Европа чемпионати мезбони мусобақанинг финалига чиқишга муваффақ бўлди. Германияга қарши ўйинда Франция терма жамоаси ғалаба қозонишга муваффақ бўлди.
Учрашувни французлар фаол бошлашди ва 7-дақиқадаёқ ҳисобни очишга яқин келишди. Улар қисқа паслар орқали жуда чиройли ҳужум ташкил қилишди. Натижада Гризманн 12 метрдан зарба беришга муваффақ бўлди. Нойер зарбани қайтарди.
Шундан сўнг устунлик ва ўйин назорати немислар томонига ўтиб кетди. 13-дақиқада Эмре Жан ўнг қанотдан етказган узатмани Мюллер яқин масофадан дарвозага аниқ бура олмади. Орадан бир дақиқа ўтиб Жан 17 метрлардан бериши натижасида бурчакка кираётган тўпни Льорис қайтаришга муваффақ бўлди.
Йоахим Лёв шогирдлари босимни ошириб боришди, аммо бўлим сўнггида хатоларга йўл қўя бошлашди. Жиру майдон марказида ҳаводаги тўп учун курашда Боатенгдан устун келди ва тўпни эгаллаб, бирга-бир вазиятга чиқиб кетди. Унинг жарима майдончасига кириб йўллаган зарбаси йўлига Хёведес ташланди. Қўшиб берилган дақиқалар бошланган пайтда Дешам шогирдлари бурчак тўпини ўйинга киритишди. "Иккинчи қават" учун курашга қўшилган Швайнштайгер қўлини баланд кўтарди ва тўп унинг қўлига тегди. Никола Риццоли кичик паузадан кейин ўйинни тўхтатди ва пенальти белгилади.
Иккинчи бўлимни яна французлар фаол бошлашди. Германия ўйин назоратини ўз томонига оғдиришга ҳаракат қилди, аммо уларнинг иккинчи 45 дақиқаликда ҳаракатлари унчалик самарали бўлмади. Аксинча, "учранглилар"нинг қарши ҳужумлари хавфли чиқа бошлади. Бўлим ўрталарида немисларнинг хатосидан сўнг Гризманн рақиб дарвозасини яна бир марта ишғол қилди ва амалда ўйин тақдирини ҳал қилди. Францияликлар прессинг уюштириши оқибатида Погба Германия жарима майдончаси ичида ҳимоячидан тўпни олиб қўйди ва чап томондан дарвозабон майдончасига узатма берди. Нойер тўпни қайтарди-ю, аммо уни эгаллай олмади. Гризманн тўпни дарвозага буриб юборди.
Ўйин сўнгида немислар гол уриш учун бир нечта имкониятлар ҳосил қилди, аммо уларга омад етишмади.
Шу тариқа, Франция терма жамоаси ўз уйида ўтаётган Евро-2016нинг финалига чиқишга муваффақ бўлди. Чемпионлик учун улар Португалияга қарши баҳс олиб борадилар. Финал ўйини 10 июль куни бўлиб ўтади.
Евро-2016. Ярим финал
Германия – Франция 0:2 (0:1)
Голлар: 0:1 – 45, пенальти Гризманн, 0:2 – 72 Гризманн.
Германия – Нойер, Хеведес, Боатенг (Мустафи, 61), Хектор, Киммих, Жан (Гетце, 67), Швайнштайгер (Сане, 79), Кроос, Озил, Дракслер, Мюллер.
Франция – Льорис, Косьельни, Эвра, Санья, Умтити, Погба, Матюиди, Пайет (Канте, 71), Сиссоко, Гризманн (Кабай, 90), Жиру (Жиньяк, 78).
Огоҳлантиришлар: Жан (36), Эвра (43), Швайнштайгер (45), Озил (45), Дракслер (50), Канте (75).
Матнда хатолик топсангиз, ўша хатони белгилаб, бизга жўнатинг (Ctrl + Enter).
Сурхон
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
