Франциялик тажрибали мутахассис Арсен Венгер жорий мавсум «тўпчилар»ни яна шоҳсупага олиб чиқиш имкониятига эга эди. Бироқ айрим сабабларга кўра, юзага келган қоқилишлар қимматли очколар бой берилишига олиб келди. Оқибатда «Арсенал» етакчи - «Лестер»дан анча ортда қолиб кетди. Мураббийнинг фикрича, жамоа шаънига ёғдирилаётган танқидий фикрлар ўринли эмас, «тулкилар»нинг нималарга қодир эканликлари эса яна бир йилдан кейин маълум бўлади.
- Етакчи тўртликдан жой олиш учун кечаётган кураш ва жамоангиз мавқеини қандай баҳолайсиз?
- Ҳаммаси жуда оддий. Вазият, яъни «Лестер»нинг етакчилиги учун барча клублар ўзларини айбдор ҳис этишаётганига шубҳа қилмайман. Лекин иккинчи томондан, «тулкилар» очколарни ўғирлаб олишгани йўқ. Жамоа ўз ўйини билан натижага эришмоқда. Мавсумнинг рамзий терма жамоасига эътибор қаратсангиз, унга асосан «Лестер» вакиллари киритилганига гувоҳ бўласиз. Демак, жамоа кучли. Ишончим комилки, турнир жадвали барча жамоаларни ҳайрон қолдираётгани аниқ. Бироқ ўша клублар ҳам «Лестер» каби кўплаб баҳсларни 1:0 ҳисобида якунлай олишганида, ҳозир етакчига айланишарди. Дарҳақиқат, улар техник маҳорат бобида «тулкилар»дан устун. Аммо айрим муаммоларга дуч келишди. Дейлик, «Лестер»да жароҳатланганлар йўқ, рақобатчилар бир нечта мусобақада иштирок этишди, «тулкилар» эса Англия кубогидан барвақт чиқиб кетишди. Лекин клуб ҳурматга лойиқ, барибир. Спортда шундай назария бор: «Муваффақиятга эришиш учун аламзада бўлиш шарт». «Лестер» таркибига эътибор беринг: унинг бирор футболчисига 18 ёшида ЧЛда тўп суриш насиб этган эмас. Қолаверса, уларнинг кўплари тақдир сийловидан бебаҳра улғайишган. Мисол учун, Н~Голо Кантени олайлик - вақтида Францияда ҳам ҳеч кимга керак бўлмай қолганди. Шу нохуш кечинма унинг табиатини шакллантирган. Канте ва унга ўхшаш йигитлар ўз олдиларига амалга ошириш қийин бўлган орзуни қўйишган, энди мақсадни рўёбга чиқариш учун бор куч-маҳоратларини ишга солишмоқда. «Лестер» бошқа жамоалар учун - бебаҳо сабоқ! Албатта, бу жамоа ҳам камчиликлар холи эмас. Аммо у ажойиб самарадорлик ва ҳайратомуз руҳиятни намойиш этмоқда.
- Демак, сизнингча, «Лестер»нинг муваффақиятга чанқоқлиги бошқаларникидан кучлироқ. Бу билан «Арсенал» ва бошқа жамоаларни танқид қилмаяпсизми?
- «Тулкилар» ҳам, менинг жамоам ҳам чанқоқ. Фарқ шундаки, «Лестер» юксак самарадорликни намойиш этмоқда, бизга эса бир қатор муаммолар халал берди. Ўзингиз ўйлаб кўринг, чоршанба куни «Барселона»га қарши майдонга тушган жамоа шанба оқшоми «Кристалл Пэлас» ёки «Эвертон» билан баҳслашишга мажбур. Имкониятлар тенг эмаслиги кўриниб турибди. Ҳозироқ башорат қилишим мумкин: «Лестер» янги мавсумда муаммоларга учрайди. Тўғри, ҳозирда юлдузлик нашъасидан маст бўлмаган футболчилар ажойиб уюшқоқликни кўрсатишмоқда. Таажжубки, клубнинг бундай юришида кўпроқ бизни айблашяпти. Ваҳоланки, бу жамоани 2 марта маҳв этдик. Шундай экан, «тулкилар»нинг чўққида туришганида биз эмас, бошқа жамоалар айбдор. «Лестер» дейлик, «Манчестер Сити», «Тоттенхэм», «МЮ» ва «Ливерпуль» билан сафар учрашувларида фақат бир марта мағлубиятга учради. Тан олиш керак, жамоага гап йўқ! Спорт - бу шоу. Уни қойилмақом тарзда уддалаётган жамоани эътироф этиш учун мардлик талаб этилади. «Лестер» ўзининг тиришқоқ, меҳнатсеварлиги билан ҳурматга лойиқ. Бироқ бундай «томоша»нинг умри қисқа. Агар жамоа шу услуб билан ғолиб чиқса, уни муваффақият билан самимий муборакбод этаман. Лекин ЧЛда бутун бир ўйинни тўпсиз ўтказсанг, шанба куни роса қийналишинг аниқ. Хуллас, «тулкилар»дан янги муҳитга мослашиш талаб этилади. Жамоанинг кейинги тақдирига кафолат бериш учун ақлим заифлик қилади. Лекин ўз ҳурматимни изҳор этишга кучим етади.
- Жамоангизнинг март ойидаги натижаларига қандай омиллар таъсир ўтказди?
- Айтайлик, 2та учрашувнинг аҳамияти катта эди: «МЮ» ва «Суонси»га қарши кечган баҳсларники. Боз устига, таркибда кадрлар муаммосига учрадик. Яъни Уэлбек, Касорла ва Уилшир хизматидан фойдаланолмадик. Ўша даврнинг ижобий хусусияти шуки, ал Нени ва Ивоби каби ёшларни кашф этдик. Аммо жамоага «қотиллик хислати» етишмади. Умуман олганда, мавсум давомида намойиш этган ўйинларимизнинг сифати чакки эмас. Ҳатто март-апрель ойларидаги беллашувларда ҳам ёмон кўринмадик. Афсуски, қувувчи ролида эдик ва хато қилишга ҳаққимиз йўқ эди. Ана шу асабий вазият халақит берди. Шунингдек, мусобақа тақвими ҳам жиддий таъсир кўрсатди. «Сандерленд»га қарши баҳс унинг элитада жон сақлаб қолиш учун курашаётган пайтига тўғри келди. Ваҳоланки, анча олдинроқ, байрам кунлари куч синашганимизда, нисбатан осон бўларди.
- «Вест Бромвич»га қарши баҳсда «Эмирейтс» мухлисларининг дарғазаб нигоҳларига эътибор қаратдингизми?
- Истардимки, мухлислар жамоага ишонишда давом этишсин. Ахир биз лигада қолиш учун курашаётганимиз йўқ-ку. Албатта, мухлисларимизни бахтиёр ҳолатда кўришни истаймиз. Ўйлашимча, улар «Арсенал» билан фахрланадилар. Ахир биз барқарор ўйин намойиш этмоқдамиз. Тўғри, бунинг ўзи етарли эмас. Лекин юксак даражадаги футболда мухлислар ҳам, ўйинчилар ва мураббийлар ҳам ҳар қандай вазиятга шай туришлари керак...
Манба: Football.ua,
Содиқ СОБИР тайёрлади
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
