиз, ўтган йили ҳам “Сўғдиёна” Joma либосларидан фойдаланганди. Бу йил ҳам жамоа футболчилари шу фирма либосларида майдонга тушишади.
Асосий либос ранги – кўк, сафар ўйинлари учун кулрангдаги форма тайёрланди.
“Олмалиқ” – Adidas
“Олмалиқ” жамоаси эса ўз анъанасига содиқ қолган ҳолда Adidas либосларидан фойдаланади. Жамоа янги мавсум учун 2 хил рангдаги либосларни таййролади. Улар кўк ва оқ рангда бўлиб, кўк рангдан асосий форма сифатида фойдаланилади. Сафар ўйинларида эса оқ рангли либосда майдонга чиқиш кўзда тутуилган.
“Металлург” – Joma
Бекободнинг “Металлург” жамоаси сўнгги йилларда Joma билан яқиндан алоқани йўлга қўйди. Жамоа янги мавсумни ҳам айнан шу фирма тайёрлаган либосларда ўтказади. Асосий либос ранги худди Дортмунднинг “Боруссия” жамоасидаги каби сариқ-қора. Сафар ўйинларида эса оқ ёки яшил рангдаги формалардан фойдаланиш мўлжалланмоқда.
“Қўқон-1912” – Joma
Қўқоннинг “Қўқон-1912” жамоаси ўтган йилдаги каби Joma либосларида майдонга тушишни режалаштирган. Жамоа аллақачон янги мавсум учун либосларини қабул қилиб олган. Унга кўра, оқ рангдаги форма асосий либос сифатида танланди. Кўк рангдаги либос эса захира форма деб белгиланди.
“Нефтчи” – Joma
Фарғонанинг “Нефтчи” жамоаси сўнгги йилларда Joma билан ишлаб келмоқда. Жамоа янги мавсумни ҳам айнан Joma фирмаси томонидан тайёрланган либосларда ўтказади. Бу йил жамоа сариқ ва яшил рангдаги формаларда майдонга чиқишни мўлжалламоқда. Сариқ рангли либос асосий форма сифатида белгиланди. Сафар ўйинларида эса яшил рангдаги формадан фойдаланилади.
“Бухоро” – Macron
“Бухоро” жамоаси ўтган йили Joma билан ишлаганди. Лекин бу йилдан жамоа теҳник ҳамкорини ўзгартирди. Унга кўра, бухорликлар энди Италиянинг Macron фирмаси либосларида майдонга чиқишади. Ушбу фирма “Бухоро” учун оқ ва яшил рангдаги формалар тайёрлаб беради.
Оқ рангдан уйдаги учрашувларда фойдаланилса, сафар учрашувларида футболчилар яшил рангли формада майдонга чиқишади.
Таъкидлаш жоиз, Macron либосларидан ўтган йили Олий Лигани тарк этган “Динамо” фойдаланганди.
“Қизилқум” – Joma
Навоийнинг “Қизилқум” жамоаси ўтган йилги мавсумда Joma билан ҳамкорлик қилганди. Томонлар ҳамкорликни давом эттиришни мақсад қилишган. Шу сабабли бу йил ҳам “олтин изловчилар” айнан Joma либосларидан фойдаланишади. Жамоа кулранг ва оқ рангдаги либослардан фойдаланади. Асосий либос ранги эса оқ бўлиши мўлжалланган.
“Обод” – Nike
Олий Лиганинг дебютант жамоаси саналадиган Тошкентнинг “Обод” клуби янги мавсумга ўзгача ҳозирлик олиб бормоқда. Жамоа хориж йиғин ташкил этишга улгурганидан хабарингиз бор. Клуб раҳбарияти жамоа ишқибозларини хушнуд этиш учун имкон қадар ҳаракат қилишаётганини таъкидлаш жоиз.
Эндиликда “Обод” жаҳонга машҳур Nike фирмаси билан ҳамкорлик қилади. Унга кўра, “Обод” футболчилари 2016-йилги мавсумни мазкур фирма либосларида ўтказишади. Ўтган йили Joma билан ишлаган “Обод” янги йилга янги ҳамкор билан ишлашни лозим топди.
Асосий либос ранги оқ бўлиши кўзда тутилган. Кўк рангдаги либосдан эса сафар ўйинларида фойдаланилади.
Олий Лига-2016га оид қизиқарли маълумотлар тақдим этишда давом этамиз. SPORTS.uzдан узоқлашманг!
Зоҳирбек Акрамхонов тайёрлади.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
